ການກະເຫລີມສະຫລອງວັນຄູຕ້ອງໃຫ້ໄດ້ເນື້ອໃນຄວາມໝາຍຄວາມສຳຄັນ ແລະ ປະຢັດມັດທະຍັດ
October 4, 2022 - 11:28 AM
ວັນທີ 30 ກັນຍາ 2022 ຜ່ານມານີ້ ຫ້ອງການກະຊວງສຶກສາທິການ ແລະ ກິລາ ອອກແຈ້ງການ ກ່ຽວກັບການຈັດຕັ້ງສະເຫລີມສະຫລອງວັນຄູແຫ່ງຊາດ 7 ຕຸລາ ຄົບຮອບ 28 ປີ (7/10/1994-7/10/2022) ມີເນື້ອໃນ ແລະ ມີຄວາມໝາຍອັນເລິກເຊິ່ງ, ເປັນການຈາລຶກເຖິງບຸນຄຸນ ແລະ ຜົນງານຂອງຄູ ທີ່ໄດ້ປະກອບສ່ວນ ເຂົ້າໃນການພັດທະນາການສຶກສາ ແລະ ກິລາ ກໍຄືພັດທະນາຊັບພະ ຍາກອນມະນຸດຂອງຊາດ. ສິ່ງສຳຄັນ ແມ່ນເພື່ອຮັບປະກັນເຮັດໃຫ້ການສະເຫລີມສະຫລອງ ວັນຄູແຫ່ງຊາດປີນີ້ ໄປຕາມທິດປະຢັດມັດທະຍັດ, ເປັນການສຸມໃສ່ຈັດຕັ້ງປະຕິບັດການຮຽນ-ການສອນ ໃຫ້ມີຄຸນນະພາບ ເພື່ອທົດແທນໄລຍະທີ່ໄດ້ຮັບຜົນກະທົບຈາກ ການແຜ່ລະບາດຂອງພະຍາດໂຄວິດ-19.
ດັ່ງນັ້ນ, ກະຊວງສຶກສາທິການ ແລະ ກິລາ ຈິ່ງອອກແຈ້ງການດັ່ງນີ້:
1. ໃຫ້ຈັດຕັ້ງສະເຫຼີມສະຫຼອງວັນຄູແຫ່ງຊາດໃນຂັ້ນຂອງຕົນ ໂດຍເຊີນຄະນະນໍາຂອງຕົນ, ອົງການປົກຄອງທ້ອງຖິ່ນ, ຜູ້ປະກອບການ, ສະມາຄົມພໍ່ແມ່ຜູ້ປົກຄອງນັກຮຽນ-ນັກສຶກສາ, ຄະນະພັດທະນາການສຶກສາຂັ້ນ ບ້ານ, ຕົວແທນຜູ້ປົກຄອງ ແລະ ນັກຮຽນ-ນັກສຶກສາເຂົ້າຮ່ວມ ໂດຍມີຈຸດປະສົງ ເພື່ອເຊີດຊູກຽດ ແລະ ຄຸນງາມຄວາມດີຂອງດຸ ສ້າງຈິດສໍານຶກໃຫ້ສັງຄົມ, ພໍ່ແມ່ຜູ້ປົກຄອງ, ນັກຮຽນ-ນັກສຶກສາ ເຫັນໄດ້ຄວາມຫມາຍ ສໍາຄັນຂອງຄູ-ອາຈານ ແລະ ເອົາໃຈໃສ່ປະກອບສ່ວນຕໍ່ການສຶກສາ ແລະ ຄົ້ນຄວ້າຮ່ໍາຮຽນຝຶກຝົນຫຼໍ່ຫຼອມ ໃຫ້ມີຄວາມຮູ້ຄວາມສາມາດ ແລະ ຄຸນສົມບັດ ສິນທໍາປະຕິວັດ ກາຍເປັນຊັບພະຍາກອນມະນຸດທີ່ມີຄຸນນະພາບຂອງຊາດ.
2. ຈັດຕັ້ງການຢ້ຽມຢາມອວຍພອນຄະນະນໍາ, ຜູ້ບໍລິຫານການສຶກສາ ຕາມສໍານັກງານອົງການ ແລະ ອາດີດນັກວິຊາການ, ຄູອາວຸໂສບໍານານ ຕະຫຼອດຮອດຄູສອນໃນເຂດຫ່າງໄກສອກຫຼີກ ຕາມສະພາບເງື່ອນໄຂຕົວຈິງຂອງແຕ່ລະພາກສ່ວນ,
3. ສ້າງຂະບວນການແຂ່ງຂັນຖາມ-ຕອບວິທະຍາສາດ, ກິດຈະກໍາກິລາເພື່ອສຸຂະພາບ ແລະ ແຂ່ງຂັນສິລະປະວັນນະຄະດີ ທີ່ສະແດງໃຫ້ເຫັນເຖິງມູນເຊື້ອຂອງພັກປະຊາຊົນປະຕິວັດລາວໃນການພັດທະນາຊັບພະຍາກອນ ມະນຸດ ແລະ ການປະກອນສ່ວນຂອງຖັນແຖວຄູ-ອາຈານຕໍ່ວຽກງານດັ່ງກ່າວ ຕາມເງື່ອນໄຂຕົວຈິງຂອງແຕ່ລະພາກສ່ວນ.
4. ສໍາລັບທ້ອງຖິ່ນໃດທີ່ມີຈໍານວນນັກຮຽນປະລະສູງ ແລະ ຜົນການຮຽນຕໍ່າ ໃຫ້ເອົາໃຈໃສ່ເປັນພິເສດ ໂດຍປະສານສົມທົບກັບອົງການປົກຄອງທ້ອງຖິ່ນ, ຄະນະພັດທະນາການສຶກສາແຕ່ລະຂັ້ນ, ຊຸມຊົນ ແລະ ສະມາຄົມພໍ່ແມ່ນັກຮຽນ ເປີດບັ້ນປູກລະດົມຂົນຂວາຍ ແລະ ຈັດຕັ້ງການບໍາລຸງນັກຮຽນ ຕາມຈຸດພິເສດ ແລະ ຄວາມສອດຄ່ອງຂອງແຕ່ລະບ່ອນ.
5. ການສະເຫຼີມສະຫຼອງໃຫ້ຢູ່ບົນພື້ນຖານຈິດໃຈປະຢັດມັດທະຍັດ, ມີເນື້ອໃນ, ເປັນກິດຈະກໍາທີ່ເປັນຮູບປະທໍາ ແລະ ສອດຄ່ອງກັບສະພາບດິນຟ້າອາກາດຂອງແຕ່ລະທ້ອງຖິ່ນ.
6. ພາຍຫຼັງສໍາເລັດໃຫ້ແຕ່ລະພາກສ່ວນລາຍງານສະພາບການຈັດຕັ້ງສະເຫຼີມສະຫຼອງວັນຄູແຫ່ງຊາດ 7 ຕຸລາ 2022 ມາຍັງ ກົມສ້າງຄູ, ກະຊວງສຶກສາທິການ ແລະ ກິລາ ໂດຍຜ່ານການຈັດຕັ້ງ ແຕ່ລະຂັ້ນຂອງຕົນ.
