ບາງອາຫານຊ່ວຍປ້ອງກັນອາການຫລົງໆລືມໆ

ທຸກມື້ນີ້ມີເລື່ອງລາວຕ່າງໆໃນຊີວິດປະຈຳວັນຫລວງຫລາຍ, ຍິ່ງມີໂທລະສັບ, ເຕັກໂນໂລຊີເຂົ້າມາຫລາຍຂຶ້ນ ເປັນໂຕຊ່ວຍຈື່ຈຳສິ່ງຕ່າງໆ ເຮັດໃຫ້ສະມາທິຂອງຄົນເຮົາອາດຫລຸດລົງ ຫລື ຫາຍໄປໄດ້ ເປັນຜົນໃຫ້ຕອນນີ້ເຮົາມັກມີອາການຫລົງໆລືມໆໂດຍທີ່ເຮົາບໍ່ຮູ້ໂຕ ຫລື ບາງເທື່ອຢາກຈະຈື່ຫຍັງໃຫ້ໄດ້ຈັກຢ່າງ ຄິດປານໃດກໍຄິດບໍ່ອອກ. ດັ່ງນັ້ນ, ມື້ນີ້ພວກເຮົາຈຶ່ງມີເຄັດລັບງ່າຍໆເພື່ອເພີ່ມການບຳລຸງສະໝອງໃຫ້ມີຄວາມຈື່ຈຳດີຂຶ້ນມາແນະນຳທ່ານ.

– ໝາກເລັ່ນ : ທ່ານຮູ້ຫລືບໍ່ວ່າໝາກເລັ່ນມີປະໂຫຍດຫລາຍກ່ວາຜັກບາງຊະນິດ ເຊັ່ນ : ມີວິຕາມິນເຊ, ວິຕາມິນອາ, ທາດການຊຽມ, ຟົສຟໍ, ທາດເຫລັກ ແລະ  ສານໄລໂຄປີນໃນໝາກເລັ່ນຈະເຂົ້າໄປຂັດຂວາງສານອະນຸມູນອິດສະລະໃນຫລອດເລືອດ ແຊນສະໝອງໃນລະບົບຕ່າງໆກໍແຂງແຮງ, ຄວາມຈື່ຈຳກໍຈະດີຂຶ້ນຫລາຍ.

– ໄຂ່ : ຖືເປັນອາຫານທີ່ມີໂປຣຕິນຫລາຍ ເພາະອຸດົມໄປດ້ວຍແຮ່ທາດ, ວິຕາມິນ, ເກືອແຮ່. ສິ່ງສຳຄັນປະກອບດ້ວຍວິຕາມິນອາ, ວິຕາມິນເບ, ວິຕາມິນເດ, ຟົສຟໍ, ທາດເຫລັກ, ທາດການຊຽມ, ສັງກະສີ, ໄອໂອດີນ. ໃນໄຂ່ແດງຍັງປະກອບດ້ວຍໂຄລີນີນ ເປັນສານທີ່ຈຳເປັນຫລາຍທີ່ຮ່າງກາຍຈະເອົາໄປໃຊ້ເພື່ອສ້າງສານສື່ປະສາດ ໂດຍສະເພາະສະໝອງໃນພາກສ່ວນທີ່ກ່ຽວຂ້ອງກັບຄວາມຈື່ຈຳຂອງເຮົາເອງ.

– ຖົ່ວຊະນິດຕ່າງໆ : ປະໂຫຍດຂອງຖົ່ວນັ້ນມີຫລາຍຈົນຄິດບໍ່ເຖິງ ນອກຈາກຈະຊ່ວຍຫລຸດຄວາມຕຸ້ຍ  ຫລຸດນຳ້ໜັກສ່ວນເກີນ ເພາະມີໄຂມັນອີ່ມໂຕ ເຊິ່ງເຮັດໃຫ້ເຮົາອີ່ມທ້ອງໄດ້ດົນ, ຊ່ວຍຫລຸດຄວາມສ່ຽງຂອງພະຍາດເບົາຫວານໄດ້ ເພາະສາມາດຄວບຄຸມລະດັບນຳ້ຕານໃນເລືອດ ແລະ ອິນຊູລິນໄດ້ ບໍ່ວ່າຈະແມ່ນຖົ່ວດິນ, ຖົ່ວຂຽວ, ຖົ່ວແດງ ຫລື ຖົ່ວອາວມັອນ ທັງຍັງບຳລຸງສາຍຕາ. ສິ່ງສຳຄັນຄືສ້າງຄວາມຈື່ຈຳ ເພາະມີໂຄລີນທີ່ຊ່ວຍຄວບຄຸມຄວາມຈື່ຈຳນຳ.

– ໄຂມັນຈາກປາ : ໃນປາມີໂອເມກ້າ 3 ເຊິ່ງເປັນກົດໄຂມັນອີ່ມໂຕທີ່ຈຳເປັນຕໍ່ແຊນສະໝອງຫລາຍ ຖ້າຂາດໄປຈະເຮັດໃຫ້ສະ ໝອງເສື່ອມໄວ, ໂອເມກ້າ 3 ຍັງຊ່ວຍຫລຸດຄວາມສ່ຽງຈາກການເກີດເສັ້ນເລືອດໃນສະໝອງແຕກ, ກິນປາເປັນປະຈຳຈະຊ່ວຍບຳລຸງປະສາດ ແລະ ສະໝອງ ໃຫ້ຄວາມຈື່ຈຳດີຂຶ້ນ, ທັງຍັງຊ່ວຍບຳລຸງຜິວໜັງໃຫ້ມີສຸຂະພາບດີ, ເສັ້ນຜົມງາມ, ຫລຸດອາການຄັນ ແລະ ແຫ້ງຈາກພະຍາດຜິວໜັງໄດ້ນຳ.

ນອກຈາກການກິນອາຫານທີ່ກ່າວມາເພື່ອບຳລຸງສະໝອງແລ້ວ ການຝຶກຮ່າງກາຍຄຽງຄູ່ໄປນຳ ເຊັ່ນ : ການຝຶກສະມາທິເພື່ອກຳນົດຈິດໃຈເຮົາໃຫ້ສະຫງົບ, ເຮັດສິ່ງຕ່າງໆໃນຊີວິດເຮົາໃຫ້ຈະແຈ້ງ ແລະ ຕັ້ງໃຈຫລາຍຂຶ້ນ ຫລື ເຮັດຫຍັງໃຫ້ຊ້າລົງແດ່, ເອົາໃຈໃສ່ໃນລາຍລະອຽດຕ່າງໆ ເຫລົ່ານີ້ຈະສົ່ງຜົນຊ່ວຍໃຫ້ສະໝອງໄດ້ອອກກຳລັງກາຍ ຈຶ່ງສາມາດຈື່ຈຳສິ່ງຕ່າງໆໄດ້ດີຍິ່ງຂຶ້ນ.