ອົດສະຕຣາລີ ເລັ່ງແກ້ໄຂບັນຫາຂາດແຄນແຮງງານແບບມືອາຊີບ
ສຳນັກຂ່າວ ຊິນຮວາ ລາຍງານໃນ ວັນທີ 7 ຕຸລາ 2022 ໃຫ້ຮູ້ວ່າ: ອົດສະຕຣາລີ ພວມຂາດແຄນແຮງງານ ທີ່ມີຄວາມຮູ້ຄວາມສາມາດ ແບບມືອາຊີບ ຈຳນວນ 286 ອາຊີບ, ໃນປີນີ້ ເພີ່ມຂຶ້ນ 153 ອາຊີບ ເມື່ອທຽບໃສ່ປີກາຍນີ້ ໂດຍອາຊີບ ທີ່ຕ້ອງການ ພະນັກງານ ຫລາຍທີ່ສຸດ ແມ່ນພະຍາບານ ມືອາຊີບ, ວິສະວະກອນ ຊອບແວ, ພະນັກງານເບິ່ງແຍງ, ຜູ້ຈັດການກໍ່ສ້າງ, ພະນັກງານ ລ້ຽງເດັກ ແລະ ຊ່າງກົນຈັກ.
ຂະນະທີ່ ທ່ານ ແອນໂທນີ ອັລບານີສ ( Anthony Albanese), ນາຍົກ ລັດຖະມົນຕີ ອົດສະຕຣາລີ ໄດ້ກ່າວເຖິງ ເລື່ອງນີ້ວ່າ: ລັດຖະບານ ກຽມເພີ່ມງົບປະມານສະໜັບສະໜູນ ການຈັດຝຶກອົບຮົມ ແລະ ການຝຶກວິຊາຊີບຕ່າງໆ ໃຫ້ຫລາຍຂຶ້ນ ເພື່ອແກ້ໄຂ ບັນຫາດັ່ງກ່າວຢ່າງຮີບດ່ວນ.ໃນເດືອນກັນຍາ ຜ່ານມາ ລັດຖະບານອົດສະຕຣາລີ ປະກາດ ເພີ່ມໂຄຕ້າ ການຮັບຜູ້ອົບພະຍົບ ຖາວອນ ທີ່ມີຄວາມຮູ້ຄວາມສາມາດດ້ານວຽກງານຕ່າງໆ ໃຫ້ຫລາຍຂຶ້ນ ຈາກ 160.000 ຄົນ ມາເປັນ 195.000 ຄົນ ເພື່ອເພີ່ມ ແຮງງານທີ່ຂາດແຄນ ໃນປັດຈຸບັນ.
