ທະນຸຖະໜອມ ເພີ່ມພູນຄູນສ້າງນ້ຳໃຈແຫ່ງຄວາມສາມັກຄີແບບພິເສດແລະມິດຕະພາບອັນຍິ່ງໃຫຍ່
ສັດຈະທຳຊີ້ໃຫ້ເຫັນຢ່າງຈະແຈ້ງກ່ອນຈະມີມູນມໍລະດົກທີ່ລ້ຳຄ່າຕ້ອງຜ່ານການອອກແຮງງານບໍ່ຈັກວ່າເທົ່າ ໃດ ເຊິ່ງໄດ້ສ່ອງແສງໃຫ້ເຫັນເຖິງກົດເກນພາວະວິໄສຂອງຊົນຊັ້ນກຳມະຊີບກໍຄືແບບຢ່າງແຫ່ງການກຳເນີດເຕີບໃຫຍ່ຂະຫຍາຍຕົວຂອງຄວາມສາມັກຄີແບບພິເສດ, ການຮ່ວມມືຮອບດ້ານລະຫວ່າງລາວ-ຫວຽດນາມນັ້ນໄດ້ຜ່ານບົດທົດສອບແຫ່ງສົ່ງຄາມປົດປ່ອຍຊາດຈົນກາຍເປັນມູນມໍລະດົກອັນລ້ຳຄ່າທີ່ປະຊາຊົນສອງຊາດແຕ່ລະຮຸ່ນຄົນເປັນຜູ້ເສີມສ້າງ ແລະ ສືບທອດມາຮອບປັດຈຸບັນ ແລະ ນັບມື້ຍິ່ງໄດ້ຮັບການເສີມຂະຫຍາຍແຕກດອກອອກຜົນເຂົ້າສູ່ລວງເລິກ ແລະ ຮອບດ້ານ.
ລາວ-ຫວຽດນາມ ເປັນປະເທດບ້ານໃກ້ເຮືອນຄຽງຕັ້ງຢູ່ແຫຼມອິນດູຈີນ, ມີຊາຍແດນຮ່ວມກັນຍາວຢຽດແຕ່ ເໜືອຮອດໃຕ້ ພ້ອມກັນອີງຫຼັງໃສ່ສາຍພູຫຼວງທີ່ສູງສະຫງ່າ ພ້ອມກັນຊົມໃຊ້ແມ່ນ້ຳລຳເຊ ພູຜາປ່າດົງ ດິນດອນຕອນຫຍ້າ ເພື່ອດຳລົງຊີວິດ. ປະຊາຊົນສອງຊາດໄດ້ໄປມາຫາສູ່ພົວພັນ, ທຳມາຫາກິນ ແລະຄ້າຂາຍຮ່ວມກັນຢູ່ຕາມຊາຍແດນຂອງສາຍພູຫຼວງ, ເຄີຍມີມູນເຊື້ອສາມັກຄີຮັກແພງຊ່ວຍເຫຼືອກັນ, ເຄີຍກິນນ້ຳຮ່ວມສາຍ, ກິນປາຮ່ວມຫ້ວຍ, ມີວັດທະນະທໍາຮີດຄອງປະເພນີ, ແບບແຜນຊີວິດ, ຄວາມເຊື່ອຖືທີ່ຄ້າຍຄືກັນ. ດ້ວຍມູນເຊື່ອທີ່ມີມາເຫີງນານໄດ້ກໍ່ເປັນຮູບເປັນຮ່າງໃນໄລຍະແຫ່ງການຮ່ວມສຳພັນສູ້ຮົບໂດຍພາຍໃຕ້ການນຳພາຂອງພັກອິນດູຈີນ. ການປະຕິວັດລາວ ແລະ ຫວຽດນາມໄດ້ຄຽງບ່າຄຽງໄຫຼ່ຮ່ວມສຳພັນສູ້ຮົບໃນຂຸມຄອງດຽວກັນ, ສັດຕູ້ໂຕດຽວກັນ ແລະ ຈຸດໝາຍອັນດຽວກັນຄືືຄວາມເປັນເອກະລາດແຫ່ງຊາດ, ການຕີເອົາຊະນະຈັກກະພັດຜູ້ຮຸກຮານ, ເລືອດເນື້ອເຫື່ອໄຄ, ການເສຍສະລະຊີວິດເພື່ອປະເທດຊາດຂອງກອງທັບແລະ ປະຊາຊົນສອງຊາດໄດ້ກາຍເປັນແບບຢ່າງສາກົນອັນຜ່ອງໃສແຫ່ງຄວາມສຳພັນແບບພິເສດທີ່ຫາໄດ້ຍາກໃນໂລກນີ້ຄືດັ່ງປະທານ ໂຮຈີ່ມິງ ກ່າວໄວ້ວ່າ: “ຮັກຫອມກັນໝາຍໝັ້ນ ຫຼາຍສັນພູກໍປີ້ນໄຕ່ ຫຼາຍນ້ຳໃຫຍ່ ແລະ ໂຄກຄ້ອຍ ຂວາງກັ້ນກໍດຸ້ງໄປ ສອງຊາດລາວ-ຫວຽດໄດ້ ຝັງຄວາມຮັກຢູ່ໃນໃຈ ຮົ່ງຮ່າທັງແມ່ຂອງບໍ່ເລິກປຸຸນປານໄດ້”.
