ຫ້ອງວ່າການສູນກາງພັກ ຕີລາຄາວຽກງານກໍ່ສ້າງໜ່ວຍ ພັກປອດໃສ ເຂັ້ມແຂງ ໜັກແໜ້ນ

ໃນຕອນເຊົ້າ ວັນທີ 19 ກັນຍາ2022, ຫ້ອງວ່າການສູນກາງພັກ(ຫສພ) ໄດ້ດໍາເນີນການ ສະຫລຸບຕີລາຄາວຽກງານກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ແລະ ຈັດພິທີ ມອບ-ຮັບ ໃບຢັ້ງຢືນ ໂດຍການເປັນປະທານຂອງ ສະຫາຍ ທອງສະລິດ ມັງໜໍ່ເມກ ເລຂາທິການສູນກາງພັກ, ເລຂາຄະນະພັກ, ຫົວໜ້າຫ້ອງວ່າການສູນກາງພັກ; ມີບັນດາສະຫາຍໃນຄະນະພັກ, ຄະນະໜ່ວຍພັກ, ສະມາ ຊິກພັກສົມບູນ ແລະ ສຳຮອງ ເຂົ້າຮ່ວມທັງໝົດຈຳນວນ 166 ສະຫາຍ, ຍິງ 67ສະຫາຍ.

ສະຫາຍ ກິ່ງເພັດ ມົງຄຸນວິໄລ ຄະນະປະຈຳພັກ, ຮອງຫົວໜ້າຫ້ອງວ່າການສູນກາງພັກ ໄດ້ຜ່ານບົດສະຫລຸບຕີລາຄາການກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ທົ່ວອົງຄະນະພັກຫ້ອງວ່າການສູນກາງພັກ; ຄະນະປະຈຳພັກ ຫສພ ໄດ້ມີມະຕິຕົກລົງຮັບຮອງເອົາແຜນ ການກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ປະຈໍາປີ 2021 ແລະ ວາງທິດທາງແຜນການໃນຕໍ່ໜ້າ ປະຈໍາປີ 2022; ຜ່ານການກວດກາ, ຕີລາຄາ ແລະ ປະເມີນຜົນຕໍ່ 06 ໜ່ວຍພັກແລ້ວ ຄະນະປະຈໍາພັກ ໄດ້ເຫັນຮັບຮອງເອົາ 04 ໜ່ວຍພັກ ທີ່ຄົບມາດຖານເງື່ອນໄຂເປັນໜ່ວຍພັກປອດໃສ, ເຂັ້ມແຂງ, ໜັກແໜ້ນ ປະຈຳປີ 2021 ຄື: ໜ່ວຍພັກກົມຄົ້ນຄວ້າສັງລວມ, ໜ່ວຍພັກກົມກວດກາ, ໜ່ວຍພັກກົມພິພິທະພັນ ໄກສອນ ພົມວິຫານ ແລະ ອະນຸສອນການນຳປະຕິວັດ ແລະ ໜ່ວຍພັກກົມທ້ອງຖິ່ນຮາກຖານ. ສະຫາຍ ຄຳພອນ ສຸວັນນະແສງ, ຄະນະພັກຫົວໜ້າກົມຈັດຕັ້ງ-ພະນັກງານ ຫສພ ໄດ້ຂຶ້ນຜ່ານມະຕິຕົກລົງ ຂອງຄະນະປະຈຳພັກ ຫສພ ວ່າດ້ວຍການຮັບຮອງເອົາ ໜ່ວຍພັກປອດໃສ, ເຂັ້ມ ແຂງ, ໜັກແໜ້ນ ປະຈຳປີ 2021 ແລະ ມະຕິຕົກລົງ ຂອງຄະນະປະຈຳພັກ ຫສພ ວ່າດ້ວຍການຮັບຮອງເອົາ ແຜນການກໍ່ສ້າງໜ່ວຍພັກປອດໃສ, ເຂັ້ມ ແຂງ, ໜັກແໜ້ນ ປະຈຳປີ 2022 ເຊິ່ງມີໜ່ວຍພັກຮາກຖານທີ່ໄດ້ມາດຕະຖານເງື່ອນໄຂ ຈໍານວນທັງໝົດ 12 ໜ່ວຍພັກ ພ້ອມທັງໄດ້ປະກາດຈັບມືແຂ່ງຂັນ ໃນການສ້າງໜ່ວຍພັກ ປອດໃສ, ເຂັ້ມແຂງ, ໜັກແໜ້ນ ໃນປີ 2022.

