ອິນໂດເນເຊຍຫ້າມນຳໃຊ້ “ບາງສ່ວນປະກອບ” ໃນຢາແກ້ໄອ ຫລັງພົບກໍລະນີເດັກນ້ອຍເສຍຊີວິດ

ອິນໂດເນເຊຍອອກຄຳສັ່ງຫ້າມນຳໃຊ້ສ່ວນປະກອບບາງຢ່າງໃນຢາແກ້ໄອເດັກນ້ອຍ ເຊິ່ງກ່ຽວຂ້ອງກັບການເສຍຊີວິດຂອງເດັກນ້ອຍ 70 ຄົນໃນແກມເບຍ, ຂະນະທີ່ປະເທດໝູ່ເກາະແຫ່ງນີ້ກຳລັງສືບສວນກໍລະນີໝາກໄຂ່ຫລັງເສຍຫາຍຮຸນແຮງທີ່ຂ້າຊີວິດເດັກນ້ອຍ 20 ກວ່າຄົນໃນນະຄອນຫລວງຈາກາຕາປີນີ້.

ວັນທີ 15 ຕຸລາ 2022, ສຳນັກຂ່າວຣອຍເຕີລາຍງານວ່າ: BPOM ໜ່ວຍງານຄວບຄຸມອາຫານ ແລະ ຢາ ຍັງລະບຸວ່າ: ພວກເຂົາກຳລັງສືບສວນໂອກາດຄວາມເປັນໄປໄດ້ທີ່ສ່ວນປະກອບດັ່ງກ່າວຄື: ໄດເອທິລີນ ໄກລຄອລ ແລະ ເອທິລີນໄກລຄອລ ອາດປົນເປື້ອນສ່ວນປະກອບອື່ນທີ່ຖືກໃຊ້ເປັນຕົວທຳລະລາຍ.

ແກມເບຍ ແລະ ອິນເດຍກຳລັງສືບສວນການເສຍຊີວິດຈາກອາການໝາກໄຂ່ຫລັງເສຍຫາຍຮຸນແຮງ ເຊິ່ງອາດກ່ຽວຂ້ອງນຳຢາແກ້ໄອທີ່ຜະລິດໂດຍບໍລິສັດ Maiden Pharmaceuticals ໃນນະຄອນຫລວງນິວເດລີ.

ອົງການອະນາໄມໂລກ ລະບຸວ່າ: ທາງອົງການຄົ້ນພົບສ່ວນປະກອບດັ່ງກ່າວໃນລະດັບທີ່ບໍ່ອາດຍອມຮັບໄດ້ ເຊິ່ງອາດເປັນພິດ ໃນຜະລິດຕະພັນ 4 ຊະນິດຂອງບໍລິສັດ Maiden.

“ເພື່ອຄວາມປອດໄພຂອງສາທາລະນະ BPOM ໄດ້ກຳນົດເງື່ອນໄຂໃນຂັ້ນຕອນການຂຶ້ນທະບຽນວ່າ: ທຸກຜະລິດຕະພັນຢານ້ຳສຳລັບເດັກ ແລະ ຜູ້ໃຫຍ່ຈະຕ້ອງບໍ່ມີ ໄດເອທິລີນ ໄກລຄອລ ແລະ ເອທິລີນໄກລຄອລ ເປັນສ່ວນປະກອບ” BPOM ລະບຸໃນຖະແຫລງການ.

BPOM ຍັງເນັ້ນວ່າ: ຜະລິດຕະພັນ 4 ຊະນິດທີ່ກ່ຽວຂ້ອງການເສຍຊີວິດຂອງເດັກໃນແກມເບຍຍັງບໍ່ໄດ້ຂຶ້ນທະບຽນໃນອິນໂດເນເຊຍ ລວມທັງຜະລິດຕະພັນອື່ນໆຂອງບໍລິສັດ Maiden.