ປະກາດລາຍຊື່ນັກເຕະເຂົ້າຊິງລາງວັນ ບັນລົງດໍ 2022
ຕ້ອງບອກວ່າບໍ່ໜ້າຈະພາດແລ້ວແບບນີ້ ຫລັງຈາກທີ່ມີລາຍຊື່ນັກເຕະທີ່ຈະຄວ້າລາງວັນບັນລົງດໍ 2022 ໄປຄອງ ເຊິ່ງຊື່ຕາມທີ່ ຫລຸດມານັ້ນຄື ຄາຣິມ ເບນເຊມາ ກອງໜ້າຊາວຝຣັ່ງ ຈາກສະໂມສອນ ຣຽວ ມາດຣິດ ທີມດັງແຫ່ງ ລາ ລີກາ ສະເປນ ພາຍໃຕ້ ການນຳທີມ ຄາໂລ ອັນເຊລັອຕຕິ ຜູ້ຈັດການທີມຊາວອິຕາລີ.
ຜ່ານມາ ເບນເຊມາ ເປັນຕົວເລືອກອັນດັບຫນຶ່ງທີ່ຈະຄວ້າລາງວັນ “ ບັລລົງດໍ 2022 ” ໄປຄອງ ຫລັງຈາກຜົນງານລະດູການ 2021-22 ທີ່ຮ້ອນແຮງທີ່ສຸດ ດ້ວຍການຍິງໄປເຖິງ 47 ປະຕູ ກັບ ອີກ 15 ແອສຊິສ ລວມທຸກລາຍການ ພ້ອມພາທີມຄວ້າແຊ໊ມ ຢູຟາ ແຊ໊ມປຽນ ລີກ, ລາລີກາ ສະເປນ ແລະ ຊູບເປ ໂກປາ ເດເອສປັນຢາ ໄປຄອງໄດ້ຢ່າງຍິ່ງໃຫຍ່.
ສຳລັບພິທີມອບລາງວັນດັ່ງກ່າວ ຈະຈັດຂຶ້ນໃນວັນຈັນທີ 17 ຕຸລາ ທີ່ໂຮງລະຄອນຊາເປີເລ ນະຄອນຫລວງປາຣີສ ປະເທດຝຣັ່ງ ເຊິ່ງການຄັດເລືອກລາງວັນໃນປີນີ້ຈະເລືອກຈາກຜົນງານຂອງນັກເຕະໃນລະດູການ 2021-22 ເຊິ່ງຈະແຕກຕ່າງຈາກການຄິດ ຄະແນນລາງວັນຄັ້ງກ່ອນໆທີ່ຈະໃຊ້ເປັນປີປະຕິທິນເຕັມ.
