ທ່ານ ທຣຳ ຈະອອກດຳລັດຍົກເລີກນະໂຍບາຍການປ່ຽນແປງດິນຟ້າອາກາດຂອງທ່ານ ໂອບາມາ
ທ່ານ ເຊນ ສະປິເຊີ ໂຄສົກ ທໍານຽບຂາວອາເມລິກາ ກ່າວໃນວັນທີ 27 ມີນານີ້ວ່າ: ທ່ານ ທຣຳ ປະທານາທິບໍດີອາເມລິກາ ຈະອອກດຳລັດເພື່ອຍົກເລີກນະໂຍບາຍການປ່ຽນແປງດິນຟ້າອາກາດທີ່ບໍ່ຈຳເປັນ ແລະ ປະຕິບັດໃນສະໄໝລັດຖະບານ ໂອບາມາ.
ທ່ານ ສະປິເຊີ ກ່າວຕື່ມວ່າ: ດຳລັດໃໝ່ຈະເຮັດໃຫ້ລາຄາພະລັງງານ ແລະ ໄຟຟ້າຂອງອາເມລິກາຢູ່ໃນລະດັບທີ່ສົມເຫດສົມຜົນ, ມີຄວາມຮັບປະກັນ ແລະ ສະອາດ ທັງຊຸກຍູ້ການເຕີບໃຫຍ່ຂອງເສດຖະກິດ ແລະ ສ້າງວຽກເຮັດງານທຳ.
ກ່ອນນີ້ມື້ໜຶ່ງ, ທ່ານ ສະກອດ ປຣູອິດ ຫົວໜ້າກົມອະນຸລັກສິ່ງແວດລ້ອມຄົນໃໝ່ຂອງອາເມລິກາ ໄດ້ຢືນຢັນວ່າ: ດຳລັດໃໝ່ນີ້ຈະຍົກເລີກແຜນການພະລັງງານໄຟຟ້າທີ່ສະອາດທີ່ລັດຖະບານ ໂອບາມາ ວາງອອກໃນປີ 2015 ເຊິ່ງແຜນການດັ່ງກ່າວແມ່ນໃຈກາງນະໂຍບາຍການປ່ຽນແປງດິນຟ້າອາກາດຂອງລັດຖະບານ ໂອບາມາ ເພື່ອຫຼຸດຜ່ອນການລະບາຍອາຍພິດເຮືອນແກ້ວຈາກໂຮງຜະລິດໄຟຟ້າອາເມລິກາ.
