ໄພທຳມະຊາດ ເປັນໄພຂົ່ມຂູ່ ແລະ ຊໍ້າເຕີມຄວາມທຸກຍາກຂອງປະຊາຊົນ

ໂດຍ: ທິດກໍ່າ

ຊ່ວງວັນທີ 27-28 ກັນຍາ 2022 ບັນດາແຂວງພາກໃຕ້ຂອງລາວເຮົາໄດ້ຖືກພາຍຸ “ໂນຣູ” ພັດຖະຫລົ່ມໂຮຍຮຳຊ້ຳສົ່ງທ້າຍລະດູ ປະຈຳປີ 2022 ເຮັດໃຫ້ຫລາຍແຂວງທາງພາກໃຕ້ໄດ້ຮັບຜົນກະທົບໜັກໜ່ວງສົມຄວນເຊັ່ນ: ແຂວງອັດຕະປື, ເຊກອງ, ຈຳປາສັກ, ສາລະວັນ ລາມຂຶ້ນມາຮອດສ່ວນໜຶ່ງຂອງພາກກາງ ແຂວງສະຫວັນນະເຂດນ້ຳໄດ້ຖ້ວມຫລາຍພື້ນທີ່. ຜົນກະທົບຈາກພາຍຸຄັ້ງນີ້ນອກຈາກນ້ຳໄດ້ຖ້ວມເຮືອນຊານບ້ານຊ່ອງ, ວັດວາອາຮາມ ແລະ ພື້ນຖານການຜະລິດແລ້ວ, ບັນດາເສັ້ນທາງເປ່ເພ, ເສົາໄຟຟ້າຫັກ, ສະພາບທີ່ໜ້າວິຕົກທີ່ສຸດກໍຄື ເຂົ້າພວມຂຽວງາມທີ່ພວມຈະສຸກເຫລືອງລໍຖ້າເກັບກູ້ເອົາຜົນຜະລິດ ແຕ່ກໍມາຖືກນ້ຳຖ້ວມ ເຊິ່ງໜຶ່ງໃນນັ້ນກໍມີບ້ານວົງວິໄລ ແລະ ບ້ານອື່ນໆທີ່ຂຶ້ນກັບເມືອງພູວົງ ແຂວງອັດຕະປື. ສ່ວນທາງແຂວງເຊກອງກໍຖືກຜົນກະທົບບໍ່ໜ້ອຍ ເປັນຕົ້ນຢູ່ບ້ານກະຊັງກາງ, ບ້ານນາເວີນ ເມືອງລະມານ, ບ້ານດາກກຣານ ເມືອງດາກຈຶງ ມີເສົາໄຟຟ້າຫັກລົ້ມ, ດິນພູເຈື່ອນໃສ່ທາງ ເຮັດໃຫ້ການໄປມາບໍ່ສະດວກ. ນອກນັ້ນ ກໍຍັງມີບ້ານອື່ນໆທີ່ຂຶ້ນກັບເມືອງສາມັກຄີໄຊ, ເມືອງໄຊເສດຖາ, ເມືອງຊານໄຊ ແລະ ສະໜາມໄຊ ແຂວງອັດຕະປື ກໍໄດ້ຮັບຜົນກະທົບໄປຕາມໆກັນ.

ເມື່ອເອີ່ຍເຖິງພາຍຸຝົນຕົກໜັກໃນສະໄໝນີ້ ມັນນັບມື້ມີການປ່ຽນແປງໄປເລື້ອຍໆ. ສິ່ງທີ່ໜ້າຢ້ານກົວທີ່ສຸດກໍຄືມັນມາພ້ອມຝົນ, ພ້ອມລົມພັດຮຸນແຮງໜໍ່າລົງ ສາມາດທຳລາຍທຸກສິ່ງທຸກຢ່າງທີ່ຂວາງໜ້າ ຖ້າຄົນເຮົາບໍ່ມີວິທີຫລີກລ່ຽງ ຫລື ຫລົບໄພ ກໍເປັນອັນວ່າຖືກຜົນກະທົບ ອາດເສຍຊີວິດ ແລະ ຊັບສິນໃນເວລາບໍ່ພໍເທົ່າໃດຊົ່ວໂມງ. ໃນສະໄໝປູ່ຍ່າຕານາຍເຮົາ ເມື່ອຮອດຍາມນີ້ຖືວ່າຟ້າຝົນແມ່ນໝົດໄປແລ້ວ ອີກບໍ່ດົນກໍຈະຮອດມື້ບຸນອອກພັນສາ ອັນເປັນໄລຍະກ້າວເຂົ້າສູ່ຍາມໜາວ ແຕ່ສຳລັບປີນີ້ມັນແຕກຕ່າງ ຝົນອາດແກ່ຍາວໄປຮອດເດືອນຕຸລາ, ພະຈິກ ຫລື ທັນວາ ຕາມທີ່ອຸຕຸນິຍົມໄດ້ວິເຄາະ ແລະ ຈາກນີ້ໄປກໍຍັງບໍ່ຮູ້ວ່າຈະມີພາຍຸຫົວໃດມາອຸບາດສົ່ງທ້າຍໃນປີນີ້ອີກ.

ເຖິງຢ່າງໃດກໍດີ, ເພື່ອຫລີກລ່ຽງໄພພິບັດຈາກພາຍຸຝົນຕົກໜັກ, ນ້ຳຖ້ວມ ຫລື ໃນຂັ້ນຕໍ່ໄປ ບໍ່ວ່າໄພພິບັດດ້ານອື່ນໆເຊັ່ນ: ໄພໜາວ, ອາກາດຮ້ອນ, ແຜ່ນດິນໄຫວ ແລະ ໄພພິບັດຈາກໂຣຄາພະຍາດຕ່າງໆ ທາງອອກທີ່ດີເຮົາຄວນເຝົ້າຕິດຕາມສະພາບການປ່ຽນແປງດິນຟ້າອາກາດຈາກອຸຕຸນິຍົມອຸທົກກະສາດ ຫລື ຈາກຂະແໜງການທີ່ກ່ຽວຂ້ອງຢ່າງໃກ້ຊິດ ເພາະທຸກສິ່ງຢ່າງສະໄໝນີ້ເຮົາສາມາດຕິດຕາມໄດ້ຫລາຍຊ່ອງທາງ ໂດຍສະເພາະຈາກສື່ອອນລາຍຂອງລາວເຮົາເອງ ຫລື ຂອງຕ່າງປະເທດ ເພື່ອເປັນການບໍ່ປະໝາດ ແລະ ເພື່ອຄວາມປອດໄພຕໍ່ຊີວິດ ແລະ ຊັບສິນຂອງເຮົາເອງ.