ໃນໂອກາດນີ້, ສະຫາຍ ທອງສະລິດ ມັງໜໍ່ເມກ ໄດ້ໃຫ້ກຽດມອບໃບຢັ້ງຢືນໜ່ວຍພັກປອດໃສ, ເຂັ້ມແຂງ, ໜັກແໜ້ນ ປະຈຳປີ 2021, ພ້ອມທັງໂອ້ລົມຕໍ່ພິທີດັ່ງກ່າວ ແລະ ມີບາງຄໍາເຫັນຊີ້ນຳຕື່ມ ເປັນຕົ້ນ: ໃຫ້ເພີ່ມທະວີປັບປຸງກົງຈັກການຈັດຕັ້ງໃຫ້ມີຄວາມໜັກແໜ້ນ, ເຂັ້ມແຂງ, ປັບປຸງຍົກລະດັບສະ ມາຊິກພັກ-ພະນັກງານ ໃຫ້ຮັບປະກັນທາງດ້ານປະລິມານ ແລະ ຄຸນນະພາບ, ຖືເອົາການຍົກສູງຄຸນນະ ພາບໃນການນໍາພາຢ່າງຮອບດ້ານ ເປັນໜ້າທີ່ຍຸດທະສາດທາງດ້ານການຈັດຕັ້ງ ແລະ ແມ່ນຄວາມຮັບຜິດ ຊອບໂດຍກົງຂອງຄະນະພັກແຕ່ລະຂັ້ນ, ສະມາຊິກພັກທຸກສະຫາຍ ແລະ ພະນັກງານທຸກຄົນ, ຕ້ອງຍົກສູງການນໍາພາຮອບດ້ານຂອງການຈັດຕັ້ງຮາກຖານພັກ ແນໃສ່ສ້າງພັກໃຫ້ປອດໃສ, ເຂັ້ມແຂງ, ໜັກແໜ້ນ, ເພີ່ມທະວີຍົກສູງລະດັບຄວາມຮູ້, ຄວາມສາມາດ ທາງດ້ານທິດສະດີມາກ-ເລນິນ, ດ້ານວິຊາສະ ເພາະໃນທຸກໆດ້ານ ໃຫ້ແກ່ສະມາຊິກພັກ-ພະນັກງານໃຫ້ສູງຂຶ້ນເລື້ອຍໆ ເພື່ອເຮັດສໍາເລັດໜ້າທີ່ການເມືອງຕາມພາລະບົດບາດທີ່ພັກໄດ້ມອບໝາຍໃຫ້. ວຽກງານກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ເປັນວຽກຍຸດທະສາດຂອງພັກ, ເປັນວຽກທີ່ຕ້ອງເຮັດຢ່າງຕໍ່ເນື່ອງ, ເຮັດຢ່າງເປັນລະບົບໂດຍມີການຈັດຕັ້ງ, ມີການນໍາພາ-ຊີ້ນໍາຢ່າງຄັກແນ່ ແລະ ຕ້ອງເຮັດຢ່າງທົ່ວເຖິງ, ແທດເໝາະກັບສະພາບຕົວຈິງ ແລະ ຈຸດພິເສດຂອງບັນດາໜ່ວຍພັກ.

ການປັບປຸງ, ການກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ແມ່ນເພື່ອຍົກສູງຄຸນນະພາບຂອງສະມາຊິກພັກ ແລະ ການຈັດຕັ້ງພັກ ເຮັດໃຫ້ໜ່ວຍພັກມີຄວາມປອດໃສທາງດ້ານການເມືອງ, ແນວຄິດ, ການຈັດຕັ້ງ ແລະ ແບບແຜນວິທີນໍາພາອັນຖືກຕ້ອງ. ສະນັ້ນ, ໜ່ວຍພັກແມ່ນມີບົດບາດສໍາຄັນຕໍ່ວຽກງານກໍ່ສ້າງໜ່ວຍພັກປອດໃສ, ເຂັ້ມແຂງ, ໜັັກແໜ້ນ ເນື່ອງຈາກວ່າໜ່ວຍພັກເປັນຜູ້ເຮັດໜ້າທີ່ນໍາພາ-ຊີ້ນໍາກົມໂດຍກົງ ໃນການປະຕິບັດພາລະບົດບາດ ເປັນເສນາທິການໃຫ້ແກ່ຄະນະພັກ ໃນການຜັນຂະຫຍາຍ ບັນດາມະຕິ, ຄໍາສັ່ງ, ແນວທາງນະໂຍບາຍ, ລະບຽບກົດໜາຍຕ່າງໆ ໃຫ້ປະກົດຜົນເປັນຈິງ; ການປັບປຸງວຽກງານການກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ແມ່ນມີຄວາມຈໍາເປັນຢ່າງຍິ່ງເພາະວ່າຖ້າບັນດາໜ່ວຍພັກມີຄວາມເຂັ້ມແຂງ ການເຮັດວຽກເປັນເສນາທິການໃຫ້ແກ່ຄະນະພັກ ກໍ່ມີຄວາມເຂັ້ມແຂງ, ການຈັດຕັ້ງພັກກໍເຂັ້ມແຂງ, ກົງກັນຂ້າມຖ້າບັນດາໜ່ວຍພັກບໍ່ເຂັ້ມແຂງ ຈະເຮັດໃຫ້ການຈັດຕັ້ງຢູ່ບ່ອນນັ້ນບໍ່ມີຄວາມເຂັ້ມແຂງ ກ້າວໄປເຖິງຜົນກະທົບຕໍ່ການຄົງຕົວ ແລະ ການຂະຫຍາຍຕົວຂອງອົງການດັ່ງກ່າວ.

ຢາກເຮັດບັນດາໜ້າວຽກດັ່ງກ່າວນັ້ນ, ຕ້ອງໄດ້ເພີ່ມທະວີປັບປຸງ ວຽກງານການເມືອງແນວຄິດພາຍໃນໜ່ວຍພັກ ໃຫ້ມີຄວາມໜັກແໜ້ນ, ເອົາໃຈໃສ່ປັບປຸງການຈັດຕັ້ງໃຫ້ມີຄວາມເຂັ້ມແຂງ, ເພີ່ມທະວີປັບປຸງແບບແຜນນໍາພາ ໃຫ້ມີຄວາມສະຫົງບ, ສືບຕໍ່ເສີມຂະຫຍາຍມູນເຊື້ອຄວາມສາມັກຄີ, ຄວາມເປັນປຶກແຜ່ນແໜ້ນໜາພາຍໃນໜ່ວຍພັກ ບົນພື້ນຖານແນວທາງນະໂຍບາຍຂອງພັກ; ຕ້ອງມີການຕິດຕາມກວດກາຢ່າງເປັນລະບົບ ແລະ ເຮັດຢ່າງເປັນປົກກະຕິ.