ເລຂາທິການ UN ຮຽກຮ້ອງທົ່ວໂລກ “ສາມັກຄີແບບພະຫຸພາຄີ” ເພື່ອຜ່ານພົ້ນວິກິດ
ທ່ານ ອັນໂຕນິໂອ ກູເຕີເຣສ ກ່າວວ່າ: ໂລກກຳລັງ “ຢູ່ໃນອັນຕະລາຍ ແລະ ເຈັບປວດຢ່າງໜັກ” ແລະ ຮຽກຮ້ອງທຸກປະເທດຮ່ວມມືກັນຢ່າງຈິງຈັງ “ໃນແບບພະຫຸພາຄີຢ່າງແທ້ຈິງ”.
ວັນທີ 21 ກັນຍາ 2022, ສຳນັກຂ່າວຕ່າງປະເທດລາຍງານວ່າ: ທ່ານ ອັນໂຕນິໂອ ກູເຕີເຣສ ເລຂາທິການສະຫະປະຊາຊາດ (UN) ຖະແຫລງເປີດເວທີການອະພິປາຍທົ່ວໄປ ກອງປະຊຸມສະມັດຊາສະຫະປະຊາຊາດ (UNGA) ສະໄໝສາມັນ ຄັ້ງທີ 77 ໃນວັນທີ 20 ກັນຍາວ່າ: ວິກິດການຫລາຍເລື່ອງທີ່ໂລກກຳລັງປະສົບຢູ່ໃນປັດຈຸບັນ ມີຄວາມຮຸນແຮງເພີ່ມຂຶ້ນຢ່າງຕໍ່ເນື່ອງ ສົ່ງຜົນໃຫ້ຂະບວນການຂັບເຄື່ອນທັງໝົດ “ຕົກຢູ່ໃນອັນຕະລາຍ ແລະ ເປັນອຳມະພາດ”.
ທ່ານ ກູເຕີເຣສ ຍອມຮັບຢ່າງກົງໄປກົງມາວ່າ: ຈຸດຢືນດ້ານພູມສາດການເມືອງຂອງແຕ່ລະປະເທດທີ່ມີການແບ່ງແຍກຢ່າງຊັດເຈນເພີ່ມຂຶ້ນ ມີຜົນກະທົບຫລາຍຕໍ່ການເຮັດວຽກຂອງສະພາຄວາມໝັ້ນຄົງແຫ່ງສະຫະປະຊາຊາດ (UNSC) ກົດໝາຍສາກົນ, ຄວາມເຊື່ອໝັ້ນຂອງປະຊາຊົນທີ່ມີຕໍ່ສະຖາບັນທາງປະຊາທິປະໄຕ ແລະ ຮູບແບບຂອງການຮ່ວມມືສາກົນ.
ທັງນີ້, ເລຂາທິການ UN ຮຽກຮ້ອງທຸກປະເທດຮ່ວມມືກັນປົກປ້ອງ “ການຮ່ວມມືສາກົນແບບຫະພຸພາຄີ” ທີ່ເປີດກວ້າງຍອມຮັບຄວາມເຫັນຕ່າງດ້ວຍຄວາມເຄົາລົບເຊິ່ງກັນ ແລະ ກັນ. ເຖິງຢ່າງໃດກໍຕາມ, ທ່ານ ກູເຕີເຣສ ຕັ້ງຄຳຖາມຕໍ່ກອງປະຊຸມເຊັ່ນກັນວ່າ: ຫລືຮອດເວລາແລ້ວທີ່ຈຳເປັນຕ້ອງມີການ “ທົບທວນ ແລະ ປະຕິຮູບຢ່າງຈິງຈິງ” ຕໍ່ “ລະບຽບໂລກທີ່ຈັດຕັ້ງຂຶ້ນຫລັງສົງຄາມໂລກຄັ້ງທີສອງ” ໝາຍເຖິງສະຫະປະຊາຊາດ.
ທ່ານ ກູເຕີເຣສ ກ່າວວ່າ: “ຍັງແນມເຫັນຄວາມຫວັງ” ຂອງການຮ່ວມມືສາກົນ ດ້ວຍການສະແດງພາບເຮືອບັນທຸກສິນຄ້າລຳທຳອິດພາຍໃຕ້ຂໍ້ຕົກລົງລະຫວ່າງ ຣັດເຊຍກັບອູແກຣນ ແລະ ຕວກກີ ໂດຍມີສະຫະປະຊາຊາດເປັນຄົນກາງ ລຳລຽງທັນຍາພືດອອກຈາກທ່າເຮືອໃນທະເລດຳ ໃນເດືອນກໍລະກົດຜ່ານມາ ເຊິ່ງຈະຊ່ວຍຫລຸດຜ່ອນຄວາມຮຸນແຮງຂອງວິກິດອາຫານໂລກໄດ້.
