ແຂວງສະຫວັນນະເຂດ ຈູດທຳລາຍຢາເສບຕິດຈຳນວນຫລວງຫລາຍເນື່ອງໃນໂອກາດວັນແຫ່ງຊາດຕ້ານຢາເສບຕິດ

ເນື່ອງໃນໂອກາດວັນແຫ່ງຊາດຕ້ານຢາເສບຕິດ ຄົບຮອບ 21 ປີ (12 ຕຸລາ 2001-12 ຕຸລາ 2022), ແຂວງສະຫວັນນະເຂດ ໄດ້ຈັດພິທີທໍາລາຍຢາເສບຕິດວັນທີ 12 ຕຸລາ 2022 ນີ້ ທີ່ກອງບັນຊາການ ປກສ ແຂວງສະຫວັນນະເຂດ, ໂດຍການເປັນທານຂອງທ່ານ ນາງ ຫລິງທອງ ແສງຕາວັນ ຮອງ ເຈົ້າແຂວງສະຫວັນນະເຂດ, ທ່ານ ພັອ ສົມໝາຍ ພົມມະຈັນ ຫົວໜ້າກອງບັນຊາການ ປກສ ແຂວງ, ມີຄະນະພັກ, ຄະນະບັນຊາແຂວງເຂົ້າຮ່ວມ.

ໃນພິທີ, ທ່ານ ຮອງ ເຈົ້າແຂວງສະຫວັນນະເຂດ ກ່າວວ່າ: ເພື່ອສະແດງເຖິງເຈດຈໍານົງ ແລະ ການຮ່ວມມືຂອງສັງຄົມທີ່ ພ້ອມຈິດພ້ອມໃຈໃນການຕໍ່ຕ້ານ ກັບບັນຫາຢາເສບຕິດ ເຊິ່ງເປັນໄພຮຸກຮານເຖິງການພັດທະນາເສດຖະກິດ, ຄວາມເປັນລະບຽບຮຽບຮ້ອຍຂອງສັງຄົມ ແລະ ຄວາມໝັ້ນຄົງຂອງຊາດ, ຍ້ອນແນວນັ້ນໃນໄລຍະຜ່ານມາກໍຄືປັດຈຸບັນພັກ ແລະ ລັດຖະບານຈຶ່ງໄດ້ຖືເອົາການ ຄວບຄຸມ, ສະກັດກັ້ນ, ຕ້ານ ແລະ ແກ້ໄຂບັນຫາຢາເສບຕິດ ເປັນໜ້າທີ່ສໍາຄັນ ແລະ ໄດ້ຊີ້ນໍາ-ນໍາພາການຈັດຕັ້ງທີ່ກ່ຽວຂ້ອງປະຕິບັດວຽກງານຢ່າງຕັ້ງໜ້າ ແລະ ຈິງຈັງຕະຫລອດມາ. ຕໍ່ກັບບັນຫາດັ່ງກ່າວພວກເຮົາໄດ້ເອົາໃຈໃສ່ສຶກສາອົບຮົມທຸກຊັ້ນຄົນໃນສັງຄົມເປັນຕົ້ນແມ່ນຊາວໜຸ່ມ, ເຍົາວະຊົນຜູ້ທີ່ເປັນໜໍ່ແໜງຂອງຊາດ ໄດ້ຮັບຮູ້ ແລະເຂົ້າໃຈຢ່າງຖືກ ຕ້ອງກ່ຽວກັບພຶດໄພ ແລະ ຜົນຮ້າຍຂອງຢາເສບຕິດ.

ພ້ອມນີ້, ທ່ານຫົວໜ້າກອງບັນຊາການ ປກສ ແຂວງ ໃຫ້ຮູ້ວ່າ: ພິທີທຳລາຍຢາເສບຕິດໃນມື້ນີ້ແມ່ນໄດ້ນຳເອົາຢາເສບຕິດທີ່ຢຶດໄດ້ທັງໝົດຈາກກຸ່ມຄ້າ-ຂາຍ ໂດຍມີຢາບ້າ 264.395 ເມັດ, ນໍ້າໜັກ 26.067.447 ກຣາມ, ຢາໄອສ໌ 14.805 ກຣາມ, ຢາອີ 2.433 ກຣາມ, ຄັນຊາແຫງ 442 ແທ່ງນໍ້າໜັກ 433,814 ກຣາມ ມາທຳລາຍໂດຍການຈູດຖິ້ມ ເພື່ອລຶບລ້າງຕ້ານບັນຫາຢາເສບຕິດ ອັນເປັນໄພຮຸກຮານເຖິງການພັດທະນາເສດຖະກິດ, ຄວາມເປັນລະບຽບຮຽບຮ້ອຍຂອງສັງຄົມ ແລະ ຄວາມໝັ້ນຄົງຂອງຊາດ.