ທ່ານນາຍົກລັດຖະມົນຕີ ເຄື່ອນໄຫວເຮັດວຽກຢູ່ແຂວງຈໍາປາສັກ

ໃນວັນທີ 19 ສິງຫານີ້, ທ່ານ ທອງລຸນ ສີສຸລິດ ນາຍົກລັດຖະມົນຕີ ໄດ້ເຄື່ອນໄຫວເຮັດວຽກ ແລະ ພົບປະໂອ້ລົມພະນັກງານຫລັກແຫລ່ງຂອງແຂວງຈໍາປາສັກຢູ່ທີ່ຫ້ອງວ່າການປົກຄອງແຂວງດັ່ງກ່າວ, ໂດຍທ່ານນາຍົກລັດຖະມົນຕີ ໄດ້ສະແດງຄວາມຊົມເຊີຍ, ຕີລາຄາສູງຕໍ່ຄວາມເອົາໃຈໃສ່ ແລະ ຜົນງານທີ່ອຳນາດການປົກຄອງ ແລະ ປະຊາຊົນສາມາດຍາດມາໄດ້, ພ້ອມດຽວກັນນັ້ນ ທ່ານນາຍົກລັດຖະມົນຕີ ກໍໄດ້ແຈ້ງວ່າ: ປັດຈຸບັນສະພາບການຂອງໂລກ ຍັງສືບຕໍ່ຜັນແປໄປຢ່າງສັບສົນຍາກທີ່ຈະຄາດຄະເນໄດ້ ດັ່ງນັ້ນເພື່ອຮັບປະກັນໃຫ້ການພັດທະນາເສດຖະກິດ-ສັງຄົມຂອງແຂວງໄດ້ຮັບການຂະຫຍາຍຕົວພະນັກງານຫລັກແຫລ່ງຂອງແຂວງຕ້ອງເອົາໃຈໃສ່ຕື່ມບາງດ້ານ ເປັນຕົ້ນ: ໃຫ້ສືບຕໍ່ເອົາໃຈໃສ່ແກ້ໄຂບັນຫາປະກົດການຫຍໍ້ທໍ້ຢ່າງຈິງຈັງ, ໂດຍສະເພາະແມ່ນບັນຫາຢາເສບຕິດ, ການພະນັນ, ບັນຫາການເຊື່ອຖືງົມງວາຍ ແລະ ອື່ນໆ, ເອົາໃຈໃສ່ການຄຸ້ມຄອງນໍາໃຊ້ຊັບພະຍາກອນໃຫ້ມີປະສິດທິພາບ ເພື່ອເປັນທ່າແຮງໃຫ້ແກ່ການພັດທະນາເສດຖະກິດ-ສັງຄົມຂອງແຂວງ, ສືບຕໍ່ຊຸກຍູ້ຊ່ວຍເຫລືອປະຊາຊົນ ເພື່ອຍົກລະດັບຊີວິດການເປັນຢູ່ຂອງເຂົາເຈົ້າໃຫ້ດີຂຶ້ນ, ບໍ່ວ່າເວລາໃດພັກເຮົາກໍຖືປະຊາຊົນເປັນກົກ, ສືບຕໍ່ເອົາໃຈໃສ່ຈັດຕັ້ງປະຕິບັດຄໍາສັ່ງສະບັບເລກທີ 15/ນຍ, ສະມາຊິກພັກ, ພະນັກງານຕ້ອງເປັນເຈົ້າການ ແລະ ເປັນແບບຢ່າງທີ່ດີໃຫ້ແກ່ມະຫາຊົນ ແລະ ປະຊາຊົນ, ເອົາໃຈໃສ່ແກ້ໄຂວຽກງານນະໂຍບາຍ ແລະ ສະຫວັດດີການສັງຄົມ, ສາທາລະນະສຸກ ເພື່ອສ້າງເງື່ອນໄຂ ແລະ ອໍານວຍຄວາມສະດວກໃຫ້ແກ່ພະນັກງານປະຕິວັດ, ອາວຸໂສບໍານານ ແລະ ປະຊາຊົນທຸກຊັ້ນຄົນໄດ້ເຂົ້າເຖິງການປິ່ນປົວ ແລະ ເບິ່ງແຍງສຸຂະພາບໃຫ້ດີກວ່າເກົ່າ.