ພາຍຫຼັງປະເທດຊາດໄດ້ຮັບການປົດປ່ອຍ, ລາວ-ຫວຽດນາມກ້າວສູ່ໄລຍະພັດທະ ນາໃໝ່ໂດຍໄດ້ເຊັນສົນທິສັນຍາມິດຕະພາບ ແລະ ການຮ່ວມມືໃນວັນທີ 18 ກໍລະກົດ 1977 ທີ່ນະຄອນ ຫຼວງວຽງຈັນ ຊຶ່ງເປັນການວາງຮາກຖານດ້ານນິຕິກຳອັນໝັ້ນຄົງໃຫ້ແກ່ສາຍພົວພັນລາວ-ຫວຽດ, ການຮ່ວມມືຮອບດ້ານລະຫວ່າງສອງປະເທດໄດ້ຮັບການປັບປຸງ ແລະ ຂະຫຍາຍຕົວຢ່າງບໍ່ຢຸດຢັ້ງທັງລວງກວ້າງແລະ ລວງເລິກບັນລຸຄວາມເຊື່ອໃຈກັນຢ່າງໜັກແໜ້ນທັງໃນຂົງເຂດການເມືອງ, ເສດຖະ ກິດ, ສຶກສາ,ວັດທະນະ ທຳສັງຄົມ, ປ້ອງກັນຊາດປ້ອງກັນຄວາມສະຫງົບ ແລະ ການພົວພັນຕ່າງປະເທດທັງລະດັບມະຫາພາກ ແລະ ຈຸລະພາກ.
ໝາກຜົນພົ້ນເດັ່ນຂອງສາຍພົວພັນມິດຕະພາບ, ຄວາມສາມັກຄີແບບພິເສດ ແລະ ການຮ່ວມມືຮອບດ້ານລະຫວ່າງສອງຊາດລາວ-ຫວຽດນາມ ສະແດງອອກຫຼາຍດ້ານເປັນຕົ້ນ ດ້ານການເມືອງ ໄດ້ຮັບການປັບປຸ່ງແລະ ເສີມຂະຫຍາຍຢ່າງໜັກແໜ້ນ, ສ້າງຄວາມໄວ້ເນື້ອເຊື້ອໃຈເຊິ່ງກັນແລະກັນ. ຄວາມຜູກພັນລະຫວ່າງການນຳ ແລະ ປະຊາຊົນສອງປະເທດ, ບັນດາກະຊວງ, ຂະແໜງການ, ອົງການຈັດຕັ້ງນັບແຕ່ສູນກາງລົງຮອດທ້ອງຖິ່ນເລິກເຊິ່ງກວ່າເກົ່າ. ດ້ານການຮ່ວມມືການພັດທະນາຊັບພະຍາກອນມະນຸດໄດ້ເປີດກວ້ງຫຼາຍຮູບການ ເຊິ່ງຕອບສະໜອງໄດ້ຕາມຄວາມຮຽກຮ້ອງຕ້ອງການໃນການປົກປັກຮັກສາແລະສ້າງສາພັດທະນາປະເທດຊາດນັບແຕ່ສົງຄາມຈົນຮອດປັດຈຸບັນ, ຫວຽດນາມໄດ້ສ້າງພະນັກງານໃຫ້ລາວໜຶ່ງແສນກວ່າຄົນ.
