ພະແນກພະລັງງານ ແລະ ບໍ່ແຮ່ ແຂວງເຊກອງ ແຈ້ງເຕືອນກຽມປ່ອຍນ້ຳເຂື່ອນໄຟຟ້າຫ້ວຍລໍາພັນຕອນລຸ່ມ ລະຫວ່າງ 28 ກັນຍາ ຫາ 1 ຕຸລາ 2022
ວັນທີ 28 ກັນຍາ 2022 ນີ້, ພະແນກພະລັງງານ ແລະ ບໍ່ແຮ່ ແຂວງເຊກອງ ໄດ້ອອກແຈ້ງເຖິງອໍານາດການປົກຄອງແຂວງ, ອໍານາດການປົກຄອງເມືອງ ແລະ ອໍານາດການປົກຄອງທ້ອງຖິ່ນ, ພໍ່ແມ່ປະຊາຊົນເຂດບ້ານທີ່ມີຄວາມສ່ຽງຢູ່ກ້ອງເຂື່ອນໄຟຟ້າ: ເຂື່ອນຫ້ວຍລໍາພັນຕອນລຸ່ມ, ເຊິ່ງມີແຜນຈະປ່ອຍນ້ຳໃນລະຫວ່າງວັນທີ 28 ກັນຍາ 2022 ຫາ 1 ຕຸລາ 2022 ແມ່ນຈະມີການປ່ອຍນ້ຳຜ່ານທາງປະຕູນ້ຳລະບາຍນ້ຳລົ້ນ (Spil Way) ປະມານ 440–510 ແມັດກ້ອນຕໍ່ວິນາທີ ຫລື ຫລາຍກວ່ານັ້ນ ຕາມປະລິມານໄຫລເຂົ້ານໍ້າຕົວຈິງ. ເພື່ອຮັກສາລະດັບນ້ຳໃນອ່າງໂຕ່ງບໍ່ໃຫ້ເກີນລະດັບນ້ຳເຕື່ອນໄພ EL=198.00 masl ສະນັ້ນ, ຈິ່ງແຈ້ງມາຍັງທຸກພາກສ່ວນກ່ຽວຂ້ອງ ແລະ ປະຊາຊົນທີ່ທໍາມາຫາກິນຕາມສາຍຫ້ວຍລໍາພັນໃຫຍ່ ໂດຍສະເພາະແມ່ນບໍລິເວນກ້ອງເຂື່ອນຫ້ວຍລໍາພັນຕອນລຸ່ມຈົ່ງມີສະຕິລະມັດລະວັງ ຖ້າບໍ່ຈໍາເປັນກໍໃຫ້ຫລີກລ່ຽງການທໍາມາຫາກິນຕາມສາຍນ້ຳ, ລົງຫລິ້ນນ້ຳ ແລະ ການນໍາເອົາສັດລ້ຽງໄປບໍລິເວນທີ່ມີຄວາມສ່ຽງ ເພື່ອຄວາມປອດໄພທາງດ້ານຊີວິດ ແລະ ຊັບສິນຂອງທ່ານ.
ດັ່ງນັ້ນ ພະແນກພະລັງງານ ແລະ ບໍ່ແຮ່ ແຂວງເຊກອງ ຈຶ່ງແຈ້ງການມາຍັງທ່ານຈົ່ງຮັບຮູ້, ໃຫ້ຄວາມຮ່ວມມື ແລະ ພ້ອມກັນເຝົ້າລະວັງໃນການຈັດຕັ້ງປະຕິບັດດ້ວຍ.
