ອັດຕາເງິນເຟີ້ຂອງ ສປປ ລາວ ປະຈຳເດືອນ ກັນຍາ 2022 ພຸ່ງ 34,05%

ຕາມການລາຍງານຂອງສູນ ສະຖິຕິແຫ່ງຊາດ ວັນທີ 6 ຕຸລາ 2022 ນີ້ໃຫ້ຮູ້ວ່າ: ອັດຕາເງິນເຟີ້ລວມ ເດືອນກັນຍາ 2022 ທຽບ ປີຕໍ່ປີ ຫຼື ທຽບກັບເດືອນດຽວກັນຂອງປີຜ່ານມາ ແມ່ນຍັງມີທ່າອ່ຽງ ເພີ່ມຂຶ້ນຕໍ່ເນື່ອງ ຢູ່ໃນລະດັບ 34,05% (ເດືອນສິງຫາ 2022 ແມ່ນ 30,01).

ເນື່ອງຈາກການເພີ່ມສູງຂຶ້ນທຸກໝວດສິນຄ້າຂອງດັດຊະນີ ເປັນຕົ້ນແມ່ນ:

ໝວດສະບຽງອາຫານ ແລະເຄື່ອງດື່ມບໍ່ແມ່ນເຫຼົ້າ ເພີ່ມຂຶ້ນ 35,5% ໂດຍມາ ຈາກການເພີ່ມສູງຂຶ້ນຂອງລາຄາເຂົ້າສານ, ຊີ້ນປະເພດຕ່າງໆ ໂດຍສະເພາະແມ່ນຊີ້ນຫມູ, ສັດປີກ, ປາ ແລະ ອາຫານ ທະເລ, ໄຂ່, ນໍ້າມັນພືດ, ໝາກໄມ້, ຜັກສົດ ເປັນຕົ້ນ.

ໝວດຄົມມະນາຄົມ ແລະຂົນສົ່ງເພີ່ມຂຶ້ນ 51,7% ໂດຍ ສະເພາະລາຄານ້ໍາມັນເຊື້ອໄຟຍັງເພີ່ມຂຶ້ນເຖີງ 102,4%, ພາຫະນະການຂົນສົ່ງ ແລະອາໄຫລ່ລົດຍົນຍັງມີລາຄາເພີ່ມສູງ.

ນອກນັ້ນ, ສິນຄ້າອຸປະໂພກ-ບໍລິໂພກອຶ່ນໆ ຍັງມີທ່າອ່ຽງເພີ່ມຂຶ້ນເຊັ່ນດຽວກັນ ເຊັ່ນ: ເຫຼົ້າ ແລະຢາສູບ, ເຄື່ອງນຸ່ງ ແລະເກີບ, ເຄື່ອງກໍ່ສ້າງ ແລະອຸປະກອນສ້ອມແປງເຮືອນ, ເຄື່ອງໃຊ້ໃນເຮືອນ, ຮັກສາສຸຂະພາບ ແລະຢາ, ການສຶກສາ.

ບັນເທີງພັກຜ່ອນ ແລະເຄື່ອງໃຊ້ສ່ວນຕົວຍ້ອນການອ່ອນຄ່າຂອງເງິນກີບ, ຂະນະດຽວກັນ ຄໍາຮູບປະພັນ ທຽບກັບ ໄລຍະດຽວກັນກັບເດືອນຜ່ານມາ ມີທ່າອ່ຽງຫຼຸດລົງເລັກນ້ອຍ -1,0%.

