ສປປ ເກົາຫລີ ທົດລອງຍິງລູກສອນໄຟຜ່ານນ່ານຟ້າຍີ່ປຸ່ນ ໄຊເຣນດັງເຕືອນປະຊາຊົນຫາບ່ອນຫລົບໄພ

ວັນທີ 4 ຕຸລາ 2022, ສຳນັກຂ່າວຕ່າງປະເທດລາຍງານວ່າ: ທາງການ ສປປ ເກົາຫລີ ທົດລອງຍິງລູກສອນໄຟຜ່ານນ່ານຟ້າຍີ່ປຸ່ນ ເປັນເຫດໃຫ້ໄຊເຣນເຕືອນໄພດັງຂຶ້ນ ເຕືອນປະຊາຊົນທາງຕອນເໜືອຂອງປະເທດຫາບ່ອນຫລົບໄພ ຖ້າເກີດສະຖານະການສຸກເສີນ. ຖືເປັນການທົດລອງຍິງລູກສອນໄຟຄັ້ງທີ 5 ໃນຮອບ 10 ວັນ.

ລູກສອນໄຟດັ່ງກ່າວຖືກກວດຈັບໄດ້ໂດຍກອງກຳລັງແຄມຝັ່ງຂອງຍີ່ປຸ່ນ ແລະ ເຈົ້າໜ້າທີ່ທາງການຂອງ ສ.ເກົາຫລີ. ສ່ວນນາຍົກລັດຖະມົນຕີ ຟູມິໂອະ ຄິຊິດະ ຂອງຍີ່ປຸ່ນ ປະນາມການທົດລອງລູກສອນໄຟດັ່ງກ່າວ. ຂະນະທີ່ປະທານາທິບໍດີ ຢຸນຊອກຢໍ ຂອງ ສ.ເກົາຫລີ ເຕືອນ ສປປ ເກົາຫລີ ເຖິງມາດຕະການຕອບໂຕ້ທີ່ອາດຈະເກີດຂຶ້ນ ພາຍຫລັງຍິງທົດລອງລູກສອນໄຟເລື້ອຍໆ.

ສຳນັກຂ່າວທ້ອງຖິ່ນຂອງຍີ່ປຸ່ນ NHK ລາຍງານວ່າ: ລູກສອນໄຟດັ່ງກ່າວລອຍຂຶ້ນໄລຍະທາງເກືອບ 4.000 ກິໂລແມັດ ໃນລະດັບຄວາມສູງ 1.000 ກິໂລແມັດ ກ່ອນຈະຕົກລົງສູ່ມະຫາສະໝຸດປາຊີຟິກ ຫລັງລອຍຢູ່ໃນອາກາດປະມານ 22 ນາທີ ໂດຍຍິງຈາກຖານຍິງທາງຕອນເໜືອຂອງ ສປປ ເກົາຫລີ ຕິດກັບຊາຍແດນປະເທດຈີນ.

ສປປ ເກົາຫລີ ຍິງທົດລອງລູກສອນໄຟຕໍ່ເນື່ອງ ໃນໄລຍະເວລາດຽວກັບກອງທັບອາເມລິກາ ແລະ ສ.ເກົາຫລີ ຊ້ອມຮົບຮ່ວມກັນ, ຫລາຍຝ່າຍເບິ່ງວ່າການທົດລອງດັ່ງກ່າວເປັນໄປເພື່ອສະແດງແສນຍານຸພາບ ແລະ ກົດດັນໃຫ້ອາເມລິກາ ແລະ ບັນດາປະເທດຕ່າງໆໃນປະຊາຄົມໂລກຍອມຮັບ ສປປ ເກົາຫລີ ໃນຖານະລັດນິວເຄຼຍ (Nuclear State).

ອ້າງອີງ:

https://www.aljazeera.com/…/north-korea-fires-ballistic…

https://www.bbc.com/news/world-asia-63126534

https://www.reuters.com/…/nkorea-fires-missile-towards…/