ຍີ່ປຸ່ນເປີດຮັບນັກເດີນທາງຕ່າງປະເທດ ແບບບໍ່ຕ້ອງມີຄົນນຳທ່ຽວເປັນມື້ທຳອິດ ຄາດກັບມາເປັນປົກກະຕິພາຍໃນປີ 2025
ນັກທ່ອງທ່ຽວຈາກຫລາຍປະເທດເລີ່ມທະຍອຍເດີນທາງເຂົ້າຍີ່ປຸ່ນ, ແຕ່ອາດຕ້ອງໃຊ້ເວລາເຖິງ 3 ປີໃນການກັບໄປສູ່ຕົວເລກກ່ອນໂຄວິດ-19.
ລັດຖະບານຍີ່ປຸ່ນຕັດສິນໃຈເປີດປະເທດຢ່າງເຕັມຮູບແບບວັນທີ 11 ຕຸລາ 2022 ເປັນມື້ທຳອິດ ມີການປົດລັອກຂໍ້ກຳນົດຕ່າງໆ ເຫລືອພຽງຫລັກຖານການສັກວັກຊີນຢ່າງໜ້ອຍ 3 ເຂັມ ຫລື ຜົນກວດເຊື້ອໂຄວິດ-19 ເປັນລົບພາຍໃນ 72 ຊົ່ວໂມງກ່ອນເດີນທາງເທົ່ານັ້ນ ເຮັດໃຫ້ຊາວຕ່າງປະເທດຈາກປະເທດທີ່ໄດ້ຮັບການຍົກເວັ້ນວີຊາໄລຍະສັ້ນ ສາມາດເດີນທາງເຂົ້າມາທ່ຽວໃນຍີ່ປຸ່ນໄດ້ທັນທີ.
ກ່ອນໜ້ານີ້, ຍີ່ປຸ່ນເລີ່ມອະນຸຍາດໃຫ້ນັກທ່ອງທ່ຽວຕ່າງປະເທດເດີນທາງເຂົ້າມາໄດ້ນັບແຕ່ເດືອນມິຖຸນາຜ່ານມາ, ແຕ່ຍັງກຳນົດໃຫ້ຕ້ອງມີການຈອງຄົນນຳທ່ຽວ ແລະ ຊື້ທົວ ຈຳກັດຈຳນວນ 20.000 ຄົນຕໍ່ວັນ ລວມທັງຂໍ້ຈຳກັດອື່ນໆ ເຊິ່ງເຮັດໃຫ້ການເດີນທາງໄປທ່ຽວຍີ່ປຸ່ນຍັງບໍ່ໄດ້ຮັບຄວາມນິຍົມຫລາຍ.
ການເລີ່ມກັບມາເປີດປະເທດຢ່າງເຕັມຮູບແບບໃນວັນທີ 11 ຕຸລານີ້ ຖືເປັນການສົ່ງສັນຍານວ່າລັດຖະບານຍີ່ປຸ່ນກຳລັງຈະເລີ່ມກັບມາຟື້ນຟູທຸລະກິດທ່ອງທ່ຽວຢ່າງຈິງຈັງແລ້ວ ເຊິ່ງໃນເວລາດຽວກັນ ຍັງໄດ້ອອກມາດຕະການກະຕຸ້ນການທ່ອງທ່ຽວໃນປະເທດໃຫ້ຊາວຍີ່ປຸ່ນ ຈົນມີລາຍງານວ່າເວັບໄຊທີ່ກ່ຽວຂ້ອງການທ່ອງທ່ຽວເຖິງກັບລົ້ມ.
ເຖິງຢ່າງໃດກໍຕາມ, ນັກວິເຄາະຍັງເບິ່ງວ່າການທ່ອງທ່ຽວຈະຍັງບໍ່ກັບເຂົ້າສູ່ສະພາບກ່ອນໂຄວິດໄດ້ທັນທີ ໂດຍຄາດວ່າຈະຕ້ອງລໍຖ້າຈົນຮອດປີ 2025 ຈຶ່ງຈະກັບມາເປັນປົກກະຕິອີກ.
ຢ້ອນກັບໄປເມື່ອປີ 2019 ຍີ່ປຸ່ນເຄີຍມີນັກທ່ອງທ່ຽວເດີນທາງເຂົ້າປະເທດສູງສຸດເປັນສະຖິຕິເຖິງ 31,8 ລ້ານຄົນ ຈຶ່ງຕັ້ງເປົ້າວ່າໃນໄລຍະມະຫາກຳກິລາໂອລິມປິກເກມ 2020 ຈະມີນັກທ່ອງທ່ຽວເດີນທາງເຂົ້າມາເຖິງ 40 ລ້ານຄົນ.
ແຕ່ການລະບາດຂອງພະຍາດໂຄວິດ-19 ໄດ້ສົ່ງຜົນກະທົບຢ່າງໜັກຕໍ່ອຸດສາຫະກຳການທ່ອງທ່ຽວ ໂດຍໃນປີ 2022 ນີ້ ຫາກໍມີນັກທ່ອງທ່ຽວເດີນທາງເຂົ້າຍີ່ປຸ່ນປະມານ 5 ແສນຄົນເທົ່ານັ້ນ.
ອ້າງອີງ:
https://www3.nhk.or.jp/nhkworld/en/news/20221011_17/