ໃນໂອກາດອັນສະຫງ່າລາສີນີ້, ທ່ານ ບຸນຖອງ ດີວີໄຊ ເຈົ້າແຂວງໆຈໍາປາສັກ ໄດ້ກ່າວສະແດງຄວາມຍິນດີຕ້ອນຮັບ ແລະ ຊົມເຊີຍທ່ານນາຍົກລັດຖະມົນຕີ ທີ່ໄດ້ເດີນທາງມາເຄື່ອນໄຫວເຮັດວຽກ ແລະ ຊີ້ນຳວຽກງານຄັ້ງນີ້, ເຊິ່ງໄດ້ສະແດງໃຫ້ເຫັນເຖິງຄວາມເອົາໃຈໃສ່ຂອງພັກ ແລະ ລັດຖະບານ, ທັງເປັນການປຸກລະດົມໃຫ້ກໍາລັງໃຈໃຫ້ແກ່ຄະນະພັກ, ອໍານາດການປົກຄອງ, ພະນັກງານ-ລັດຖະກອນ ສືບຕໍ່ປົກປັກຮັກສາ, ເສີມຂະຫຍາຍມູນເຊື້ອ ແລະ ເຮັດສໍາເລັດໜ້າທີ່ການເມືອງທີ່ພັກ ແລະ ລັດຖະບານໄດ້ມອບໝາຍໃຫ້ ແລະ ໄດ້ລາຍງານສະພາບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມຂອງແຂວງ ໃຫ້ທ່ານນາຍົກລັດຖະມົນຕີໄດ້ຮັບຊາບ, ໂດຍລວມທົ່ວແຂວງສືບຕໍ່ມີສະຖຽນລະພາບທາງດ້ານການເມືອງ, ສັງຄົມມີຄວາມເປັນລະບຽບຮຽບຮ້ອຍ, ຊີວິດການເປັນຢູ່ຂອງປະຊາຊົນໄດ້ຮັບການປັບປຸງ ແລະ ຍົກລະດັບດີຂຶ້ນເປັນກ້າວໆ, ພະນັກງານ-ລັດຖະກອນ ແລະ ປະຊາຊົນບັນດາເຜົ່າຕັ້ງໜ້າປະກອບສ່ວນເຂົ້າໃນການພັດທະນາເສດຖະກິດ-ສັງຄົມຂອງແຂວງຢ່າງຕັ້ງໜ້າ, ດ້ານເສດຖະກິດສືບຕໍ່ຂະຫຍາຍຕົວດ້ວຍຈັງຫວະຕໍ່ເນື່ອງ ແລະ ໝັ້ນທ່ຽງ, ການຜະລິດພືດຜັກເປັນສິນຄ້າສາມາດສົ່ງອອກໄດ້ 146 ລ້ານໂດລາສະຫະລັດ, ທຽບໃສ່ໄລຍະດຽວກັນ ເພີ່ມຂຶ້ນ 15% ແລະ ເອົາໃຈໃສ່ຈັດຕັ້ງປະຕິບັດຄໍາສັ່ງເລກທີ 15/ນຍ ວ່າດ້ວຍ ການເພີ່ມທະວີຄວາມເຂັ້ມງວດໃນການຄຸ້ມຄອງ ແລະ ກວດກາການຂຸດຄົ້ນໄມ້, ເຄື່ອນຍ້າຍໄມ້ ແລະ ທຸລະກິດໄມ້ ໂດຍໄດ້ແຕ່ງຕັ້ງໃຫ້ທ່ານຮອງເຈົ້າແຂວງເປັນຫົວໜ້າຄະນະດັ່ງກ່າວ ເພື່ອສົມທົບເຮັດວຽກຮ່ວມກັບຄະນະສະເພາະກິດທີ່ມາຈາກສູນກາງ. ສໍາລັບຜົນກະທົບຈາກໄພພິບັດທາງທໍາມະຊາດໃນລະຫວ່າງວັນທີ 24-29 ກໍລະກົດ 2017 ໄດ້ສົ່ງຜົນໃຫ້ເນື້ອທີ່ການຜະລິດ, ພື້ນຖານໂຄງລ່າງ, ໂຮງຮຽນ, ວັດ ແລະ ເຮືອນຂອງປະຊາຊົນໄດ້ຮັບການເສຍຫາຍເປັນຈໍານວນຫລວງຫລາຍ, ສໍາລັບການແກ້ໄຂສຸກເສີນເບື້ອງຕົ້ນແຂວງໄດ້ແຕ່ງຕັ້ງຄະນະກໍາມະການຕ້ານໄພພິບັດຂັ້ນແຂວງລະດົມທຶນຮອນນໍາສັງຄົມເພື່ອຊ່ວຍແບ່ງເບົາ ບັນເທົາທຸກຜູ້ທີ່ໄດ້ຮັບຜົນກະທົບດັ່ງກ່າວເປັນຂັ້ນຕົ້ນແລ້ວ.