ປະຊາຊົນສ່ອງແສງ ພາພີ່ນ້ອງມາແຕ່ຕ່າງປະເທດໄປທ່ຽວທາດຫລວງ-ປະຕູໄຊ ຖືກເຈົ້າໜ້າທີ່ຕຳຫລວດທ່ອງທ່ຽວປັບໃໝ

ເມື່ອທ້າຍເດືອນສິງຫາ 2022 ຜ່ານມານີ້ ປະຊາຊົນຈຳນວນຫລາຍທ່ານໄດ້ສ່ອງແສງເຂົ້າມາທາງຂ່າວໜັງສືພິມລາວພັດທະນາພວກເຮົາຈຳນວນຫລາຍ ໂດຍສັງລວມແລ້ວມີ 2 ກໍລະນີເຊັ່ນ:

ກໍລະນີ1 ຜູ້ຖືກປັບໃໝໄດ້ແຈ້ງວ່າມີພີ່ນ້ອງຝັ່ງໄທມາຢ້ຽມຢາມ ພາຍຫລັງຫ່າງກັນໄປເກືອບ 3 ປີ ຍ້ອນມີໂຄວິດ ແລະ ພາຍຫລັງລາວເຮົາເປີດປະເທດໃຫ້ມີການເຂົ້າ-ອອກ ພີ່ນ້ອງໄດ້ເຂົ້າມາຢາມຈຶ່ງໄດ້ພາໄປນະມັດສະການພະທາດຫລວງ ໂດຍໃຊ້ລົດສ່ວນຕົວ ແຕ່ຢູ່ໆກໍມີເຈົ້າໜ້າທີ່ຕຳຫລວດທ່ອງທ່ຽວເຂົ້າມາຫາ ພ້ອມໃຊ້ມາດຕະການປັບໃໝ.

ກໍລະນີທີ 2 ຈາກພາກສ່ວນໂຮງແຮມທີ່ບໍລິການທີ່ພັກ ພ້ອມລົດຮັບສົ່ງ ເມື່ອມີນັກທ່ອງທ່ຽວມາພັກກໍຈະໄປສົ່ງສະຖານທີ່ທ່ອງທ່ຽວ ໂດຍບໍ່ໄດ້ນຳພາທ່ຽວແຕ່ຢ່າງໃດ ແຕ່ຖືກເຈົ້າໜ້າທີ່ປັບໃໝ.

ຜູ້ຖືກປັບໃໝໃນກໍລະນີດັ່ງກ່າວ ໃຫ້ສພາດຕໍ່ນັກຂ່າວໜັງສືພິມລາວພັດທະນາພວກເຮົາວ່າ “ເຈົ້າໜ້າທີ່ຕຳຫລວດໃຫ້ເຫດຜົນວ່າ ການກະທຳດັ່ງກ່າວເປັນການເຮັດຜິດລະບຽບການທ່ອງທ່ຽວ ບໍ່ສາມາດນຳພາພີ່ນ້ອງທ່ອງທ່ຽວຕາມສະຖານທີ່ຕ່າງໆໄດ້ ຕ້ອງແມ່ນບໍລິສັດນຳທ່ຽວເທົ່ານັ້ນ ເພື່ອປ້ອງກັນການສວຍໂອກາດຈາກພາກສ່ວນທີ່ບໍ່ແມ່ນບໍລິສັດນຳທ່ຽວລັກຮັບງານພາແຂກທ່ອງທ່ຽວຕາມສະຖານຕ່າງໆໃນນະຄອນຫລວງວຽງຈັນ” ດັ່ງນີ້ເປັນຕົ້ນ.

ທີມງານຂ່າວໜັງສືພິມລາວພັດທະນາ ໄດ້ສອບໄປຖາມໄປຍັງພາກສ່ວນກ່ຽວຂ້ອງຢູ່ ກະຊວງຖະແຫລງຂ່າວວັດທະນະທຳ ແລະ ທ່ອງທ່ຽວ ໄດ້ຮັບຄຳຕອບວ່າ “ການທີ່ປະຊາຊົນຄົນລາວທົ່ວໄປພາພີ່ນ້ອງນຳທ່ຽວ ຖືວ່າບໍ່ຜິດລະບຽບກົດລະບຽບການນຳທ່ຽວ ສາມາດເຮັດໄດ້ ແຕ່ຕ້ອງສະແດງຫລັກຖານຄວາມຈິງ ວ່າເປັນພີ່ນ້ອງແທ້ ບໍ່ແມ່ນການສວຍໂອກາດຮັບແຂກນຳທ່ຽວບໍ່ຖືກຕ້ອງ ແລະ ຖ້າລົດໂຮງແຮມກໍສາມາດນຳສົ່ງນັກທ່ອງທ່ຽວໄປຍັງສະຖານທີ່ທ່ອງທ່ຽວໄດ້ ໂດຍບໍ່ແມ່ນການນຳທ່ຽວໂດຍກົງ ແຕ່ຕ້ອງສະແດງເອກະສານລົດ, ບັດພະນັກງານທີ່ກ່ຽວຂ້ອງ ກັບໂຮງແຮມນັ້ນໆ ຖືວ່າບໍ່ເຂົ້າຂ່າຍຄວາມຜິດ”.

ສ່ວນລາຍລະອຽດດ້ານກົດລະບຽບອື່ນໆ ທີມງານຂ່າວໜັງສືພິມລາວພັດທະນາໄດ້ຕິດຕໍ່ທາງເຈົ້າໜ້າທີ່ຕຳຫລວດທ່ອງທ່ຽວທີ່ເຮັດວຽກດ້ານນີ້ໂດຍກົງແລ້ວ ລໍຖ້າການຊີ້ແຈງຕື່ມ ຫາກມີຄວາມຄືບໜ້າຈະມາລາຍງານໃຫ້ທ່ານໄດ້ຮັບຊາບພາຍຫລັງ.