ຊາຍໜຸ່ມນັກຂີ່ລົດຖີບອອກມາເຕືອນເຖິງສາຍປາຕີ້ ຫາກເມົາແລ້ວໃຫ້ນອນຢ່າພາກັນຂັບລົດ ສ້າງຄວາມເດືອດຮ້ອນຄົນອື່ນ

ວັນທີ 6 ຕຸລາ 2022 ນີ້ ຜູ້ໃຊ້ເຟສບຸກທ່ານໜຶ່ງ Kheiw Chanthvong ອອກມາໂພສເຕືອນບັນຫາສາຍປາຕີ້ທັງຫລາຍ ທີ່ມັກຂັບຂີ່ລົກເວລາເມົາວ່າ: ຢາກຝາກເຕືອນຄົນທີ່ໄປຫລິ້ນເດິກໆແລ້ວກັບແຈ້ງແນ່ເດີ້ ຖ້າບໍ່ສາມາດແບກສັງຂານໂຕເອງກັບບ້ານໃຫ້ປອດໄພໄດ້ກາຢ່າກັບ ຮັບຜິດຊອບໂຕເອງບໍ່ຫລ້ອນກາຢ່າມາເຮັດໃຫ້ຄົນອື່ນເດືອນຮ້ອນ ຄົນເຂົາມາອອກກຳລັງກາຍກາຍັງໄປຕຳເອົາເຂົາ

ພ້ອມລະບຸເຖິງເຫດການອຸບັດເຫດທີ່ເກີດຂຶ້ນວ່າ: “ມື້ນີ້ 06 ຕຸລາ 2022 ເວລາ 05:45 ມີຜູ້ຍິງຂັບລົດກະບະມາຕຳເອົາລົດຖີບຢູ່ເສັ້ນທາງວຽງຈະເລີນ ຜູ້ຂັບມີອາການເມົາ ເວົ້າບໍ່ຮູ້ເລື່ອງ ຜູ້ຖືກຕຳແມ່ນບາດເຈັບເລັກໜ້ອຍ ແຕ່ລົດຖີບສາຍຫາຍໜັກ

ຈັ່ງໃດກາຂໍໃຫ້ພາກັນຂີ່ລົດຢ່າງມີສະຕິ ຊິໄປເມົາໃສບໍ່ມີໃຜຫ້າມ ແຕ່ຮັບຜິດຊອບໂຕເອງໃຫ້ມັນຫຼ້ອນກ່ອນ ຖ້າພວກຂ່ອຍບໍ່ຫັນຫລັງເບິ່ງກ່ອນກາຄືຊິແມ່ນຕຳພວກຂ້ອຍພິແຫລະ”

ນີ້ແມ່ນພຽງເຫດການໜຶ່ງທີ່ເກີດຂຶ້ນ ອັນເປັນບັນຫາ ແລະ ປາກົດການຫຍໍ້ທໍ້ຂອງສັງຄົມໃນປັດຈຸບັນ ເນື່ອງຈາກມີການດື່ມນໍ້າເມົາແລ້ວຂັບຂີ່ລົດ ລະເມີດກົດຈະລາຈອນ ສົ່ງຜົນໃຫ້ເກີດອຸບັດເຫດໃນແຕ່ລະເດືອນມີສະຖິຕິສູງສົມຄວນ.

ເຫດການຄັ້ງນີ້ ບໍ່ໄດ້ເຮັດໃຫ້ມີການເສຍຊີວິດ ຫລື ບາດເຈັບໜັກ ແຕ່ມັນກໍເສຍຄວາມຮູ້ສຶກ, ເສຍເວລາ ແລະ ຄະດີໄດ້ມີການໄກ່ເກ່ຍກັນດ້ວຍດີ ແຕ່ກໍບໍ່ຢາກໃຫ້ບັນຫານີ້ເກີດຂຶ້ນຊໍ້າຊາກ