ສ່ວນລາວກໍໃຫ້ບຸລິມະສິດທຶນການສຶກສານັກສຶກສາຫວຽດນາມມາຮຽນຢູ່ມະຫາວິທະຍາໄຊແຫ່ງຊາດລາວ.ດ້ານປ້ອງກັນຊາດ-ປ້ອງກັນຄວາມສະຫງົບ ໄດ້ສືບຕໍ່ປະສານກັນຢ່າງແໜ້ນແຟ້ນ, ຮັບປະກັນສະຖຽນລະ ພາບດ້ານການເມືອງ, ຄວາມເປັນລະບຽບຮຽບຮ້ອຍທາງສັງຄົມ, ດຳເນີນການປັກຫຼັກໝາຍຊາຍແດນ ແລະເປີດດ່ານຊາຍແດນເຮັດໃຫ້ຊາຍແດນສອງປະເທດກາຍເປັນຊາຍແດນແຫ່ງສັນຕິພາບ, ມິດຕະພບ ແລະການຮ່ວມມື. ດ້ານເສດຖະກິດ ຄິດສະເລ່ຍບາງປີ ວິສາຫະກິດຫວຽດນາມມາລົງທຶນຢູ່ລາວໃນອັນດັບຕົ້ນໆຂອງການລົງທຶນ, ຫຼາຍໂຄງການມີມູນຄ່າຫຼາຍພັນລ້ານໂລລາສະຫະລັດ. ດ້ານການຄ້າໄດ້ສືບຕໍ່ປະຕິບັດກົນໄກບຸລິມະສິດຜ່ອນຜັນອັດຕາພາສີເຊິ່ງກັນ ແລະ ກັນ, ການຊ່ວຍເຫຼືອຂອງຫວຽດນາມໃຫ້ແກ່ລາວໄດ້ຊ່ວຍສ້າງພື້ນຖານໂຄງລ່າງເຊັ່ນ: ການພັດທະນາຕົວເມືອງ, ຖະໜົນຫົນທາງ, ຂົວ, ຊົນລະປະທານ, ໄຟ ຟ້ານ້ຳຕົກ, ໂຮງໝໍ, ໂຮງຮຽນ, ຫໍພິພິທະພັນ ແລະ ອື່ນໆ, ອະນຸຍາດໃຫ້ລາວນຳໃຊ້ທ່າເຮືອນ້ຳເລິກໃນຫວຽດນາມ, ປະສານງານຮ່ວມມືປະຕິບັດການເພື່ອຄົ້ນຫາ, ເກັບກູ້ ແລະ ທ້ອນໂຮມອັດຖິຊ່ຽວຊານທະ ຫານອາສາສະໝັັກຫວຽດນາມທີ່ເສຍຊີວິດໃນສະໄໝສົງຄາມຢ່ແຜ່ນດິນລາວກັບຄືນປະຫຼາຍພັນກວ່າຄົນ.
