ຮົງກົງກຽມແຈກປີ້ເຮືອບິນຟຣີ 5 ແສນບ່ອນນັ່ງ ຫວັງກະຕຸ້ນອຸດສາຫະກຳທ່ອງທ່ຽວ ຫລັງຫລຸດຜ່ອນມາດຕະການໂຄວິດ

ຄະນະກຳມະການການທ່ອງທ່ຽວຮົງກົງເປີດເຜີຍວ່າ: ຈະດຳເນີນການແຈກປີ້ເຮືອບິນຈຳນວນ 5 ແສນບ່ອນນັ່ງ ມູນຄ່າ 2 ພັນກວ່າລ້ານໂດລາຮົງກົງ ເພື່ອພະຍາຍາມກະຕຸ້ນອຸດສາຫະກຳທ່ອງທ່ຽວ ເຊິ່ງໄດ້ຮັບຜົນກະທົບຢ່າງໜັກຈາກສະຖານະການໂຄວິດຜ່ານມາ.

ທ່າທີດັ່ງກ່າວມີຂຶ້ນຫລັງຈາກທາງການຮົງກົງເລີ່ມຫລຸດຜ່ອນມາດຕະການຄວບຄຸມ ແລະ ປ້ອງກັນໂຄວິດໃນໄລຍະຜ່ານມາ.

ຂະນະທີ່ທ່ານ Dane Cheng ກຳມະການບໍລິຫານຂອງຄະນະກຳມະການການທ່ອງທ່ຽວຮົງກົງ ເປີດເຜີຍວ່າ: “ເຈົ້າໜ້າທີ່ສະໜາມບິນຈະເຮັດຂໍ້ຕົກລົງກັບບໍລິສັດສາຍການບິນໃຫ້ສຳເລັດ ແລະ ເມື່ອລັດຖະບານປະກາດວ່າຈະຍົກເລີກມາດຕະການຄວບຄຸມໂຄວິດທັງໝົດສຳລັບຜູ້ເດີນທາງຂາເຂົ້າ ພວກເຮົາຈະເປີດຕົວໂຄງການໂຄສະນາສຳລັບການແຈກປີ້ເຮືອບິນຟຣີ”.

ສຳລັບປີ້ເຮືອບິນຟຣີດັ່ງກ່າວຄືປີ້ທີ່ຖືກຊື້ໄວ້ໂດຍທາງການຮົງກົງ ເພື່ອສະໜັບສະໜູນການບິນຕ່າງໆ ໃນໄລຍະທີ່ວິກິດໂຄວິດລະບາດໜັກ ແລະ ຈະມີການແຈກຟຣີໃຫ້ຜູ້ໂດຍສານທັງຂາເຂົ້າ ແລະ ຂາອອກໃນປີໜ້າ ໂດຍໜ່ວຍງານສະໜາມບິນຈະເປັນຜູ້ຮັບຜິດຊອບ.

ໂດຍວັນທີ 5 ຕຸລາຜ່ານມາ, ສາຍການບິນ Virgin Atlantic ຂອງອັງກິດ ເປີດເຜີຍວ່າ: ຈະໂຈະການໃຫ້ບໍລິການໃນຮົງກົງ ດ້ວຍເຫດຜົນທີ່ເຊື່ອມໂຍງກັບສະຖານະການສົງຄາມໃນອູແກຣນ.

ກ່ອນໜ້ານີ້ ຮົງກົງເປັນເຂດປົກຄອງພິເສດຂອງຈີນ ຖືເປັນໜຶ່ງໃນດິນແດນທີ່ມີການເຂັ້ມງວດມາດຕະການໂຄວິດຫລາຍທີ່ສຸດ ເຊິ່ງເປັນໄປຕາມນະໂຍບາຍຄວບຄຸມໂຄວິດເປັນສູນ ຫລື Zero-COVID ຈົນໃນເດືອນກັນຍາຜ່ານມາ ລັດຖະບານຮົງກົງໄດ້ເລີ່ມປະກາດຫລຸດຜ່ອນມາດຕະການ ໂດຍຜູ້ທີ່ເດີນທາງເຂົ້າຮົງກົງບໍ່ຕ້ອງກັກຕົວ ຫລື ສະແດງຜົນກວດເຊື້ອເປັນລົບກ່ອນຂຶ້ນເຮືອບິນ.

ອ້າງອີງ:

https://www.bbc.com/news/business-63153795