ສີລັງກາກຽມສະເໜີແຜນປັບໂຄງສ້າງໜີ້ ແລະ ແຜນຊ່ວຍເຫລືອຈາກ IMF ວັນສຸກນີ້
ກະຊວງການເງິນສີລັງກາເປີດເຜີຍວ່າ: ສີລັງກາກຽມນຳສະເໜີບັນຫາທາງເສດຖະກິດທັງໝົດ ແລະ ແຜນສຳລັບການປັບໂຄງສ້າງໜີ້ຕ່າງໆ ລວມທັງເງິນທຶນຊ່ວຍເຫລືອຈາກກອງທຶນການເງິນສາກົນ (IMF) ມູນຄ່າຫລາຍພັນລ້ານໂດລາ ຕໍ່ເຈົ້າໜີ້ຕ່າງປະເທດໃນວັນທີ 23 ກັນຍານີ້.
ຕະຫລອດໄລຍະເວລາຫລາຍປີຜ່ານມາຂອງການບໍລິຫານເສດຖະກິດທີ່ຜິດພາດ ບວກກັບການລະບາດຂອງພະຍາດໂຄວິດ-19 ເຮັດໃຫ້ສີລັງກາຕ້ອງຕົກຢູ່ໃນສະພາບວິກິດເສດຖະກິດຢ່າງຮຸນແຮງທີ່ສຸດນັບແຕ່ໄດ້ຮັບເອກະລາດຈາກອັງກິດໃນປີ 1948 ສົ່ງຜົນໃຫ້ສີລັງກາຜິດນັດຊຳລະໜີ້ພັນທະບັດຕ່າງປະເທດ.
ກະຊວງການເງິນສີລັງກາລະບຸໃນຖະແຫລງການຜ່ານທາງບໍລິສັດກົດໝາຍ Clifford Chance ວ່າ: ການເຈລະຈາທາງອອນລາຍກ່ຽວກັບການປັບໂຄງສ້າງໜີ້ກັບເຈົ້າໜີ້ຈາກຕ່າງປະເທດນັ້ນ ຈະມີຂຶ້ນໃນວັນທີ 23 ກັນຍາ ເຊິ່ງຈະເປີດໂອກາດໃຫ້ຜູ້ເຂົ້າຮ່ວມສາມາດຊັກຖາມຂໍ້ສົງໄສໃນເລື່ອງຕ່າງໆໄດ້ ໂດຍເນື້ອໃນຂອງການເຈລະຈາຄັ້ງນີ້ຈະເປັນການລາຍງານຄວາມຄືບໜ້າຫລ້າສຸດໃນການພັດທະນາເສດຖະກິດລະດັບມະຫາພາກຂອງສີລັງກາໃຫ້ເຈົ້າໜີ້ຕ່າງປະເທດໄດ້ຮັບຮູ້ ລວມທັງເປົ້າໝາຍຫລັກຂອງການປະຕິຮູບ ເຊິ່ງໄດ້ຕົກລົງກັບ IMF ໄວ້ ແລະ ແຜນການຂັ້ນຕໍ່ໄປໃນຂະບວນການປັບປຸງໂຄງສ້າງໜີ້ຂອງປະເທດ. ພ້ອມຊີ້ໃຫ້ເຫັນເຖິງສະຖານະການທີ່ຍາກລຳບາກທີ່ສີລັງກາກຳລັງຜະເຊີນໃນຕອນນີ້.
ທັງນີ້, ປະຊາຊົນຊາວສີລັງກາ ເຊິ່ງເຄີຍລວມຕົວກັນຂັບໄລ່ທ່ານ ໂຄຮາກຍະ ຣາຊປັກສະ ອະດີດປະທານາທິບໍດີສີລັງກາ ຈົນຕ້ອງຫລົບໜີອອກນອກປະເທດນັ້ນ ຍັງຕ້ອງຍອມຮັບປົກຄອງຂອງທ່ານ ຣານິລ ວິກຳສິງຫາ ຜູ້ເຊິ່ງຫລາຍຄົນເບິ່ງວ່າເປັນກຸ່ມການເມືອງດຽວກັນ ແລະ ກຳລັງຜະເຊີນການຕໍ່ຕ້ານຢ່າງຮຸນແຮງ.