ປັດໄຈ ແລະສາຍເຫດຂອງອັດຕາເງິນເຟີ້ ເດືອນກັນຍາ 2022 ເພີ່ມສູງຂຶ້ນແມ່ນມາຈາກບາງປັດໄຈດັ່ງນີ້:

ປັດໄຈພາຍນອກ:

– ຜົນກະທົບການແພ່ລະບາດ ຂອງ ໂຄວິດ-19 ທີ່ແກ່ຍາວ ແລະແພ່ລາມໄປທົ່ວໂລກ ສົ່ງຜົນເຮັດໃຫ້ລະບົບເສດຖະກິດຫຼາຍປະເທດມີລັກສະນະທົດຖອຍ;

– ສະພາບ ຄວາມບໍ່ສະຫງົບທາງດ້ານການເມືອງ ແລະການຂັດແຍ່ງ ທາງການທະຫານ ຂອງປະເທດມະຫາອໍານາດໃນໂລກ ເຮັດໃຫ້ຫຼາຍປະເທດໄດ້ຮັບຜົນກະທົບທາງກົງ ແລະທາງອ້ອມ;

– ສະພາບການຂອງພາກພື້ນ ແລະ ສາກົນ ຍັງສືບຕໍ່ຜັນແປຢ່າງສັບສົນ ທີ່ຄາດຄະເນໄດ້ຍາກ ເຊິ່ງຈະສົ່ງຜົນກະທົບທາງກົງ ແລະທາງອ້ອມຕໍ່ສະພາບເສດຖະກິດ;

ປັດໄຈພາຍໃນ:

ຖານການຜະລິດພາຍໃນປະເທດແມ່ນຍັງບໍ່ທັນເຂັ້ມແຂງ, ສ່ວນຫຼາຍແມ່ນນໍາເຂົ້າຈາກຕ່າງປະເທດ ເຮັດໃຫ້ມີ ຕົ້ນທຶນສູງຂຶ້ນ; ສະພາບອັດຕາແລກປ່ຽນ, ການອ່ອນຄ່າຂອງເງິນກີບທຽບໃສ່ເງິນຕາຕ່າງປະເທດແມ່ນຍັງອ່ອນຄ່າລົງ ສົ່ງຜົນໃຫ້ລາຄາສິນຄ້າປະເພດນໍາເຂົ້າມີລາຄາສູງຂຶ້ນ;

– ລາຄານ້ໍາມັນເຊື້ອໄຟ ແມ່ນຍັງມີການເຫນັງຕີງເພີ່ມສູງຂຶ້ນ ສົ່ງຜົນກະທົບໃສ່ຄ່າຄອງຊີບເພີ່ມຂຶ້ນສູງ ແລະ ເຮັດໃຫ້ໝວດສິນຄ້າອື່ນໆເພີ່ມຂຶ້ນຍ້ອນຕົ້ນທຶນການຜະລິດສິນຄ້າ ແລະ ບໍລິການເພີ່ມຂຶ້ນ;

– ປັດໄຈອື່ນໆ ເຊັ່ນ: ການຜະລິດກະສິກໍາ ແມ່ນຢູ່ໃນຊ່ວງລະດູການທີ່ຜະລິດທີພົບບັນຫາຈາກໄພທໍາມະຊາດ(ຝົນຕົກ, ນ້ໍາຖ້ວມ).

ລະອຽດການປ່ຽນແປງຂອງລາຄາສິນຄ້າ ແລະບໍລິການ ໃນແຕ່ລະໝວດມີດັ່ງນີ້:

ສະພາບລາຄາສິນຄ້າ ແລະບໍລິການ ເດືອນກັນຍາ 2022 ທຽບກັບເດືອນຜ່ານມາ ເພີ່ມຂຶ້ນ 3,6% (ເດືອນສິງຫາ 2022 ແມ່ນ 4,1%) ມີລະອຽດດັ່ງນີ້:

• ໝວດອາຫານ ແລະ ເຄື່ອງດື່ມບໍ່ມີທາດເຫຼົ້າ: ເພີ່ມຂຶ້ນ 4,9% ໃນນີ້ ລາຄາເຂົ້າສານ ເພີ່ມຂຶ້ນ 8,8%, ເຂົ້າຈີ່ ແລະ ທາດແປ້ງເພີ່ມຂຶ້ນ 6,3%, ຊີ້ນເພີ່ມຂຶ້ນ 1,8% ໃນນັ້ນ, ຊີ້ນໝູເພີ່ມຂຶ້ນ 1,9%, ຊີ້ນງົວ ແລະຄວາຍ ເພີ່ມຂຶ້ນ 1,4%, ສັດປີກ ເພີ່ມຂຶ້ນ 2,4%, ປາ ແລະອາຫານທະເລ ເພີ່ມຂຶ້ນ 3,4%, ນົມເນີຍ ແລະ ໄຂ່ເພີ່ມຂຶ້ນ 5,8%,
• ໝາກໄມ້ເພີ່ມຂຶ້ນ 4,8% ຜັກສົດ ເພີ່ມຂຶ້ນ 5,1% ແລະ ເຄື່ອງດື່ມບໍ່ມີທາດເຫຼົ້າ ເພີ່ມຂຶ້ນ 6,1%; ໝວດເຫຼົ້າ ແລະຢາສູບ: ເພີ່ມຂຶ້ນ 1,5% ໃນນີ້ ລາຄາເຫຼົ້າ ເພີ່ມຂຶ້ນ 1,4%, ວາຍເພີ່ມຂຶ້ນ 0,9%, ເບຍເພີ່ມ ຂຶ້ນ 3,0%;
• ໝວດເຄື່ອງນຸ່ງຫົ່ມ ແລະເກີບ: ເພີ່ມຂຶ້ນ 1,2% ໃນນີ້ ລາຄາເຄື່ອງນຸ່ງຊາຍ ເພີ່ມຂຶ້ນ 1,8%, ເຄື່ອງນຸ່ງຍິງ ເພີ່ມຂຶ້ນ 0,8%, ເກີບ ເພີ່ມຂຶ້ນ 7,1%;
• ໝວດທີ່ພັກອາໄສ, ໄຟຟ້າ, ນ້ໍາປະປາ ແລະເຊຶ້ອເພີງຫຸງຕົ້ມ: ເພີ່ມຂຶ້ນ 2,3% ໃນນີ້ ລາຄາ ອຸປະກອນການນໍາ ່ລຸງຮັກສາ ແລະສ້ອມແປງ ເພີ່ມຂຶ້ນ 5,3%, ຄ່າແຮງງານກໍ່ສ້າງເພີ່ມຂຶ້ນ 1,7%, ຄ່າເຂົ້າເຮືອນ ເພີ່ມຂຶ້ນ 0,8%, ແກັສ໌ຫຸງຕົ້ມ ແລະເຊື້ອເພີງ ເພີ່ມຂຶ້ນ 2,2%;
• ໝວດເຄື່ອງໃຊ້ໃນເຮືອນ: ເພີ່ມຂຶ້ນ 3,6% ໃນນີ້ ລາຄາ ເຄື່ອງຕົບແຕ່ງພາຍໃນເຮືອນ ເພີ່ມຂຶ້ນ 2,5%, ເຄື່ອງ ເຟີນີເຈີ ແລະເຄື່ອງໃຊ້ໃນເຮືອນ ເພີ່ມຂຶ້ນ 3,3%, ເສື້ອ ແລະຜ້າປູພື້ນເພີ່ມຂຶ້ນ 1,8%, ເຄື່ອງໃຊ້ສ່ວນຕົວ ແລະເຄື່ອງນອນ ເພີ່ມຂຶ້ນ 1,8%, ເຄື່ອງໃຊ້ຄົວເຮືອນ ເພີ່ມຂຶ້ນ 4,3%, ເຄື່ອງໃຊ້ເຮືອນປະຈໍາວັນ ເພີ່ມຂຶ້ນ 5,0%, ອຸປະກອນປະດັບເຮືອນ ເພີ່ມຂຶ້ນ 3,4%;
