ດີໃຈທີ່ມີຕະຫລາດຜັກປອດສານພິດ ແຕ່ຈະຄຸ້ມຄອງມັນແນວໃດໃຫ້ຍືນຍົງ
ໂດຍ: ທ່ຽງທຳ
ສະບາຍດີ ເພື່ອນຜູ້ອ່ານທີ່ຮັກແພງທັງຫລາຍ, ໃຜໆກໍຈະດີໃຈເມື່ອລັດຖະບານເຮົາໄດ້ມີຄວາມເຂັ້ມງວດຄວບຄຸມອາຫານປົນເປື້ອນ, ພືດຜັກ ແລະ ໝາກໄມ້ປອດສານພິດ ເພື່ອຮັບປະກັນຄວາມປອດໄພຂອງຜູ້ບໍລິໂພກ ແລະ ສິ່ງພົ້ນເດັ່ນຕ່າງໆກໍໄດ້ປາກົດມີໃຫ້ເຫັນ ນັບແຕ່ເບື້ອງນິຕິກຳກໍໄດ້ມີກົດໝາຍຄວບຄຸມສານເຄມີ, ການນຳໃຊ້ຢາຂ້າຫຍ້າ ແລະ ປາບສັດຕູພືດທີ່ຖືກຕ້ອງ, ໄປພ້ອມໆກັບການສົ່ງເສີມໃຫ້ປະຊາຊົນປູກພືດຜັກສະອາດ ແລະ ມີຕະຫລາດຈຳໜ່າຍສະເພາະຢູ່ 2 ຈຸດໃຫຍ່ໃນນະຄອນຫລວງວຽງຈັນ ຄືຢູ່ສວນເຈົ້າຟ້າງຸ່ມ, ເດີ່ນສວນຊາວໜຸ່ມທາດຫລວງ ແລະ ຢູ່ບາງຕະຫລາດຕ່າງໆກໍມີ ເຊິ່ງສະເພາະຢູ່ທາດຫລວງ ກຸ່ມຂາຍຜັກດັ່ງກ່າວຈະມາເຕົ້າໂຮມກັນຂາຍໃນວັນເສົາຂອງທຸກໆທິດ ແລະ ສ່ວນຢູ່ສວນເຈົ້າຟ້າງຸ່ມແມ່ນວັນຈັນ ແລະ ວັນພະຫັດຂອງທຸກໆທິດເຊັ່ນກັນ, ເບິ່ງແລ້ວຜັກສ່ວນຫລາຍຈະເປັນແນວຜັກທຳມະຊາດ ແລະ ພື້ນເມືອງເຮົາ ດັ່ງຜັກກາດຂາວ, ຜັກບົ້ງ, ຜັກຫົມ, ຜັກປັງ, ຜັກຫວານ ແລະ ຜັກບົ່ວຫົວຫອມຊະນິດຕ່າງໆ, ສ່ວນປະເພດໝາກກໍຈະເປັນໝາກອຶ, ໝາກເຜັດ, ໝາກເຂືອ, ໝາກບວບ, ໝາກຊູ ແລະ ອື່ນໆທີ່ຊາວບ້ານເຮົາປູກໄດ້ງ່າຍ ແລະ ເບິ່ງຄືວ່າຈະປອດສານຜິດແທ້. ແຕ່ຄຽງຄູ່ກັນນັ້ນ ກໍຍັງມີຊາວຄ້າຂາຍຈຳນວນໜຶ່ງທີ່ນຳເອົາຜັກຊະນິດອື່ນ ເຊິ່ງມີຫລາຍຢ່າງອາດຈະບໍ່ແມ່ນປູກຢູ່ປະເທດເຮົາ ເມື່ອເປັນເຊັ່ນນັ້ນກໍມີຂໍ້ສົງໄສໃຫ້ຜູ້ໄປໃຊ້ບໍລິການວ່າ: ຈະແມ່ນຜັກປອດສານພິດແທ້ບໍ່ ? ໃນເມື່ອຍັງບໍ່ເຫັນມີໃບຢັ້ງຢືນ ຫລື ການຄວບຄຸມຂອງໜ່ວຍງານກ່ຽວຂ້ອງໃດໆ. ຖ້າສະພາບດັ່ງກ່າວຫາກປະປ່ອຍແກ່ຍາວໄປ ກໍອາດຈະເຮັດໃຫ້ຕະຫລາດຜັກປອດສານພິດນີ້ຈະບໍ່ສາມາດຄົງຕົວຢູ່ກໍເປັນໄດ້. ເອົາເຖິງວ່າຜ່ານມາຈະມີຜູ້ກວດກາ ຫລື ຄຸ້ມຄອງແນວໃດກໍຕາມ, ແຕ່ ທ່ຽງທຳ ກໍຂໍຢາກໃຫ້ພາກສ່ວນກ່ຽວຂ້ອງອອກໃບຢັ້ງຢືນທີ່ແທ້ຈິງໃຫ້ແກ່ຊາວຄ້າຂາຍດັ່ງກ່າວ ເພື່ອສ້າງຄວາມປະທັບໃຈ ແລະ ແນ່ໃຈໃຫ້ແກ່ຜູ້ບໍລິໂພກໄດ້ຢ່າງແທ້ຈິງ.
