ລັດຖະມົນຕີກະຊວງອຸດສາຫະກໍາ ແລະ ການຄ້າ ເຄື່ອນໄຫວວຽກງານຢູ່ແຂວງຄໍາມ່ວນ ພ້ອມເນັ້ນໃຫ້ເອົາໃຈໃສ່ສຶກສາອົບຮົມການເມືອງ-ແນວຄິດ ແກ່ພະນັກງານ-ລັດຖະກອນ

ແຫລ່ງຂ່າວຈາກ ແຂວງຄຳມ່ວນ ໃຫ້ຮູ້ວ່າ: ວັນທີ 6 ຕຸລາ ຜ່ານມາ, ທ່ານ ມະໄລທອງ ກົມມະສິດ ລັດຖະມົນຕີກະຊວງອຸດສາຫະກໍາ ແລະ ການຄ້າ (ອຄ)ລົງເຄື່ອນໄຫວວຽກງານຢູ່ແຂວງຄຳມ່ວນ ໂດຍໄດ້ຮັບການຕ້ອນຮັບຈາກ ທ່ານ ບຸນໂຮມ ມຸກດາສັກ ຫົວໜ້າພະແນກອຸດສາຫະກໍາ ແລະ ການຄ້າແຂວງ, ພ້ອມດ້ວຍພະນັກງານທຸກຂະແໜງການອ້ອມພະແນກເຂົ້າຮ່ວມ.

ໂອກາດນີ້, ຫົວໜ້າພະແນກອຸດສາຫະກໍາ ແລະ ການຄ້າແຂວງ ໄດ້ລາຍງານສະພາບການເຄື່ອນໄຫວວຽກງານຂອງພະແນກ ອຄ ແຂວງ ກ່ຽວກັບການຄຸ້ມຄອງມະຫາພາກພາຍໃນຂົງເຂດຕົນຮັບຜິດຊອບໂດຍຫຍໍ້. ພ້ອມນີ້, ກໍໄດ້ມີການປະກອບຄໍາຄິດເຫັນແລກປ່ຽນບົດຮຽນເຊິ່ງກັນ ແລະ ກັນ ລະຫວ່າງສູນກາງກັບທ້ອງຖິ່ນຕໍ່ກັບບັນຫາທີ່ແຕ່ລະຝ່າຍໃຫ້ຄວາມສົນໃຈ.

ຈາກນັ້ນ, ທ່ານ ລັດຖະມົນຕີກະຊວງອຸດສາຫະກໍາ ແລະ ການຄ້າ ກໍໄດ້ມີຄໍາເຫັນໂອ້ລົມ ແລະ ໃຫ້ທິດຊີ້ນໍາຕໍ່ຄະນະພັກ, ຄະນະພະແນກອຸດສາຫະກໍາ ແລະ ການຄ້າແຂວງ ຈົ່ງເອົາໃຈໃສ່ສຶກສາອົບຮົມການເມືອງ-ແນວຄິດ ແກ່ພະນັກງານ-ລັດຖະກອນພາຍໃນຂົງເຂດຂອງຕົນ ໃຫ້ມີຄວາມໜັກແໜ້ນ ຕິດພັນກັບການເຄື່ອນໄຫວວຽກງານວິຊາສະເພາະໃຫ້ມີບາດກ້າວຂະຫຍາຍຕົວ, ມີການປະສານສົມທົບກັບຫລາຍພາກສ່ວນ ເພື່ອຍູ້ແຮງການຜະລິດເປັນສິນຄ້າ. ພ້ອມທັງປັບປຸງ, ຍົກລະດັບຂີດຄວາມສາມາດຂອງພະນັກງານວິຊາການພາຍໃນຂົງເຂດຕົນ ເພື່ອຮອງຮັບກັບສະພາບການຂະຫຍາຍຕົວຂອງເສດຖະກິດ-ສັງຄົມໃນອະນາຄົດ.