ນະຄອນຫລວງວຽງຈັນກຽມປະກາດເມືອງພົ້ນທຸກເປັນໝາກຜົນຂອງພັກ-ລັດຖະບານ ແຕ່ປະຊາຊົນຍັງປະສົບກັບບັນຫາປາກົດການຫຍໍ້ທໍ້ ແລະ ການຄົມມະນາຄົມທີ່ຫຍຸ້ງຍາກ

ໂດຍ: ທິດກໍ່າ

ຄາດວ່າໃນທ້າຍປີ 2022 ນີ້, ນະຄອນຫລວງວຽງຈັນຈະປະກາດບໍ່ໃຫ້ມີເມືອງທຸກຍາກອີກແລ້ວ ຫລື ຖ້າຈະເວົ້າອີກຢ່າງໜຶ່ງກໍແມ່ນຈະປະກາດລຶບລ້າງຈາກຄວາມທຸກຍາກ ແລະ ດ້ອຍພັດທະນາໃນທ້າຍປີນີ້. ອັນສາເຫດກໍຍ້ອນວ່າຕະຫລອດໄລຍະ 40 ກວ່າປີຜ່ານມາ, ທາງການນຳນະຄອນຫລວງໃນແຕ່ລະສະໄໝ, ແຕ່ລະຂັ້ນ ຕະຫລອດຊາວນະຄອນຫລວງວຽງຈັນທຸກຊົນຊາດຊົນເຜົ່າ, ທຸກຊັ້ນຄົນຕ່າງກໍໄດ້ສຸມເຫື່ອແຮງເລັ່ງລັດພັດທະນານະຄອນຫລວງວຽງຈັນອັນເປັນໝາກຫົວໃຈຂອງປະເທດ ຫລືວ່າ ເປັນສູນກາງເສດຖະກິດ-ສັງຄົມຂອງປະເທດໃຫ້ຈະເລີນຮຸ່ງເຮືອງ, ກ້າວໜ້າ ແລະ ພັດທະນາໄປຢ່າງບໍ່ຢຸດຢັ້ງ.

ໃນໂອກາດເຂົ້າຮ່ວມກອງປະຊຸມຕີລາຄາການຈັດຕັ້ງປະຕິບັດວຽກງານກໍ່ສ້າງຮາກຖານການເມືອງ, ພັດທະນາຊົນນະບົດຮອບດ້ານແກ້ໄຂຄວາມທຸກຍາກ ແລະ ວຽກງານ 3 ສ້າງທົ່ວປະເທດ ທີ່ໄດ້ຈັດຂຶ້ນຢູ່ນະຄອນຫລວງວຽງຈັນ ທ່ານ ອານຸພາບ ຕຸນາລົມ ຄະນະເລຂາທິການສູນກາງພັກ, ເລຂາຄະນະພັກນະຄອນຫລວງວຽງຈັນ ໄດ້ລາຍງານຕໍ່ກອງປະຊຸມວ່າ: ອີງຕາມການປະເມີນຕາມດຳລັດສະບັບເລກທີ 348/ລບ, ລົງວັນທີ 16 ພະຈິກ 2017 ວ່າດ້ວຍມາດຕະຖານພົ້ນທຸກ ແລະ ມາດຕະຖານພັດທະນາ.

ມາຮອດປັດຈຸບັນ ນະຄອນຫລວງວຽງຈັນມີຄອບຄົວພົ້ນທຸກແລ້ວ 154.562 ຄອບຄົວ ເທົ່າກັບ 97,23%, ຍັງບໍ່ທັນບັນລຸ 4.402 ຄອບຄົວ ເທົ່າກັບ 2,77%, ຄອບຄົວພັດທະນາ 142.633 ຄອບຄົວ ເທົ່າກັບ 89,73% ຍັງບໍ່ບັນລຸ 16.631 ຄອບຄົວ ເທົ່າກັບ 10,27%. ບ້ານພົ້ນທຸກ 478 ບ້ານ ເທົ່າກັບ 99,38% ຍັງບໍ່ບັນລຸ 3 ບ້ານ ເທົ່າກັບ 0,62%. ບ້ານທີ່ບັນລຸມາດຖານບ້ານພັດທະນາ 241 ບ້ານ ເທົ່າກັບ 50,10% ຍັງບໍ່ບັນລຸ 240 ບ້ານ ເທົ່າກັບ 49,90%.

