ນອນຟັງສຽງຄື້ນ, ກາຕ້າ ຈ້າງເຮືອສຳລານເຮັດໂຮງແຮມລອຍນຳ້ຕ້ອນຮັບແຂກບານໂລກ 2022
ສອງລຳທຳອິດຍັງບໍ່ພໍ ກາຕ້າ ໄດ້ຈ້າງເຮືອສຳລານລຳທີ 3 ເຮັດໂຮງແຮມລອຍນຳ້ເພື່ອກຽມຮອງຮັບແຟນບານທີ່ຄາດວ່າ ຈະມາຈາກຕ່າງແດນເຖິງ 1,5 ລ້ານຄົນ ໃນການແຂ່ງຂັນບານໂລກ 2022.
ເອີ້ນໄດ້ວ່າສອງລຳທຳອິດຍັງບໍ່ພໍ ກາຕ້າ ເຈົ້າພາບການຈັດແຂ່ງຂັນບານໂລກ 2022 ທີ່ຈະເຮັດການແຂ່ງຂັນໃນລະຫວ່າງວັນທີ 21 ພະຈິກ – 18 ທັນວານີ້ ໄດ້ເຮັດການຈ້າງເຮືອສຳລານລຳທີ 3 ເຮັດໂຮງແຮມລອຍນ້ຳເພື່ອກຽມຮອງຮັບແຟນບານທີ່ຄາດວ່າ ຈະມາຈາກຕ່າງແດນເຖິງ 1,5 ລ້ານຄົນ ທີ່ຈະມາຊົມມະຫະກຳທີ່ຍິ່ງໃຫຍ່ທີ່ສຸດຂອງໂລກບານເຕະ.
ທັງນີ້ຈາກການທີ່ຝ່າຍຈັດການແຂ່ງຂັນໄດ້ຄາດການວ່າຈຳນວນແຟນໆລະດັບ 1,5 ລ້ານຄົນ ເຮັດໃຫ້ພວກເຂົາເຊື່ອວ່າຫ້ອງ ພັກທີ່ມີຢູ່ນັ້ນຈະບໍ່ພຽງພໍ ເຊິ່ງກ່ອນໜ້ານີ້ໄດ້ທຳການຈ້າງເຮືອສຳລານໄປແລ້ວ 2 ລຳ ເພື່ອເຮັດໂຮງແຮມ ໂດຍມີຫ້ອງພັກລວມກັນ 4,000 ຫ້ອງ ແລະຫລ້າສຸດ ກໍໄດ້ຈ້າງເຮືອສຳລານເພີ່ມອີກ 1 ລຳ ເພື່ອຮອງຮັບຈຳນວນແຟນບານທີ່ອາດຈະມາສູງກວ່າທີ່ໄດ້ຄາດໄວ້.
ສຳລັບເຮືອສຳລານລຳທີ 3 ຈະມີຫ້ອງພັກຈຳນວນ 1,075 ຫ້ອງ ມີລາຄາເລີ່ມຕົ້ນທີ່ 470 ໂດລາສະຫະລັດ ໂດຍຕ້ອງຈອງຂັ້ນຕຳ່ 2 ຄືນ ໂດຍລວມອາຫານເຊົ້າ 1 ມື້ ແລະ ສາມາດຈ່າຍເພີ່ມໄດ້ອີກ 87 ໂດລາສະຫະລັດ/ມື້/ຄົນ ເພື່ອຮັບອາຫານ 3 ຄາບ/ມື້ ແລະ ລາຄາດັ່ງ ກ່າວນີ້ເປັນລາຄາໃນໄລຍະລະຫວ່າງການແຂ່ງຂັນທີ່ຢູ່ໃນຮອບແບ່ງກຸ່ມເທົ່ານັ້ນ ແລະ ຄ່າຫ້ອງພັກຈະສູງຂຶ້ນໄປຕາມຮອບການ ແຂ່ງຂັນ ເຊິ່ງນັ້ນຫມາຍເຖິງຖ້າໄປຮອບຊີງຊະນະເລີດລາຄາຈະແພງທີ່ສຸດ.
