ເມືອງແກ່ນທ້າວ ທໍາລາຍສິນຄ້າໝົດອາຍຸ 98 ລາຍການ ລວມມູນຄ່າທັງໝົດຫລາຍກວ່າ 10.000.000 ກີບ
ວັນທີ 6 ຕຸລາ 2022 ຜ່ານມາ, ເມືອງແກ່ນທ້າວ ແຂວງໄຊຍະບູລີ ໄດ້ຈັດພິທີທໍາຍລາຍສິນຄ້າເສື່ອມຄຸນນະພາບ (ສິນຄ້າໝົດອາຍຸ) ທີ່ຫ້ອງການອຸດສາຫະກໍາ ແລະ ການຄ້າເມືອງ. ໂດຍການເຂົ້າຮ່ວມຂອງ ທ່ານ ສີຄານ ແກ່ນມະນີ ຮອງເຈົ້າເມືອງແກ່ນທ້າວ, ມີຫົວໜ້າ, ຮອງຫົວໜ້າຫ້ອງການພ້ອມພາກສ່ວນກ່ຽວຂ້ອງເຂົ້າຮ່ວມ.
ທ່ານ ພອນປະເສີດ ພົມສີ ຮອງຫົວໜ້າຫ້ອງການອຸດສາຫະກໍາ ແລະ ການຄ້າເມືອງ ລາຍງານວ່າ: ໃນວັນທີ 8 ເມສາ 2022 ແລະ ວັນທີ 15-16 ກັນຍາ 2022 ຄະນະກໍາມະການກວດກາສິນຄ້າເສື່ອມຄຸນນະພາບ (ໝົດອາຍຸ) ແລະ ສິນຄ້າຫ້າມວາງຂາຍ ໄດ້ລົງກວດກາສິນຄ້າທີ່ບໍ່ມີຄຸນນະພາບ ແລະ ສິນຄ້າຫ້າມວາງຂາຍຢູ່ຕະຫລາດ, ບັນດາຫ້າງຮ້ານພາຍໃນເທດສະບານເມືອງ, ບ້ານເມືອງໝໍ ແລະ ດ່ານສາກົນ. ຜ່ານການກວດກາທັງໝົດ 50 ຫົວໜ່ວຍ ພົບສິນຄ້າທີ່ບໍ່ມີຄຸນນະພາບ ແລະ ສິນຄ້າຫ້າມວາງຂາຍມີ 25 ຫົວໜ່ວຍ, 98 ລາຍການ ລວມມູນຄ່າທັງໝົດ 10.394.000 ກີບ.
ພ້ອມນີ້, ທ່ານຮອງເຈົ້າເມືອງແກ່ນທ້າວ ຍັງໄດ້ມີຄໍາເຫັນໃຫ້ຄະນະຮັບຜິດຊອບສືບຕໍ່ກວດກາສິນຄ້າສິນຄ້າເສື່ອມຄຸນນະພາບ ແລະ ແລະ ສິນຄ້າຫ້າມວາງຂາຍຢູ່ຕະຫລາດ, ຫ້າງຮ້ານຕ່າງໆຢູ່ພາຍໃນເມືອງ ເພື່ອປົກປ້ອງຜູ້ຊົມໃຊ້ ແລະ ຜູ້ບໍລິໂພກຢູ່ພາຍໃນເມືອງ.
