ໂຣນັລໂດ ຍັງບໍ່ມີແຜນອຳລາທີມຊາດໂປຣຕຸເກສ, ຕັ້ງເປົ້າລຸຍຢູໂຣ 2024
ຄຣິສຕຽນໂນ ໂຣນັລໂດ ກອງໜ້າຊຸບເປີສະຕາທີມຊາດໂປຣຕຸເກສ ແລະ ສະໂມສອນ ແມນເຊສເຕີ ຢູໄນເຕັດ ຢືນຢັນວ່າ ຍັງບໍ່ມີແຜນທີ່ຈະອຳລາທີມຊາດໂປຣຕຸເກສ ຫລັງຈົບການແຂ່ງຂັນບານໂລກ 2022.
ສຳລັບ ໂຣນັລໂດ ລົງສະໜາມໃນທີມຊາດໂປຣຕຸເກສມາແລ້ວເຖິງ 189 ນັດ ລວມທຸກລາຍການ ພ້ອມຄອງສະຖິຕິເປັນນັກເຕະທີ່ ຍິງປະຕູໃນນາມທີມຊາດຫລາຍທີ່ສຸດຂອງໂລກດ້ວຍຈຳນວນ 117 ປະຕູ.
ແນ່ນອນວ່າ ໂຣນັລໂດ ຈະເປັນກຳລັງຫລັກຂອງທີມຊາດໂປຣຕຸເກສ ໃນການແຂ່ງຂັນບານໂລກ 2022 ທີ່ພວມມາເຖິງທ້າຍປີໜີ ແຕ່ຍັງບໍ່ມີແຜນລະບຸເລື່ອງອະນາຄົດຂອງລາວກັບທີມຊາດຫລັງຈາກນັ້ນ.
ແຕ່ຫລ້າສຸດ ນັກເຕະອາຍຸ 37 ປີໃຫ້ສຳພາດວ່າລາວມີຄວາມຕັ້ງໃຈຮັບໃຊ້ທີມຊາດໄປຈົນເຖິງຢູໂຣ 2024 : ‘‘ ມັນເປັນເສັ້ນ ທາງທີ່ຍາວນານ (ໃນການຮັບໃຊ້ທີມຊາດ) ແຕ່ຂ້ອຍຢາກຈະໃຊ້ໂອກາດທີ່ຈະບອກວ່າເສັ້ນທາງຂອງຂ້ອຍຍັງບໍ່ຈົບ ຂ້ອຍຮູ້ສຶກ ມີບັນດານໃຈ ມີຄວາມທະເຍີທະຍານສູງ ແລະ ຂ້ອຍຕ້ອງການເປັນສ່ວນໜຶ່ງຂອງບານໂລກໃນຄັ້ງນີ້ ແລະ ບານເຕະຢູໂຣ 2024 ເຊັ່ນດຽວກັນ ນີ້ຄືສິ່ງທີ່ຂ້ອຍສົມມຸດຂຶ້ນມາໃນຕອນນີ້ ’’.
