ພະນັກງານອອກມາໂພສອຳລາ ດ້ວຍຄວາມຮັກ ແລະ ພາກພູມໃຈໃນວຽກງານຜ່ານມາ ຍ້ອນ ການບິນລາວ ຢຸດຖ້ຽວບິນ ນະຄອນຫລວງ-ອຸດົມໄຊ
ວັນທີ 2 ຕຸລາ 2022 ຜ່ານມານີ້ ມີພະນັກງານການບິນສາຂາອຸດົມໄຊໂພສອຳລາ ວຽກງານສາຍການບິນ ລັດວິສາຫະກິດການບິນລາວສາຂາອຸດົມໄຊທີ່ມີສາຍການບິນ QV502 ເປັນຖ້ຽວສຸດທ້າຍ ດ້ວຍຄວາມຮັກ ແລະ ຊາບຊຶ້ງໃນຜົນງານການເຮັດວຽກຕະຫລອດໄລຍະ 10 ປີຜ່ານມາ.
ຈາກໂພສດັ່ງກ່າວ ເຮັດໃຫ້ສັງຄົມທີ່ໄດ້ເຫັນຕ່າງກໍຄ້ອຍໃຈນຳ ເພາະກິດຈະການການບິນລາວໄດ້ເຕີບໃຫຍ່ຂະຫຍາຍຕົວ ຮັບໃຊ້ສັງຄົມລາວສາຂາອຸດົມໄຊມາຫລາຍສິບປີ ສ້າງຄວາມສະດວກສະບາຍໃຫ້ຜູ້ຄົນທີ່ອາໄສ ແລະ ເດີນທາງໄປເຮັດວຽກຢູ່ແຂວງອຸດົມໄຊ ໄດ້ດີມາໂດຍຕະຫລອດ ແຕ່ມື້ໜຶ່ງຕ້ອງໂຈະສາຍການບິນ.
ຫລ້າສຸດ ວັນທີ 3 ຕຸລາ 2022 ນີ້ ທີມງານຂ່າວໜັງສືພິມລາວພັດທະນາໄດ້ສອບຖາມພາກສ່ວນກ່ຽວຂ້ອງຢູ່ສາຍການບິນດັ່ງກ່າວໃຫ້ຮູ້ວ່າ: ປັດຈຸບັນສາຍການບິນລາວສາຂາອຸດົມໄຊ ໄດ້ຢຸດຖ້ຽວບິນມາໄດ້ໄລຍະໜຶ່ງ ເຊິ່ງຄາດວ່າຈະເປີດໃໝ່ອີກຮອບໃນທ້າຍເດືອນ 3 ປີ 2023 ຫລື ໄວກວ່ານີ້ ຫາກສະພາບຄ່ອງ ສ່ວນລາຍລະອຽດກ່ຽວກັບການປິດ-ການເປີດ ແລະ ມາດຕະການອື່ນໆ ແມ່ນຍັງຢູ່ໃນຂັ້ນຕອນຂອງຂັ້ນເທິງ ເຊິ່ງຈະລາຍງານໃຫ້ຊາບຢ່າງເປັນທາງການອີກຮອບໜຶ່ງ. ສຳລັບການໂພສ ໃນວັນຜ່ານມາ ເປັນການໂພສຂອງພະນັກງານຂອງສາຍການບິນແທ້ ເປັນການໂພສສ່ວນຕົວ ແລະ ໂພສຄວາມຮູ້ສຶກຕໍ່ໜ້າທີ່ວຽກງານເທົ່ານັ້ນ.
ຄວາມຈິງແລ້ວ ການເປີດ-ປິດ ບໍ່ແມ່ນເລືອກແປກ ຫລື ເລື່ອງໃໝ່ໃນວົງການດຳເນີນທຸລະກິດ ເພາະທຸກໆທຸລະກິດຫາກມີການຊົມໃຊ້ ກໍຢູ່ໄດ້ ແຕ່ຫາກສັງຄົມບໍ່ໄດ້ໃຊ້ກໍຕ້ອງປິດກິດຈະການໄປ ເຖິງຢ່າງໃດກໍຕາມ ເປັນກຳລັງໃຈໃຫ້ທຸກພາກສ່ວນ ແລະ ພະນັກງານທຸກຄົນທີ່ຈະໄດ້ປ່ຽນວິຖີທາງ ປ່ຽນໜ້າທີ່ການງານ ແລະ ປ່ຽນບ່ອນປະຈຳການໃໝ່ ຫາກເຮົາຕັ້ງໃຈດ ຮັກມັກໃນອາຊີບແລ້ວຈະຍ້າຍບ່ອນ, ຈະໄປເຮັດຢູ່ໃສກໍມີຄວາມສຸກ.
