ລາວ-ອາເມລິກາ ເພີ່ມທະວີການພົວພັນຮ່ວມມືຊ່ວຍເຫລືອໃນຫລາຍວຽກງານ ຂອງພາກພື້ນອາຊີ-ປາຊີຟິກ

ວັນທີ 14 ຕຸລາ 2022 ຜ່ານມາ, ທ່ານ ແດນຽວ ຄຣິດເຕິນບຣິ້ງ (Daneil Joseph Kristembrink) ຜູ້ຊ່ວຍລັດຖະມົນຕີຕ່າງປະເທດ, ຜູ້ຊີ້ນຳຂົງເຂດວຽກງານອາຊີຕາເວັນອອກ ແລະ ປາຊີຟິກ ໄດ້ມີໂອກາດເຮັດວຽກ ແລະ ຢ້ຽມຢາມ ສປປ ລາວ ເພື່ອຫາລືວຽກງານຮ່ວມມືສອງຝ່າຍແບບກວມລວມ ແລະ ໃຫ້ສໍາພາດຕໍ່ສື່ມວນຊົນລາວ ຢູ່ສູນອາເມລິກາທາດດໍາ, ນະຄອນຫລວງວຽງຈັນ ໂດຍຢໍ້າຄືນເຖິງຄວາມໝາຍໝັ້ນທີ່ຈະຂະຫຍາຍການຮ່ວມມືລະຫວ່າງ ສະຫະ ລັດອາເມລິກາ ແລະ ສປປ ລາວ ພາຍໃຕ້ຂອບການເປັນຄູ່ຮ່ວມມືແບບກວມລວມ ພາກພື້ນປາຊີຟິກເຊິ່ງໄດ້ປະກາດຢ່າງເປັນທາງການທີ່ນະຄອນຫລວງວຽງຈັນ ລະຫວ່າງການຢ້ຽມຢາມ ສປປ ລາວ ຂອງອະດີດປະທານນາທິບໍດີ ໂອບາມາ ໃນປີ 2016.

ໂອກາດນີ້, ທ່ານ ຜູ້ຊ່ວຍລັດຖະມົນຕີຕ່າງປະເທດ ກ່າວວ່າ: ເພື່ອສະແດງໃຫ້ເຫັນເຖິງການພົວພັນຮ່ວມມືພາກພື້ນ ອາຊີຕາເວັນອອກ ແລະ ປາຊີຟິກ, ເປັນຈຸດສຸມໃຈກາງໃນການສ້າງຄວາມເຂັ້ມແຂງ ແລະ ຄວາມອາດສາມາດ ໃຫ້ແກ່ພາກພື້ນ; ດັ່ງນັ້ນ, ສະຫະລັດອາເມລິກາ ມີຄວາມເພິ່ງພໍໃຈທີ່ເຫັນວ່າການຮ່ວມມືສອງຝ່າຍລາວ ແລະ ສະຫະລັດອາເມລິກາ ໄດ້ມີຄວາມຄືບໜ້າຕາມແຜນການເປັນຕົ້ນແມ່ນວຽກງານຊ່ວຍເຫລືອເກັບກູ້ລະເບີດ ບໍ່ທັນແຕກທີ່ຕົກຄ້າງແຕ່ປາງສົງຄາມ, ຕ້ານອາຊະຍາກໍາຂ້າມຊາດ, ສາທາລະນະສຸກ, ການສຶກສາ, ການເຕີບໂຕຂອງເສດຖະກິດ, ກະສິກຳ ແລະ ການຄຸ້ມຄອງ-ບໍລິຫານລັດ, ຄວາມໝັ້ນຄົງ, ຕ້ານການຄ້າມະນຸດ, ການປ້ອງກັນການຊື້-ຂາຍ ວັດຖຸບູຮານ ແລະ ຊັບສິນທາງວັດທະນາທໍາ. ພ້ອມທັງໄດ້ຍົກໃຫ້ເຫັນຜົນກອງປະຊຸມການປຶກສາຫາລືຮອບດ້ານ ລາວ-ອາເມລິກາ ຄັ້ງທີ 10 ຢູ່ນະຄອນຫລວງວຽງຈັນ ເຖິງທິດທາງໃນການຂະຫຍາຍຂອບການຮ່ວມມືຂອງສອງຝ່າຍ.

ທ່ານ ຜູ້ຊ່ວຍລັດຖະມົນຕີຕ່າງປະເທດ ໃຫ້ຮູ້ຕື່ມວ່າ: ການເປັນຄູ່ຮ່ວມມືສາກົນທຳອິດຂອງ ລາວ-ອາເມລິກາ ທີ່ໄດ້ໃຫ້ການຊ່ວຍເຫລືອດ້ານການສະກັດກັ້ນ ແລະ ຄວບຄຸມການແຜ່ລະບາດຂອງພະຍາດໂຄວິດ-19 ໃນໄລຍະທີ່ມີການແພ່ລະບາດຂອງພະຍາດນັ້ນ ອັນພົ້ນເດັ່ນ ທີ່ລັດຖະບານ ແລະ ປະຊາຊົນ ອາເມລິກາ ໄດ້ໃຫ້ການຊ່ວຍເຫລືອດ້ານງົບປະມານ, ອຸປະກອນການແພດ, ວັກຊີນ ແລະ ຢາ ແກ່ ສປປ ລາວ.