ສະຖານີລົດໄຟລາວ-ຈີນ ໃຊ້ລະບົບຈັບເວລາລົດເຂົ້າ-ອອກສະຖານີ ແລະ ກຳນົດເກັບຄ່າບໍລິການຝາກລົດໃນລາຄາໃໝ່

ວັນທີ 5 ຕຸລາ 2022 ນີ້, ບໍລິສັດ ຮັບເໝົາສຳປະທານເກັບຄ່າບໍລິການຝາກລົດ ແລະ ຫ້ອງນ້ຳນອກອາຄານ ຢູ່ສະຖານີລົດໄຟລາວ-ຈີນ ນະຄອນຫຼວງວຽງຈັນ ໃຫ້ຮູ້ວ່າ: ປັດຈຸບັນທາງບໍລິສັດໄດ້ຕິດຕັ້ງລະບົບອຸປະກອນການຄິດໄລ່ຄ່າຈອດລົດຕາມເວລາເຂົ້າ-ອອກສະຖານີ ແລະ ຈັດສັນເລນຈອດລົດຊົ່ວຄາວເພື່ອຮັບ-ສົ່ງຜູ້ໂດຍສານສຳເລັດເປັນທີ່ຮຽບຮ້ອຍແລ້ວ.

ລົດທຸກໆຄັນທຸກໆປະເພດທີ່ເຂົ້າມາຜ່ານປ້ອມຢູ່ໜ້າສະຖານີຈະມີພະນັກງານບໍລິການຈີກປີ້ທີ່ມີໂມງເວລາກຳກັບຢູ່ໃນປີ້ໃຫ້ ແລະ ກວດປີ້ເວລາລົດກັບອອກຈາກສະຖານີ ໂດຍມີມາດຕະການດັ່ງນີ້:

• ສໍາລັບລົດທີ່ເຂົ້າມາຮັບ-ສົ່ງຜູ້ໂດຍສານບໍ່ເກີນ 10 ນາທີ ແມ່ນຈະບໍ່ໄດ້ເສຍເງິນ
• ຖ້າຄັນໃດເຂົ້າໄປແລ້ວຈອດເກີນ 10 ນາທີ ແມ່ນມີການເກັບຄ່າບໍລິການ ຕາມປະເພດລົດຄື: ລົດຈັກ 3000ກີບ, ລົດສາມລໍ້ 5.000ກີບ, ລົດຕ່ຳກ່ວາ 7 ບ່ອນນັ່ງ 10.000 ກີບ, ລົດສອງແຖວ 15.000ກີບ, ລົດຕູ້ 20.000ກີບ ແລະ ລົດເມ 25ບ່ອນນັ່ງຂຶ້ນໄປ 30.000ກີບ/ຄັນ/ຄັ້ງ.
• ສໍາລັບລົດໂດຍສານຂອງບັນດາສະມາຄົມນະຄອນຫລວງວຽງຈັນ ທາງບໍລິສັດໄດ້ມີນະໂຍບາຍບໍລິການ ເກັບຄ່າຈອດລົດແບບມອບເໝົາລາຍເດືອນ.
• ຄ່າບໍລິການຫ້ອງນ້ຳຢູ່ດ້ານນອກອາຄານສະຖານີລົດໄຟແມ່ນ 3.000 ກີບ/ຄົນ/ຄັ້ງ.
• ສຳລັບການບໍລິການຈອດລົດຄ້າງຄືນຍັງບໍ່ທັນເປີດນຳໃຊ້ເທື່ອ