ແມນຊິຕີ ສົ່ງນັກກາຍຍະພາບປະກົບເບິ່ງແຍງ ຮາແລນ ເຖິງສູນຝຶກທີມຊາດນໍເວ

ແມນເຊສເຕີ ຊິຕີ ສົ່ງນັກກາຍຍະພາບຂອງສະໂມສອນ ມາຣີໂອ ພາຟັນດີ ຕາມປະກົບເບິ່ງແຍງ ເອີລິງ ຮາແລນ ກອງໜ້າຕົວເກັ່ງ ເຖິງສູນເກັບຕົວທີມຊາດນໍເວ ເພື່ອເບິ່ງແຍງດາວຍິງຄົນສຳຄັນທີ່ຍິງໄປແລ້ວ 14 ປະຕູ ຈາກ 9 ນັດໃນລະດູການນີ້.

ນໍເວ ພວມມີຕາຕະລາງລົງແຂ່ງຂັນເນຊັນລີກ ພົບກັບ ສະໂລວີເນຍ ແລະ ເຊີເບຍ ວັນທີ 24 ກັນຍາ ແລະ 27 ກັນຍານີ້ ແມນເຊສ ເຕີ ຊິຕີ ຕ້ອງການແນ່ໃຈວ່າ ຮາແລນ ຈະປະຕິບັດຕາມກິດຈະວັດການຊ້ອມຂອງສະໂມສອນທີ່ດີມາຕະຫລອດຕັ້ງແຕ່ຍ້າຍ ມາຮ່ວມທີມ.

ແນວໃດກໍຕາມ ສະເຕລ ໂຊລບັກເຄນ ຜູ້ຈັດການທີມຊາດນໍເວ ຢືນຢັນວ່າ : ພາຟັນດີ ທີ່ເຮັດວຽກກັບແມນຊິຕີ ມາຕັ້ງແຕ່ ປີ 2016 ຈະເຮັດວຽກເປັນນັກກາຍຍະພາບຄົນທີ 3 ຂອງທີມ ບໍ່ໄດ້ເບິ່ງແຍງພຽງ ຮາແລນ ຄົນດຽວ ແຫລ່ງຂ່າວເປີດເຜີຍວ່າ ແມນຊິຕີ ກະຕືລືລົ້ນທີ່ຈະສ້າງຄວາມສຳພັນອັນດີກັບ ນໍເວ ແລະ ພ້ອມແບ່ງປັນແນວທາງປະຕິບັດທີ່ໄດ້ຜົນດີກັບ ຮາແລນ.