ສ່ວນເມືອງພົ້ນທຸກໄປແລ້ວມີ 8 ເມືອງ ຍັງເຫລືອພຽງ 1 ເມືອງ ຄືເມືອງປາກງື່ມ ເຊິ່ງປັດຈຸບັນໄດ້ສຳເລັດການລົງເກັບກຳຂໍ້ມູນເພື່ອປະເມີນຕົວເລກລະອຽດ ຄາດວ່າທ້າຍປີນີ້ຈະໄດ້ປະກາດເມືອງດັ່ງກ່າວເປັນເມືອງພົ້ນທຸກເມືອງສຸດທ້າຍຂອງນະຄອນຫລວງວຽງຈັນ. ເພາະສະນັ້ນ ຖືວ່ານັບແຕ່ປີ 2023 ເປັນຕົ້ນໄປ ໃນຈຳນວນ 9 ຕົວເມືອງທີ່ຂຶ້ນກັບນະຄອນຫລວງວຽງຈັນຈະບໍ່ມີເມືອງທຸກຍາກອີກຕໍ່ໄປ.

ນີ້ຄືຜົນງານອັນຍິ່ງໃຫຍ່ຂອງຊາວນະຄອນຫລວງວຽງຈັນ ເຊິ່ງຍາມໃດກໍພາກັນບຸກບືນສູ້ຊົນຢູ່ອ້ອມຂ້າງພັກ ພາຍໃຕ້ການຊີ້ນຳ-ນຳພາຈາກພັກ ແລະ ລັດຖະບານ ເພື່ອສ້າງນະຄອນຫລວງວຽງຈັນໃຫ້ກາຍເປັນສູນກາງເສດຖະກິດ-ສັງຄົມທີ່ເຂັ້ມແຂງຂອງປະເທດຊາດ. ເມື່ອຫວນຄືນເບິ່ງປະຫວັດສາດກ່ອນໜ້ານີ້ເກືອບ 500 ປີ ນະຄອນຫລວງວຽງຈັນເຄີຍເປັນນະຄອນຫລວງຂອງປະເທດລ້ານຊ້າງທີ່ສວຍງາມ, ໂດດເດັ່ນ ໂດຍສະເພາະແມ່ນຍຸກພະເຈົ້າໄຊເສດຖາທິລາດ ແລະ ຍຸກເຈົ້າສຸລິຍະວົງສາ.

ໃນອະນາຄົດພາລະກິດຂອງຊາວນະຄອນຫລວງວຽງຈັນຍັງຈະໄດ້ສືບຕໍ່ພາລະກິດສ້າງສາພັດທະນາໃຫ້ທັນຍຸກທັນສະໄໝໄປເລື້ອຍໆ ຂໍໃຫ້ຊາວນະຄອນຫລວງວຽງຈັນ ກໍຄືຊາວລາວທົ່ວປະເທດຈົ່ງພູມໃຈໃນຄວາມເປັນລາວ ພ້ອມກັນສາມັກຄີຢູ່ອ້ອມຂ້າງພັກ ເພື່ອສ້າງສາພັດທະນານະຄອນຫລວງວຽງຈັນຂອງພວກເຮົາໃຫ້ຈະເລີນຮຸ່ງເຮືອງກ້າວເດີນໄປຢ່າງບໍ່ຢຸດຢັ້ງ.

ຢ່າງໃດກໍດີ ການຈະກາດເປັນເມືອງພົ້ນທຸກຂອງນະຄອນຫລວງວນັ້ນຍັງມີສິ່ງທ້າທາຍຈຳນວນບໍ່ໜ້ອຍ ໂດຍສະເພາະປັດຈຸບັນນີ້ ສັງຄົມນະຄອນຫລວງພົບປະສົບບັນຫາຂີ້ລັກງັດແງະ, ປຸ້ນຈີ້ຊີງຊັບ ແລະ ປາກົດການຫຍໍ້ທໍ້ອື່ນໆມີລັກສະນະຖີ່ຂຶ້ນ ເຊິ່ງເປັນບັນຫາທີ່່ຕ້ອງແກ້ໄຂຢ່າງຮີບດ່ວນ ຖ້າຫາກບັນຫາຕ່າງໆນີ້ ແກ້ໄຂບໍ່ໄດ້ ການປະກາດພົ້ນທຸກທຸກກໍຈະບໍ່ໄດ້ຮັບໝາກຜົນສຳເລັດ ແລະ ບໍ່ໜ້າເອກະອ້າງທະນົງໃຈເທົ່າທີ່ຄວນ. ດັ່ງນັ້ນ, ທິດກໍ່າ ຈຶ່ງເວົ້າວ່າ ການປະກາດເມືອງພົ້ນທຸກນັ້ນຕ້ອງອາໄສທຸກເຫື່ອແຮງສຸມກຳລັງໃຈ ຈາກທຸກພາກສ່ວນກ່ຽວຂ້ອງ ຊ່ວຍເຫລືອແກ້ໄຂບັນຫາ ເຮັດແທ້ທຳຈິງ ຈຶ່ງຈະສຳເລັດ.