ບັນຫາຫຍໍ້ທໍ້ສັງຄົມໃດກໍມີ ແຕ່ຕ້ອງຊ່ວຍກັນສະກັດກັ້ນ
ບັນຫາຫຍໍ້ທໍ້ບໍ່ອັນໃດກໍອັນໜຶ່ງ ທັງຢູ່ປະເທດຈະເລີນ ຫລື ຫລ້າຫລັງ, ຮັ່ງມີ-ທຸກຍາກດ້ອຍພັດທະນາລ້ວນມີ, ບັນດາປະເທດຕາເວັນຕົກທີ່ວ່າດີ, ເປັນແຖວໜ້າດ້ານເສດຖະກິດ ແລະ ການທະຫານ, ພວກ ອັນຕະພານກວນເມືອງ ສ້າງຄວາມບໍ່ສະຫງົບຕ່າງໆນານາກໍມີ. ແນວໃດກໍດີການຈະເຮັດໃຫ້ທຸກຄົນເປັນ ຄົນດີໝົດນັ້ນຄົງເປັນໄປບໍ່ໄດ້? ແຕ່ທຸກສັງຄົມກໍພະຍາຍາມເຮັດໃຫ້ມີຄົນດີຫລາຍ, ຄົນບໍ່ດີ ໃຈຊົ່ວຮ້າຍນັ້ນ ໜ້ອຍເທົ່າໃດຍິ່ງດີ. ຈ້ອນມາສູ່ບ້ານເຮົາໂດຍສະເພາະຢູ່ນະຄອນຫລວງວຽງຈັນ ມັກເຫັນຂ່າວການຄາດຕະກໍາ, ການປຸ້ນຈີ້, ຊີງຊັບ, ຂີ້ລັກງັດແງະ ແລະ ອື່ນໆເກືອບວ່າບໍ່ເວັ້ນວັນ ໂດຍຈຸດນີ້ຂໍແລກປ່ຽນຄຳເຫັນນຳກັນວ່າ: ຍ້ອນສັງຄົມລະເຫລີງ ປ່ອຍຈິດປ່ອຍໃຈ ບໍ່ເປັນຫູເປັນຕາຊ່ວຍເຈົ້າໜ້າທີ່ພາກລັດ ຫລື ຍ້ອນເຈົ້າໜ້າທີ່ກ່ຽວຂ້ອງພາກລັດ ລະເຫລີງ ບໍ່ປະຕິບັດມາດຕະການໄວແກ້ໄຂບັນຫາຫຍໍ້ທໍ້ທີ່ປະຊາຊົນສ່ອງແສງລາຍງານມາ ຫລື ບໍ່?
ມັນເປັນເລື່ອງທີ່ຄວນຄິດຫງໍາເພື່ອໃຫ້ຄົນຢາກເຮັດດີ, ເຮັດແນວໃດໃຫ້ຫາງສຽງສັງຄົມຈົ່ມວ່າຕ່າງໆນານາ ທີ່ຄວາມບໍ່ສະຫງົບທາງຈິດໃຈ ຫລຸດລົງ…ສະພາບປາກົດການຫຍໍ້ທໍ້ທີ່ເກີດຂຶ້ນ ເປັນສັນຍານບອກໃຫ້ພວກເຮົາຕ້ອງໄດ້ມີສະຕິລະມັດລະວັງ, ບັນຫາຊົ່ວຮ້າຍ ທີ່ເປັນດັ່ງປາຍເຂັມມຸດຈະໂຍນໃຫ້ຝ່າຍກ່ຽວຂ້ອງແກ້ໄຂບັນຫາແຕ່ຝ່າຍດຽວ ກໍບໍ່ໄດ້ ສະຫລຸບຄືທຸກຄົນລ້ວນມີສ່ວນຮ່ວມ, ຢ່າງໜ້ອຍກໍເປັນຫູເປັນຕາ, ເປັນແບບ ຢ່າງນໍາໜ້າຂອງການເຮັດຄວາມດີ ສອນສັ່ງລູກເຕົ້າຫລານເຫລນໃຫ້ເປັນຄົນດີຂອງສັງຄົມ ເພາະການພັດ ທະນາເສດຖະກິດ ກໍຄວນຄຽງຄູ່ກັບການພັດທະນາວັດທະນະທໍາ-ສັງຄົມ ຈະຖ້າໃຫ້ຈະເລີນທາງວັດຖຸ ຈຶ່ງຈະພັດທະນາວັດທະນະທໍາ ແລະ ຈິດໃຈຄົນກໍບໍ່ສົມຄວນ ເພາະເຫດການບໍ່ດີເກີດຂຶ້ນທຸກມື້ນີ້ມີສ່ວນສໍາຄັນມາຈາກຄວາມເສື່ອມຊາມເສື່ອມໂຊມທາງຈິດໃຈມະນຸດທີ່ເຫັນແກ່ວັດຖຸເງິນຄໍາດ້ານດຽວ.
ສະພາບຫຍໍ້ທໍ້ຢູ່ບ່ອນໃດກໍມີ, ພາກສ່ວນກ່ຽວຂ້ອງ ກໍສຸດຂີດປ້ອງກັນສະກັດກັ້ນ, ແຕ່ດີແທ້ພວກເຮົາຄວນ ຮ່ວມແຮງຮ່ວມໃຈກັນ ສະກັດກັ້ນຈຶ່ງຈະບັນເທົາ ແລະ ຈໍາກັດໄດ້, ມັນແມ່ນພັນທະໜ້າທີ່ໃນຖານະພົນລະ ເມືອງ, ຖືເອົາການປ້ອງກັນ ແລະ ສະກັດກັ້ນແຕ່ຫົວທີເປັນສໍາຄັນ, ເຄື່ອງຂອງຊັບສິນສໍາຄັນຖ້າມີກໍມ້ຽນມັດ ຢ່ານຳມາໃສ່ທີ່ເປັນການລໍ້ຕາລໍ້ໃຈພວກຈິດໃຈເສື່ອມຊາມ, ອົງການປົກຄອງບ້ານ, ປກສບ້ານ, ກອງຫລອນບ້ານ ກໍຄວນຈັດຕັ້ງການກວດກາລາດຕະເວນເປັນປະຈຳແຕ່ລະມື້ຖີ່ຂຶ້ນ, ເຈົ້າໜ້າທີ່ປກສເມືອງ ຫລື ນະຄອນຫລວງ ເມື່ອໄດ້ຮັບການສ່ອງແສງບັນຫາທີ່ເກີດຂຶ້ນ ກໍຕ້ອງປະຕິບັດມາດຕະການໄວ ສອບສວນແລະ ແກ້ໄຂຢ່າງທັນການ, ເສັ້ນທາງປ່ຽວ ບໍ່ມີແສງສະຫວ່າງ ກໍຄວນຕິດຕັ້ງໄຟໃຫ້ສະຫວ່າງ ຫລື ຕັ້ງຈຸດກວດກາລາດຕະເວນຢ່າງເຂັ້ມງວດ ເວົ້າລວມແລ້ວທຸກຝ່າຍຕ້ອງມີສ່ວນຮ່ວມ ຢ່າຖິ້ມ ຫລື ໂຍນຄວາມຜິດໃຫ້ກັນ ແລະ ກັນ
