ການນຳສູງສຸດຈີນ ເນັ້ນຄວາມສໍາຄັນການສ້າງສັງຄົມນິຍົມທັນສະໄໝຮອບດ້ານ ຕາມຫລັກການປົກຄອງດ້ວຍກົດໝາຍ
October 17, 2022 - 11:00 AM
ໃນໂອກາດກ່າວບົດລາຍງານການເມືອງຕໍ່ກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 20 ຂອງພັກກອມມູນິດຈີນ ໃນວັນທີ 16 ຕຸລາ 2022 ທີ່ນະຄອນຫລວງປັກກິ່ງ, ສະຫາຍ ສີ ຈິ້ນຜິງ ເລຂາທິການໃຫຍ່ຄະນະບໍລິຫານງານສູນກາງພັກ ແລະ ປະທານປະເທດຈີນ ໄດ້ເນັ້ນເຖິງຄວາມສຳຄັນທີ່ ສປຈີນ ຈະຕ້ອງສູ້ຊົນສ້າງປະເທດສັງຄົມນິຍົມທັນສະໄໝຮອບດ້ານ ພາຍໃຕ້ຫລັກການປົກຄອງດ້ວຍກົດໝາຍ.
ສະຫາຍ ສີ ຈິ້ນຜິງ ໄດ້ຊີ້ໃຫ້ເຫັນວ່າ: ສປຈີນ ຕ້ອງເພີ່ມທະວີບົດບາດການປົກຄອງດ້ວຍກົດໝາຍ ໃນການສ້າງຄວາມເຂັ້ມແຂງໃຫ້ແກ່ພື້ນຖານຕ່າງໆ, ໃນການຮັບປະກັນຄວາມຄາດຫວັງອັນສະເໝີຕົ້ນສະເໝີປາຍ ແລະ ໃນການກໍ່ໃຫ້ເກີດຜົນປະໂຫຍດໄລຍະຍາວ.
ການພັກດັນຮອບດ້ານວຽກງານປົກຄອງຕາມກົດໝາຍໄດ້ກາຍເປັນການປະຕິວັດອັນຍິ່ງໃຫຍ່ໃນວຽກງານການປົກຄອງຂອງ ສປຈີນ ແລະ ມີຄວາມສຳຄັນຕໍ່ຜົນສຳເລັດຂອງພັກໃນການຄຸ້ມຄອງ ແລະ ການປະຕິຮູບປະເທດ, ມີຄວາມສຳຄັນຕໍ່ຄວາມເປັນຢູ່ທີ່ດີຂອງປະຊາຊົນ ແລະ ຕໍ່ສະຖຽນລະພາບໄລຍະຍາວຂອງພັກ ແລະ ຂອງປະເທດຊາດ. ພວກເຮົາຕ້ອງເດີນຕາມເສັ້ນທາງແຫ່ງການປົກຄອງດ້ວຍກົດໝາຍແບບສັງຄົມນິຍົມ ທີ່ມີສີສັນພິເສດຂອງຈີນ, ສ້າງລະບົບການປົກຄອງດ້ວຍກົດໝາຍແບບສັງຄົມນິຍົມຂອງຈີນ ແລະ ສ້າງຈີນໃຫ້ເປັນປະເທດສັງຄົມນິຍົມພາຍໃຕ້ການປົກຄອງດ້ວຍກົດໝາຍ, ຕ້ອງສ້າງບາດກ້າວແບບປະສົມປະສານໃນການຄຸ້ມຄອງດ້ວຍກົດໝາຍໂດຍສຸມໃສ່ການປົກປ້ອງ ແລະ ສົ່ງເສີມຄວາມເທົ່າທຽມ ແລະ ຄວາມຍຸຕິທຳໃນສັງຄົມ, ການນຳໃຊ້ອຳນາດລັດຕາມກົດໝາຍ, ແລະ ການບໍລິຫານລັດຕາມກົດໝາຍ ແລະ ສ້າງບາດກ້າວແບບປະສົມປະສານເພື່ອສ້າງປະເທດ, ລັດ ແລະ ສັງຄົມ ບົນພື້ນຖານການປົກຄອງດ້ວຍກົດໝາຍ.
ສະຫາຍເລຂາທິການໃຫຍ່ພັກກອມມູນິດຈີນ ຢືນຢັນວ່າ: ສປ ຈີນ ຈະສຸມທຸກຄວາມພະຍາຍາມ ເພື່ອຮັບປະກັນການສ້າງລະບຽບການທີ່ດີ, ການບັງຄັບໃຊ້ກົດໝາຍທີ່ເຂັ້ມງວດ, ການບໍລິຫານທີ່ຍຸຕິທຳ ແລະ ການເຄົາລົບກົດໝາຍທົ່ວສັງຄົມ.
ພ້ອມນີ້, ສະຫາຍ ຍັງໄດ້ຍົກໃຫ້ເຫັນຄວາມຈຳເປັນທີ່ຈະຕ້ອງປັບປຸງລະບົບກົດໝາຍສັງຄົມນິຍົມທີ່ມີສີສັນພິເສດຂອງຈີນ ໂດຍມີລັດຖະທຳມະນູນເປັນໃຈກາງ, ຜັກດັນຢ່າງສະເໝີຕົ້ນສະເໝີປາຍການຄຸ້ມຄອງລັດດ້ວຍກົດໝາຍ, ຮັບປະກັນການຄຸ້ມຄອງທີ່ຍຸຕິທຳ, ເຂັ້ມງວດ ແລະ ເພີ່ມທະວີຄວາມພະຍາຍາມໃນການສ້າງການປົກຄອງດ້ວຍກົດໝາຍທົ່ວສັງຄົມ ພ້ອມທັງກ່າວວ່າ ຈີນຈະພະຍາຍາມຈັດຕັ້ງປະຕິບັດລັດຖະທຳມະນູນໃຫ້ດີກວ່າເກົ່າ, ຕິດຕາມກວດກາຕາມລັດຖະທຳມະນູນໃຫ້ໄດ້ດີກວ່າເກົ່າ ແລະ ເພີ່ມທະວີ ການສ້າງກົດໝາຍໃນຂົງເຂດທີ່ສຳຄັນ, ຂົງເຂດທີ່ກຳລັງພົ້ນເດັ່ນ ແລະ ຂົງເຂດທີ່ພົວພັນກັບຕ່າງປະເທດ.
