ສິງກະໂປເຝົ້າຕິດຕາມໂຄວິດສາຍພັນ XBB ຄາດລະບາດສູງສຸດກາງເດືອນພະຈິກ
ກະຊວງສາທາລະນະສຸກ (MOH) ຂອງສິງກະໂປເປີດເຜີຍໃນວັນທີ 15 ຕຸລາວ່າ: ການແພ່ລະບາດຂອງພະຍາດໂຄວິດ-19 ໃນປັດຈຸບັນເປັນຜົນມາຈາກໄວຣັສສາຍພັນຍ່ອຍ XBB ແລະ ຄາດວ່າ ຈຳນວນຜູ້ຕິດເຊື້ອຈະສູງເຖິງ 15.000 ຄົນຕໍ່ວັນໃນໄລຍະປະມານກາງເດືອນພະຈິກນີ້.
MOH ເປີດເຜີຍວ່າ: ຈາກການຄາດຄະເນທີ່ອີງໃສ່ການລະບາດຄັ້ງກ່ອນບົ່ງຊີ້ວ່າ: ສິງກະໂປມີຂີດຄວາມສາມາດດ້ານການເບິ່ງແຍງສຸຂະພາບພຽງພໍຈະຮັບມືການເພີ່ມຂຶ້ນຂອງຈຳນວນຜູ້ຕິດເຊື້ອໂຄວິດ-19.
ເວັບໄຊຂອງໜັງສືພິມສະເຕຣທາມລາຍງານວ່າ: ໂຮງໝໍຂອງລັດຖະບານສິງກະໂປໄດ້ອອກມາດຕະການຕ່າງໆແລ້ວເຊັ່ນ: ການເລື່ອນຮັບຄົນເຈັບທີ່ບໍ່ມີອາການຮຸນແຮງ ເພື່ອຈັດຫາຕຽງເພີ່ມອີກ 200 ຕຽງສຳລັບຮອງຮັບຜູ້ຕິດເຊື້ອໂຄວິດ.
ລັດຖະມົນຕີສາທາລະນະສຸກຂອງສິງກະໂປເປີດເຜີຍໃນການຖະແຫລງຂ່າວວ່າ: “ມີທ່າອ່ຽງທີ່ໄວຣັສໂຄວິດ-19 ສາຍພັນຍ່ອຍ XBB ຈະເຮັດໃຫ້ເກີດການແພ່ລະບາດໃນໄລຍະສັ້ນ ແລະ ຮຸນແຮງ”.
ລັດຖະມົນຕີສາທາ ໄດ້ຮຽກຮ້ອງໃຫ້ຊາວສິງກະໂປຮັບຜິດຊອບໃນການເບິ່ງແຍງຕົນເອງທ່າມກາງການແພ່ລະບາດຂອງພະຍາດໂຄວິດ-19 ຮອບໃໝ່ ແລະ ລັດຖະບານອາດຈະກັບໄປບັງຄັບໃຫ້ປະຊາຊົນໃສ່ຜ້າປິດປາກ ຫລື ໃຊ້ມາດຕະການດ້ານຄວາມປອດໄພອື່ນໆ.
