ຖືພາກໍດື່ມກາເຟໄດ້ ບໍ່ເຮັດໃຫ້ລູກໄອຄິວຕໍ່າ
ທີມນັກວິໄຈຈາກວິທະຍາໄລການແພດ ມະຫາວິທະຍາໄລແຫ່ງລັດໂອໄຮໂອ ສະຫະລັດອາເມລິກາ ເຜີຍແຜ່ຜົນການວິໄຈໃໝ່ ຫລ້າສຸດທີ່ສະແດງໃຫ້ເຫັນວ່າ : ແມ່ຍິງທີ່ກຳລັງຖືພາສາມາດດື່ມກາເຟໄດ້ 1 – 2 ຈອກຕໍ່ມື້ ໂດຍບໍ່ສົ່ງຜົນກະທົບຕໍ່ໄອຄິວ ຫລື ພຶດຕິກຳຂອງລູກເມື່ອອາຍຸ 4 – 7 ປີ.
ຈາກການວິໄຈພົບວ່າເດັກນ້ອຍທີ່ເກີດຈາກແມ່ຜູ້ເປັນຄົນມັກດື່ມເຄື່ອງດື່ມທີ່ມີກາເຟອີນ ບໍ່ໄດ້ມີລະດັບໄອຄິວຕໍ່າ ຫລື ມີບັນຫາໃນດ້ານພຶກຕິກຳຫລາຍກ່ວາເດັກທີ່ເກີດຈາກແມ່ບໍ່ໄດ້ດື່ມກາເຟໃນເວລາຖືພາແຕ່ຢ່າງໃດ ເຊິ່ງສາມາດສະຫລຸບໄດ້ວ່າ ບໍ່ມີຫລັກຖານໃດທີ່ສະແດງໃຫ້ເຫັນເຖິງການກ່ຽວຂ້ອງລະຫ່ວາງການບໍລິໂພກກາເຟອີນໃນເວລາຖືພາກັບການຮຽນຮູ້ຈື່ຈຳ ຫລື ພຶດຕິກຳຂອງເດັກໃນທ້ອງເມື່ອໃຫຍ່ຂຶ້ນມາ.
ທີມວິໄຈໃຊ້ການວິເຄາະປະລິມານຂອງສານປະກອບ ພາຣາແຊນທີນ ໜຶ່ງໃນສານປະກອບທີ່ເກີດຂຶ້ນຈາກການມີກາເຟອີນໃນ ຮ່າງກາຍ ໂດຍການກວດຫາລະດັບຂອງພາຣາແຊນທີນໃນໂຕຢ່າງເລືອດຂອງກຸ່ມໂຕຢ່າງທີ່ໃຊ້ສຶກສາ ລວມ 2.197 ຄົນ ທັງໝົດ ເປັນແມ່ຍິງທີ່ກຳລັງຖືພາ. ການກວດດັ່ງກ່າວແຍກເປັນ 2 ເທື່ອໃນທຸກໆຄົນ ຈາກນັ້ນເອົາລະດັບພາຣາແຊນທີນທີ່ກວດສອບໄດ້ໄປ ປຽບທຽບກັບລະດັບໄອຄິວ ແລະ ພຶດຕິກຳຂອງລູກໆຂອງກຸ່ມໂຕຢ່າງ ຂະນະທີ່ເດັກເຫລົ່ານັ້ນອາຍຸ 4 ປີ ແລະ 7 ປີ.
ໂຕຢ່າງທີ່ໃຊ້ໃນການສຶກສາວິໄຈເທື່ອນີ້ ເປັນໂຕຢ່າງທີ່ເກັບລວບລວມລະຫ່ວາງປີ 1959 ກັບປີ 1974 ເຊິ່ງເປັນເວລາທີ່ການດື່ມກາເຟຂອງແມ່ຍິງຖືພາພົບຫລາຍກ່ວາໃນປະຈຸບັນນີ້ຫລາຍ.
ຜົນການວິໃຈໃໝ່ນີ້ສອດຄ່ອງກັບການສຶກສາຫລາຍເທື່ອກ່ອນໜ້ານີ້ ເຊັ່ນ : ວຽກງານວິໄຈໃນບໍ່ເທົ່າໃດປີຜ່ານມາ ເຊິ່ງຜູ້ວິໄຈພົບວ່າການດື່ມກາເຟຂອງແມ່ຍິງຖືພາບໍ່ກ່ຽວຂ້ອງກັບການຕື່ນໃນຕອນກາງຄືນຂອງເດັກນ້ອຍ. ນອກຈາກນີ້, ຍັງສອດຄ່ອງກັບວຽກງານວິໄຈຂອງມະຫາວິທະຍາໄລແພດປະສູດອາເມລິກາ ເຊິ່ງພົບວ່າການບໍລິໂພກກາເຟອີນໃນລະດັບປານກາງ 1 – 2 ຈອກ ຫລື ໜ້ອຍກ່ວາ 200 ມິນລີກຣາມຕໍ່ມື້ ຖືວ່າປອດໄພໃນເວລາຖືພາ, ແຕ່ແນວໃດກໍຍັງບໍ່ຈະແຈ້ງວ່າການດື່ມກາເຟອີນໃນປະລິມານຫລາຍໆໃນເວລາຖືພາ ສົ່ງຜົນກະທົບແນວໃດຫລືບໍ່. ສະນັ້ນ, ແມ່ຍິງຖືພາກໍບໍ່ຄວນດື່ມຫລາຍຈົນເກີນໄປ.