ປັດຈຸບັນເຖິງວ່າສະພາບການຂອງໂລກ ຜັນປ່ຽນໄປຢ່າງສະຫລັບຊັບຊ້ອນ, ແຕ່ບົນພື້ນຖານສະຫາຍອ້າຍນ້ອງໃນໄລຍະການແພ່ລະບາດພະຍາດໂຄວິດ-19, ສອງຝ່າຍໄດ້ຊ່ວຍເຫຼືອເຊິ່ງກັນແລະກັນດ້ານວັດຖຸປັດໄຈຕ່າງໆນັບທັງສູນກາງລົງຮອດທ້ອງຖິ່ນເຊັ່ນ: ການເງິນ, ອຸປະກອນທາງການແພດ, ວັກຊີນ ແລະ ສົ່ງຊ່ຽວຊານເຂົ້າມາຊ່ວຍລາວ. ການຢ້ຽມຢາມກັນເຊິ່ງກັນແລະກັນຂອງການນຳຂັ້ນສູງໂດຍສະເພາະການມາຢ້ຽມຢາມລາວຢ່າງເປັນທາງການ ແລະ ເປັນປະເທດທຳອິດຂອງທ່ານ ຫວງຽນຊວນຟຸກ ປະທານປະເທດພາຍຫຼັງໄດ້ຮັບໜ້າທີ່ໃໝ່, ການໄປຢ້ຽມຢາມຂອງສະຫາຍ ທອງລຸນ ສີສຸລິດ ເລຂາທິການໃຫຍ່, ປະທານປະເທດໃນເດືອນມິຖຸນາຫຼັງຈໄດ້ຮັບດຳລົງຕຳແໜ່ງໃໝ່ ແລະ ການພົບປະຂອງສອງນາຍົກລັດຖະມົນຕີຕົ້ນປີ 2022 ທີ່ຮ່າໂນ້ຍ ເຫດການເຫລົ່ານີ້ໄດ້ພິສູດໃຫ້ເຫັນຢ່າງຈະແຈ້ງຕໍ່ການໃຫ້ຄວາມສຳຄັນຕໍ່ກັນ, ຄວາມ ເປັນຫ່ວງເປັນໃຍ ແລະ ຮ່ວມກັນຄຽງບ່າຄຽງໄຫຼ່ພ້ອມກັນຜ່ານຜ່າຄວາມຫຍຸ້ງຍາກອຸປະສັກນານາປະການບົນພື້ນຖານຈິດໃຈ “ເຂົ້າເມັດຫັກ ຜັກເສັ້ນດຽວ ກໍບິແບ່ງປັນກັນ”.
ສະຫຼຸບ ມູນເຊື້ອ ແລະ ຄວາມສາມັກຄີແບບພິເສດລະຫວ່າງ ລາວ-ຫວຽດນາມ, ຫວຽດນາມ-ລາວ ນັບມື້ຍິ່ງໄດ້ຮັບການຍົກສູງ, ເພີ່ມພູນຄູນສ້າງຈະເລີນງອກງາມ, ເສີມຂະຫຍາຍສູ່ລວງເລິກ ແລະ ຮອບດ້ານ. ພວກເຮົາລູກຫຼານຄົນຮຸ່ນໃໝ່ພ້ອມແລ້ວຈະເປັນຜູ້ສືບທອດ, ຖະນຸຸຖະໜອມ ແລະ ປົກປັກຮັກມູນມໍລະດົກອັນລ້ຳຄ່ານີ້ໄວ້ໃຫ້ຄົນຮຸ່ນຕໍ່ໄປ, ຕັ້ງໜ້າເພີ່ມທະວີສາຍພົວພັນມິດຕະພາບນີ້ໃຫ້ນັບມື້ຂະຫຍາຍຕົວຢ່າງໝັ້ນຄົງແລະນຳໄປສູ່ຍອດສູງໃໝ່ສອດຄ່ອງກັບແນວທາງປ່ຽນແປງໃໝ່ຂອງສອງປະເທດ, ເພື່ອຕອບສະໜອງຜົນປະໂຫຍດລວມຂອງປະຊາຊົນສອງຊາດ, ເພື່ອສັນຕິພາບ, ສະຖຽນນະພາບ, ຄວາມຮັ່ງມີຜາສຸກທັງເປັນການຍົກສູງພາລະບົດບາດຂອງສອງຊາດສູ່ເວທີພາກພື້ນແລະສາກົນ ດັ່ງຄຳສອນທີ່ປະທານ ໄກສອນ ໄດ້ກ່າວໄວ້ວ່າ: “ເຖິງພູຈະເຊາະເຈື່ອນ ແມ່ນ້ຳລຳເຊຈະເຫືອດແຫ້ງ, ແຕ່ສາຍພົວພັນມິດຕະພາບລາວ-ຫວຽດ ນາມຈະໝັ້ນຄົງທະນົງແກ່ນຊົ່ວກາລະນານ”.
