ນັກວິທະຍາສາດກັງວົນວ່າການສົ່ງແຜນທີ່ໂລກໄປໃຫ້ມະນຸດຕ່າງດາວ ອາດນໍາອັນຕະລາຍມາສູ່ໂລກໃນທີ່ສຸດ
NASA ໄດ້ສົ່ງຍານອະວະກາດ 4 ລໍາ ເດີນທາງມຸ່ງໜ້າໄປໃນຫ້ວງຈັກກະວານອັນໄກໂພ້ນ ແລະ ທີ່ສໍາຄັນຄືຢູ່ບໍລິເວນເບື້ອງຂວາຂອງຍານ ໄດ້ມີການຕິດຕັ້ງແຜ່ນໂລຫະທີ່ຈາລຶກລວຍລາຍ Pulsar map ເຊິ່ງເປັນສິ່ງທີ່ປຽບເໝືອນລາຍແທງແຜນທີ່ການເດີນທາງມາໂລກ ແລະ ຫາກມະນຸດຕ່າງດາວພົບເຫັນຍານ ແລະ ຖ້າພວກເຂົາມີຄວາມສະຫຼາດພໍທີ່ຈະຖອດລະຫັດຈາກ Pulsar map ພວກເຂົາກໍອາດຈະເດີນທາງມາໂລກມື້ໃດມື້ໜຶ່ງ ແຕ່ກໍມີກຸ່ມນັກວິທະຍາສາດທີ່ບໍ່ເຫັນພ້ອມໃນເລື່ອງນີ້ ພວກເຂົາຄາດວ່າມະນຸດຕ່າງດາວທີ່ມີພູມປັນຍາອັນສະຫຼາດ ອາດຈະເດີນທາງມາໂລກໃນແບບທີ່ບໍ່ເປັນມິດພໍປານໃດ ແລະ ພວກເຮົາອາດຈະຖືກຂ້າລ້າງເຜົ່າພັນໃນທີ່ສຸດ ແລະ ຫຼັງຈາກທີ່ຊາວໂລກໄດ້ປ່ອຍຍານອະວະກາດພ້ອມແນບແຜນທີ່ Pulsar map ໄປເມື່ອ 10 ປີຜ່ານມາ ໃນຕອນນີ້ກໍໄດ້ເວລາແລ້ວທີ່ຜູ້ສ້າງແຜນທີ່ຈະອອກມາໃຫ້ຄວາມເຫັນໃນບັນຫານີ້.
Frank Drake ອາດຈະເປັນຊື່ທີ່ບໍ່ເຄີຍຮູ້ຈັກມາກ່ອນ ແຕ່ເຂົານີ້ແຫຼະທີ່ເປັນຜູ້ສ້າງ Pulsar map ເພື່ອນໍາທາງມະນຸດຕ່າງດາວມາໂລກ ແລະ ແຜນທີ່ໄດ້ຖືກຈາລຶກລົງເທິງແຜ່ນໂລຫະ ແລ້ວນໍາໄປແປະໄວ້ຢູ່ທາງຂ້າງຂອງຍານ Pioneer 10 ແລະ Pioneer 11 ລວມເຖິງຍານ Voyager 1 ແລະ Voyager 2 ດ້ວຍ ໂດຍຫລ້າສຸດ ກໍມີທ່ານ Nadia ເຊິ່ງເປັນລູກສາວຂອງທ່ານ Frank ໄດ້ຂຽນອະທິບາຍຄວາມໝາຍແທນພໍ່ຂອງລາວ ຕໍ່ບັນຫາທີ່ນັກວິທະຍາສາດທັງຫຼາຍ ໄດ້ສະແດງຄວາມເຫັນວ່າ Pulsar map ທີ່ພໍ່ຂອງລາວສ້າງຂຶ້ນ ອາດເປັນເຫດຊັກນໍາໃຫ້ມະນຸດຕ່າງດາວມາທໍາລາຍໂລກ.
ພາບຈາລຶກແຜ່ນໂລຫະທີ່ຕິດຢູ່ກັບຍານ Pioneer 10 ແລະ Pioneer 11 ຈະເຫັນວ່າທາງເບື້ອງຂວາເປັນພາບຈາລຶກຂອງສະຣີລະມະນຸດຊາຍ-ຍິງ ສ່ວນທາງເບື້ອງຊ້າຍທີ່ເຫັນເປັນແສກໆນັ້ນຄື Pulsar map ທີ່ລະບຸພິກັດຊີ້ມາຍັງໂລກ.
Pulsar map ຖືກສ້າງຂຶ້ນໂດຍການໃຊ້ກຸ່ມຂອງດາວ Pulsar ທີ່ມີອາຍຸຍືນຍາວ ເພື່ອຊີ້ຕໍາແໜ່ງມາໂລກ (Pulsar ຄືດາວນິວຄຣອນ ທີ່ໝຸນອ້ອມຕົວເອງດ້ວຍຄວາມໄວສູງ ແລະ ແຜ່ລັງສີຄື້ນແມ່ເຫຼັກໄຟຟ້າອອກມາເປັນຈັງຫວະ) ເຊິ່ງການທີ່ມະນຸດຕ່າງດາວ ຫຼື ໃຜກໍຕາມສາມາດຖອດຄວາມໝາຍຈາກ Pulsar map ໄດ້ ກໍຈະຕ້ອງເປັນສິ່ງມີຊີວິດທີ່ມີພູມປັນຍາ ແລະ ມີຄວາມຮູ້ໃນເລື່ອງດາຣາສາດເປັນຢ່າງສູງ.
ນັກວິທະຍາສາດບາງສ່ວນມີຄວາມວິຕົກກັງວົນວ່າ: ການປະກາດຕໍາແໜ່ງຂອງໂລກໃຫ້ສິ່ງມີຊີວິດຊົງປັນຍາຈາກນອກໂລກໄດ້ຮັບຮູ້ ຖືເປັນການກະທໍາທີ່ບໍ່ສະຫຼາດພໍປານໃດ ແລະ ທ່ານ Nadia ກໍໄດ້ອອກຖະແຫຼງຂ່າວແທນພໍ່ຂອງລາວວ່າ “ໃນໄລຍະເວລາຂອງການປ່ອຍຍານນີ້ຂຶ້ນໄປຍັງຫ້ວງອະວະກາດເມື່ອ 10 ກວ່າຜ່ານມາ ຄວາມຮູ້ສຶກຂອງຄົນຍັງມີຄວາມຄິດໃນຂໍ້ບວກຢູ່ຫຼາຍ ແລະ ຄິດວ່າຫາກຈະມີມະນຸດຕ່າງດາວເດີນທາງມາຫາເຮົາ ພວກເຂົາກໍຕ້ອງມາຢ່າງເປັນມິດ ແລະ ໃນຂະນະນັ້ນ ກໍບໍ່ມີໃຜຢຸດຄິດພຽງວິນາທີດຽວວ່າ ສິ່ງນີ້ຈະນໍາອັນຕະລາຍມາສູ່ໂລກ”.
