UNCTAD ເຕືອນເສດຖະກິດໂລກກຳລັງຖົດຖອຍ ຈະຂະຫຍາຍຕົວພຽງ 2,5%
October 5, 2022 - 5:50 PM
ຂ່າວຕ່າງປະເທດລາຍງານ ເມື່ອວັນທີ 4 ຕຸລາທີ່ຜ່ານມານີ້, ກອງປະຊຸມສະຫະປະຊາຊາດວ່າດ້ວຍການຄ້າ ແລະ ການພັດທະນາ (UNCTAD) ໄດ້ເປີດເຜີຍບົດລາຍງານວ່າ ການບັງຄັບໃຊ້ນະໂຍບາຍທາງດ້ານການເງິນຂອງກຸ່ມປະເທດທີ່ພັດທະນາແລ້ວ ມີຄວາມສ່ຽງທີ່ຈະຊຸກຍູ້ໃຫ້ເສດຖະກິດໂລກເຂົ້າສູ່ພາວະຖົດຖອຍ ແລະ ພາວະການຂະຫຍາຍຕົວຊ້າລົງ ສ້າງຄວາມເສຍຫາຍທີ່ຮ້າຍແຮງຍິ່ງກວ່າວິກິດການເງິນເມື່ອປີ 2008 ແລະ ຜົນກະທົບຈາກການແຜ່ລະບາດຂອງພະຍາດໂຄວິດ-19.
ບົດລາຍງານວ່າດ້ວຍການຄ້າ ແລະ ການພັດທະນາປະຈຳປີ 2022 ຂອງ UNCTAD ລະບຸວ່າ ການປັບເພີ່ມອັດຕາດອກເບ້ຍທີ່ວ່ອງໄວ ແລະ ການໃຊ້ມາດຕະການທາງດ້ານການເງິນໃນກຸ່ມປະເທດທີ່ພັດທະນາແລ້ວບວກກັບວິກິດຈາກການແຜ່ລະບາດຂອງພະຍາດໂຄວິດ-19 ແລະ ສະຖານະການໂລກໃນປັດຈຸບັນເຮັດໃຫ້ການຫຼຸດລົງຂອງເສດຖະກິດທົ່ວໂລກກາຍເປັນພາວະຂາລົງ ໂດຍບໍ່ມີທ່າອ່ຽງຫຼຸດລະດັບລົງຕາມທີ່ຄາດຄະເນໄວ້. ບັນດາທະນາຄານກາງບໍ່ສາມາດບັນລຸເປົ້າໝາຍອັດຕາເງິນເຟີ້ ແລະ ສ້າງການຂະຫຍາຍຕົວທາງດ້ານເສດຖະກິດທີ່ມີຄຸນນະພາບທີ່ດີຂຶ້ນຢ່າງຕໍ່ເນື່ອງໃນໄລຍະທົດສະວັດຂອງອັດຕາດອກເບ້ຍຕ່ຳເປັນພິເສດ. ການໃຊ້ມາດຕະການທາງດ້ານການເງິນເກີນຄວາມຈຳເປັນອາດຈະນຳມາສູ່ພາວະການຂະຫຍາຍຕົວຊ້າ ແລະ ຄວາມບໍ່ໝັ້ນຄົງທາງດ້ານເສດຖະກິດ ຂະນະທີ່ເກີດພາວະຄ່າຈ້າງຫຼຸດລົງ ການແປປ່ວຍທາງດ້ານການເງິນລວມເຖິງການສະໜັບສະໜູນ ແລະ ການປະສານງານແບບພະຫຸພາຄີບໍ່ພຽງພໍ.
UNCTAD ໄດ້ຄາດຄະເນວ່າ ເສດຖະກິດໂລກຈະຂະຫຍາຍຕົວພຽງ 2,5% ໃນປີນີ້ ໂດຍການຫຼຸດລົງຂອງເສດຖະກິດທີ່ເກີດຂຶ້ນພ້ອມກັນກຳລັງສົ່ງຜົນກະທົບຕໍ່ພາກພື້ນ ໂດຍສະເພາະກຸ່ມປະເທດທີ່ກຳລັງພັດທະນາ ຊຶ່ງຄາດວ່າອັດຕາການຂະຫຍາຍຕົວສະເລ່ຍຈະຫຼຸດລົງຕ່ຳກວ່າ 3% ສົ່ງຜົນກະທົບຕໍ່ການເງິນພາກລັດ ແລະ ເອກະຊົນລວມເຖິງໂອກາດໃນການຈ້າງງານແມ່ນຫຍຸ້ງຍາກຫຼາຍຂຶ້ນ.
ທ່ານນາງ ຣີເບກາ ກຣິນສະແປນ ເລຂາທິການ UNCTAD ກ່າວວ່າ: ຍັງພໍມີເວລາທີ່ຈະເຮັດໃຫ້ເສດຖະກິດໂລກບໍ່ຕົກຕ່ຳສູ່ພາວະຖົດຖອຍດ້ວຍເຄື່ອງມືທີ່ຈະຫຼຸດອັດຕາເງິນເຟີ້ ແລະ ສະໜັບສະໜູນກຸ່ມທີ່ໄດ້ຮັບຜົນກະທົບທັງໝົດ ອີກຢ່າງໜຶ່ງແນວທາງຂອງມາດຕະການໃນປັດຈຸບັນກຳລັງສົ່ງຜົນເສຍຕໍ່ກຸ່ມທີ່ໄດ້ຮັບຜົນກະທົບຫຼາຍທີ່ສຸດ ໂດຍສະເພາະກຸ່ມປະເທດກຳລັງພັດທະນາ ແລະ ເພີ່ມຄວາມສ່ຽງນຳພາເສດຖະກິດເຂົ້າສູ່ພາວະຖົດຖອຍທົ່ວໂລກ.
ຂ່າວ: ປະຊາຊົນ
