ການລົງທຶນຂອງສິງກະໂປ ຢູ່ ສປປ ລາວ ມີມູນຄ່າ 362 ລ້ານໂດລາສະຫະລັດ ລວມມີ 83 ໂຄງການ
September 30, 2022 - 1:47 PM
ທ່ານ ພັນຄໍາ ວິພາວັນ, ນາຍົກລັດ ຖະມົນຕີ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ພ້ອມດ້ວຍພັນລະຍາ ແລະ ຄະນະຜູ້ແທນຂັ້ນສູງ ໄດ້ເດີນທາງຢ້ຽມຢາມ ສາທາລະນະ ລັດ ສິງກະໂປ ຢ່າງເປັນທາງການ ໃນວັນທີ 27-28 ກັນຍາ 2022, ໂດຍຕອບສະໜອງຕາມຄຳເຊື້ອເຊີນຂອງ ທ່ານ ລີ ຊຽນ ລຸງ, ນາຍົກລັດຖະ ມົນຕີ ແຫ່ງ ສາທາລະນະລັດ ສິງກະ ໂປ, ເພື່ອຮັດແໜ້ນ ແລະ ເສີມຂະຫຍາຍສາຍພົວພັນມິດຕະພາບ ອັນເປັນມູນເຊື້ອທີ່ມີມາແຕ່ດົນນານ ແລະ ການຮ່ວມມືທີ່ດີງາມ ລະຫວ່າງ ລາວ-ສິງກະໂປ ໃຫ້ແໜ້ນແຟ້ນຍິ່ງໆຂຶ້ນໃນຕໍ່ໜ້າ.
ຕົວເລກການລົງທຶນຂອງສິງກະໂປ ຢູ່ ສປປ ລາວ ມີມູນຄ່າ 362 ລ້ານໂດລາສະຫະລັດ ລວມມີ 83 ໂຄງການ, ເຊິ່ງຈັດເປັນອັນດັບທີ 10 ຂອງການລົງທຶນຕ່າງປະເທດ ຢູ່ ສປປ ລາວ. ສໍາລັບມູນຄ່າການຄ້າສອງຝ່າຍ ໃນປີ 2021 ມີ 115,9 ລ້ານໂດລາສະຫະລັດ, ສປປ ລາວ ສົ່ງອອກມີມູນຄ່າປະມານ 90,9 ລ້ານໂດລາສະຫະລັດ ແລະ ນໍາເຂົ້າປະມານ 52 ລ້ານໂດລາສະຫະລັດ.
ນອກຈາກນັ້ນ, ສອງຝ່າຍ ຍັງໄດ້ປຶກສາຫາລື ແລະ ແລກປ່ຽນຄໍາຄິດເຫັນ ກ່ຽວກັບ ສະພາບການພົ້ນເດັ່ນໃນພາກພື້ນ ແລະ ສາກົນ ທີ່ມີຄວາມສົນໃຈຮ່ວມກັນ.
ພາຍຫຼັງສໍາເລັດການພົບປະສອງຝ່າຍ, ທັງສອງນາຍົກລັດຖະມົນຕີ ໄດ້ຮ່ວມກັນເປັນສັກຂີພິຍານການລົງນາມບົດບັນທຶກຄວາມເຂົ້າໃຈ 4 ສະບັບ ຄື:
1) ບົດບັນທຶກຄວາມເຂົ້າໃຈ ວ່າດ້ວຍ ການຮ່ວມມື ລະຫວ່າງ ກະຊວງການຕ່າງປະເທດ ແຫ່ງ ສປປ ລາວ ແລະ ກະຊວງການຕ່າງປະເທດ ແຫ່ງ ສ. ສິງກະໂປ,
2) ບົດບັນທຶກຄວາມເຂົ້າໃຈ ວ່າດ້ວຍ ການຮ່ວມມືດ້ານປ້ອງ ກັນສິ່ງແວດລ້ອມ, ການປ່ຽນແປງດິນຟ້າອາກາດ ແລະ ການບໍລິຫານຈັດສັນຊັບພະຍາ ກອນທາງນໍ້າ,
3) ບົດບັນທຶກຄວາມເຂົ້າໃຈ ວ່າດ້ວຍ ການຮ່ວມມືໃນຂົງເຂດເຕັກໂນໂລຊີ, ຂໍ້ມູນຂ່າວສານ ແລະ ເຕັກໂນໂລຊີດີຈິຕອນ.
4) ບົດບັນທຶກຄວາມເຂົ້າໃຈວ່າດ້ວຍ ການຮ່ວມມືດ້ານພະລັງ ງານ.
ຂ່າວໂດຍ: ກົມການຂ່າວ, ກະຊວງການຕ່າງປະເທດ
