ແອັສປາຍສຳເລັດ “ປ່ຽນຖ່າຍລຳໄສ້ຈາກຜູ້ບໍລິຈາກທີ່ເສຍຊີວິດ” ໃຫ້ເດັກນ້ອຍ
ຄະນະແພດຂອງໂຮງໝໍແຫ່ງໜຶ່ງໃນແອັສປາຍ ປະສົບຜົນສຳເລັດເປັນກໍລະນີທຳອິດຂອງໂລກ ໃນການປ່ຽນຖ່າຍລຳໄສ້ຈາກຜູ້ບໍລິຈາກທີ່ເສຍຊີວິດແລ້ວ ໃຫ້ເດັກນ້ອຍອາຍຸ 13 ເດືອນ.
ວັນທີ 13 ຕຸລາ 2022, ສຳນັກຂ່າວຊິນຮົວລາຍງານວ່າ: ທີມບຸກຄະລາກອນການແພດ ຂອງໂຮງໝໍລາປາ ໃນນະຄອນຫລວງມາດຣິດ ເຜີຍແພ່ຖະແຫລງການໃນອາທິດນີ້ ຢືນຢັນວ່າ: “ເອັມມາ” ເດັກຍິງອາຍຸ 13 ເດືອນ ກາຍເປັນບຸກຄົນທຳອິດຂອງໂລກ ທີ່ໄດ້ຮັບການປ່ຽນຖ່າຍລຳໄສ້ຈາກການບໍລິຈາກອະໄວຍະວະໃນສະພາບຫົວໃຈຢຸດເຕັ້ນ ທີ່ໝາຍຄວາມວ່າຜູ້ບໍລິຈາກໄດ້ເສຍຊີວິດແລ້ວ.
ທັງນີ້, ການປ່ຽນຖ່າຍດ້ວຍເຕັກນິກດັ່ງກ່າວຈຳເປັນຕ້ອງໃຊ້ອຸປະກອນ ຊ່ວຍກະຕຸ້ນເລືອດໃຫ້ໄຫລວຽນຜ່ານອະໄວຍະວະຕ່າງໆ ສຳລັບການປ່ຽນຖ່າຍຫລັງຈາກຜູ້ບໍລິຈາກເສຍຊີວິດ ແລະ ເກັບຮັກສາອະໄວຍະວະນັ້ນໆໃຫ້ຢູ່ໃນສະພາບທີ່ສາມາດນຳໃຊ້ໄດ້ ໂດຍເຕັກນິກໃໝ່ນີ້ເກີດຂຶ້ນຫລັງຈາກການຄົ້ນຄວ້າໄລຍະ 3 ປີ ໂດຍຄະນະຜູ້ຊ່ຽວຊານຂອງໂຮງໝໍລາປາ ເຊິ່ງເປັນໜຶ່ງໃນໂຮງໝໍດີທີ່ສຸດໃນເອີຣົບສຳລັບການປ່ຽນຖ່າຍອະໄວຍະວະໃຫ້ເດັກ.
ສ່ວນຄອບຄົວຂອງ ເອັມມາ ສະແດງຄວາມຊາບຊຶ້ງ ແລະ ຂອບໃຈຄອບຄົວຂອງຜູ້ບໍລິຈາກອະໄວຍະວະ ແລະ ທຸກຄົນທີ່ມອບຊີວິດໃໝ່ໃຫ້ລູກສາວ ເຊິ່ງຕອນນີ້ໄດ້ຮັບອະນຸຍາດຈາກຄະນະແພດໃຫ້ກັບໄປພັກຟື້ນຢູ່ເຮືອນແລ້ວ. ເອັມມາ ບໍ່ສະບາຍຈາກສະພາບລຳໄສ້ລົ້ມເຫລວຢ່າງຮຸນແຮງ ນັບແຕ່ມີອາຍຸພຽງ 1 ເດືອນ.
