ຫົວໃຈເຕັ້ນຜິດປົກກະຕິສ່ຽງຕໍ່ພະຍາດຮ້າຍ ຫລື ບໍ?

ເຄີຍຮູ້ສຶກບໍ່ວ່າຢູ່ດີໆໃຈມັນສັ່ນໆວູບໆ ແຖມຍັງມີອາການຈຸກເອິກເກີດຂຶ້ນມານໍາອີກ ( ທັງທີ່ບໍ່ໄດ້ມີເຫດການ ຫລື ສິ່ງທີ່ເປັນຕາໜ້າຕື່ນເຕັ້ນເລີຍ ) ເຊິ່ງນີ້ອາດຈະເປັນສັນຍານເຕືອນວ່າຫົວໃຈທ່ານກຳລັງມີລະບົບການເຕັ້ນທີ່ຜິດປົກກະຕິຢູ່ກໍໄດ້.

ຫລາຍຄົນອາດຈະຄິດວ່າມັນເປັນເລື່ອງໄກຕົວທີ່ບໍ່ຄ່ອຍຈະສົນໃຈ ຫລື ເອົາໃຈໃສ່ກັບເລື່ອງແບບນີ້ຫລາຍເທົ່າໃດ, ແຕ່ຂໍບອກວ່າອາການຂອງມັນອາດຮ້າຍແຮງເຖິງຂັ້ນເສຍຊີວິດໄດ້ເລີຍ ແຖມຍັງສາມາດເກີດຂຶ້ນໄດ້ທຸກເພດທຸກໄວ ແລະ ຄົນທີ່ເປັນກໍມັກຈະບໍ່ຮູ້ຕົວນໍາອີກ. ສະນັ້ນ, ການໄດ້ຊອກຫາຂໍ້ມູນທີ່ຈະຊ່ວຍໃຫ້ຄວາມຮູ້ເພີ່ມຕື່ມກ່ຽວກັບພະຍາດ ອາດເກີດຂຶ້ນຍ້ອນການເຕັ້ນຜິດປົກກະຕິຂອງຫົວໃຈ.

• ແບບໃດຈຶ່ງເອີ້ນວ່າຫົວໃຈເຕັ້ນຜິດປົກກະຕິ:

ໂດຍປົກກະຕິແລ້ວຫົວໃຈຂອງຄົນເຮົາຈະເຕັ້ນຢູ່ທີ່ປະມານ 60 – 80 ເທື່ອຕໍ່ນາທີ ແຕ່ຖ້າເປັນພະຍາດຫົວໃຈການເຕັ້ນຈະຜິດປົກກະຕິຄື: ຫົວໃຈຈະເຕັ້ນຊ້າ ຫລື ໄວເກີນໄປ ໂດຍຈະໜ້ອຍກວ່າ 60 ເທື່ອຕໍ່ນາທີ ແລະ ຫລາຍກວ່າ 100 ເທື່ອຕໍ່ນາທີ ເຊິ່ງຈະພົບໃນເພດຍິງຫລາຍກວ່າເພດຊາຍ ແລະ ສາມາດເກີດຂຶ້ນໄດ້ກັບທຸກອາຍຸຄົນ.

ຫົວໃຈເຕັ້ນຜິດປົກກະຕິມີຈັກຊະນິດ: ຫົວໃຈເຕັ້ນຜິດປົກກະຕິແມ່ນມີບໍ່ຕ່ຳກວ່າ 10 ຊະນິດ ເຊິ່ງແຕ່ລະຊະນິດກໍມີກົນໄກການເກີດ, ສາເຫດການເກີດ, ອາການ ແລະ ວິທີການປິ່ນປົວທີ່ແຕກຕ່າງກັນໄປ ລວມເຖິງການບົ່ງບອກພະຍາດທີ່ແຕກຕ່າງກັນອອກໄປອີກ ໂດຍທົ່ວໄປຈະແບ່ງຊະນິດຂອງການເຕັ້ນຂອງຫົວໃຈທີ່ຜິດປົກກະຕິອອກເປັນ 3 ຊະນິດ ຄື:

• ຫົວໃຈເຕັ້ນຊ້າເກີນໄປ: ເຕັ້ນໜ້ອຍກວ່າ 60 ເທື່ອຕໍ່ນາທີ ແມ່ນຮ່າງກາຍໄດ້ຮັບເລືອດເຂົ້າໄປບໍ່ພຽງພໍ.
• ຫົວໃຈເຕັ້ນໄວແຕ່ບໍ່ຮຸນແຮງຫລາຍ: ເຕັ້ນຫລາຍກວ່າ 100 ເທື່ອຕໍ່ນາທີ ຫລື ອາດເຖິງ 210 ເທື່ອຕໍ່ນາທີ ແລະ ຈະມີອາການໃຈສັ່ນ, ເມື່ອຍ, ຫົວໃຈເຕັ້ນໄວ ຫລື ແຮງ.
• ຫົວໃຈເຕັ້ນໄວ ແລະ ຮຸນແຮງຫລາຍຂຶ້ນ: ເຕັ້ນ 350 ເທື່ອຕໍ່ນາທີ ໂດຍຈະມີອາການໝົດສະຕິ, ຫົວໃຈຢຸດເຕັ້ນ ແລະ ເສຍຊີວິດແບບກະທັນຫັນ.