• ໝວດຮັກສາສຸຂະພາບ ແລະຢາ: ເພີ່ມຂຶ້ນ 4,9% ໃນນີ້ ລາຄາຢາ ເພີ່ມຂຶ້ນ 5,8%, ການບໍລິການ ຄົນເຈັບ ພາຍນອກ ເພີ່ມຂຶ້ນ 2,0%, ໃນນີ້ ການບໍລິການກວດເຊັກຫົວໃຈ ແລະວັດຄວາມດັນເລືອດເພີ່ມຂຶ້ນ 5,9%;
• ໝວດຄົມມະນາຄົມ ແລະຂົນສົ່ງ: ເພີ່ມຂຶ້ນ 2,9% ໃນນີ້ ພາຫະນະຂົນສົ່ງ ເພີ່ມຂຶ້ນ 3,0%, ປະເພດລົດໃຫຍ່ ເພີ່ມຂຶ້ນ 3,6%, ລົດຖີບ ເພີ່ມຂຶ້ນ 0,8%, ອຸປະກອນການຂົນສົ່ງ ເພີ່ມຂຶ້ນ 3,0%, ເຄື່ອງອາໄຫຼ່ ແລະການ ສ້ອມແປງ ເພີ່ມຂຶ້ນ 4,2%, ນ້ໍາມັນເຊື່ອໄຟ ເພີ່ມຂຶ້ນ 2,2%, ການບໍລິການຂົນສົ່ງ ເພີ່ມຂຶ້ນ 1,3%;
• ໝວດໄປສະນີ ແລະໂທລະຄົມມະນາຄົມ: ເພີ່ມຂຶ້ນ 4,3% ໃນນີ້ ລາຄາໂທລະສັບເພີ່ມຂຶ້ນ 4,3, ເຊັ່ນ:ໂທລະສັບ ໂນເກຍ, ຊໍາຊຸງ, ໄອໂມບາຍ ເພີ່ມຂຶ້ນ 2,3%, 9,8% ແລະ 1,7% ຕາມລໍາດັບ;
• ໝວດບັນເທີງ ແລະການພັກຜ່ອນ: ເພີ່ມຂຶ້ນ 1,0% ໃນນີ້ ລາຄາໂທລະທັດ ເພີ່ມຂຶ້ນ 4,1%, ປະເພດ ຄອມພີວເຕີ ເພີ່ມຂຶ້ນ 1,4%, ປະເພດເຄື່ອງຂຽນ ເພີ່ມຂຶ້ນ 1,5;
• ໝວດການສຶກສາ: ເພີ່ມຂຶ້ນ 1,2% ໃນນີ້ ລາຄາ ຄ່າຮຽນ ອະນຸບານ, ປະຖົມ ແລະມັດທະຍົມຕົ້ນ ເພີ່ມຂຶ້ນ 2,1%, ເຄື່ອງແບບນັກຮຽນ ເພີ່ມຂຶ້ນ 2,2%;
• ໝວດຮ້ານອາຫານ ແລະໂຮງແຮມ: ເພີ່ມຂຶ້ນ 2,4% ໃນນີ້ ລາຄາອາຫານ ແລະເຄື່ອງດື່ມ ໃນຮ້ານອາຫານ ເພີ່ມຂຶ້ນ 2,5% ເຊັ່ນ: ລາບຊີ້ນງົວ, ເຂົ້າພັດ, ເຝີ, ເຂົ້າປຽກ, ເບຍ, ວາຍ ແລະ ວິສ໌ກີ; ປະເພດເຮືອນພັກ ແລະ ໂຮງແຮມ ເພີ່ມຂຶ້ນ 1,4%;
• ໝວດສິນຄ້າ ແລະບໍລິການອື່ນໆ: ເພີ່ມຂຶ້ນ 0,4% ໃນນີ້ ເຄື່ອງໃຊ້ປະຈໍາວັນ ເພີ່ມຂຶ້ນ 6,0%, ຂະນະດຽວ ກັນ ລາຄາວັດຖຸມີຄ່າ ແລະເຄື່ອງປະດັບ ມີທ່າອ່ຽງຫຼຸດລົງເລັກໜ້ອຍ -0,2%, ໃນນັ້ນ ລາຄາຄໍາຮູບປະພັນຫຼຸດລົງ -1,0%.