6 ບັນຫາສຳຄັນ ທີ່ປະທານປະເທດ ເນັ້ນຕໍ່ກອງປະຊຸມ ສະຫຼຸບຂະບວນການແຂ່ງຂັນ ຮັກຊາດ ແລະ ພັດທະນາ

ທ່ານ ທອງລຸນ ສີສຸລິດ ເລຂາທິການໃຫຍ່ ຄະນະບໍລິຫານງານສູນກາງພັກ ປະທານປະເທດ ແຫ່ງ ສປປ ລາວ ໄດ້ມີຄຳເຫັນໂອ້ລົມຕໍ່ກອງປະຊຸມສະຫຼຸບຕີລາຄາຂະບວນການແຂ່ງຂັນຮັກຊາດ ແລະ ພັດທະນາ ໃນວັນທີ 16 ກັນຍາ ນີ້ ທີ່ຫໍປະຊຸມແຫ່ງຊາດ ໂດຍໄດ້ເນັ້ນ 6 ບັນຫາສຳຄັນ ເພື່ອຊຸກຍູ້ໃຫ້ແກ່ຂະບວນການແຂ່ງຂັນດັ່ງກ່າວ ໃນຕໍ່ໜ້າ ກໍຄືແຕ່ນີ້ ເຖິງ ປີ 2025.

ທ່ານປະທານປະເທດ ໄດ້ກ່າວວ່າ: ການແຂ່ງຂັນ “ຮັກຊາດ ແລະ ພັດທະນາ” ໃນເນື້ອແທ້ ແມ່ນການສ້າງ ແລະ ຍົກລະດັບ ແນວຄິດ-ວັດທະນະທໍາຂອງຄົນລາວ ແລະ ຂອງສັງຄົມລາວ ແນໃສ່ສ້າງຄົນໃໝ່ ກ້າວໄປຕາມເສັ້ນທາງສັງຄົມນິຍົມ ທີ່ມີນໍ້າໃຈຮັກຊາດ, ຮັກລະບອບປະຊາທິປະໄຕປະຊາຊົນ, ມີລະບຽບວິໄນ, ປະດິດສ້າງ, ສ້າງໄດ້ຜະລິດຕະພັນໃໝ່, ສ້າງໄດ້ຂະບວນການໃໝ່ ທີ່ກ້າວໜ້າ, ບຸກທະລຸໄປສູ່ແບບແຜນ ທີ່ຕິດພັນກັບຄຳຂວັນ: “ຕົນເພື່ອສັງຄົມ ແລະ ສັງຄົມເພື່ອຕົນ” ຫຼື ທີ່ພວກເຮົາເຄີຍເວົ້າກັນຜ່ານມາວ່າຖ້າເຮົາຢືດໝັ້ນຈິດໃຈ: “ແຕ່ລະຄົນ ເພື່ອທຸກຄົນ, ທຸກຄົນ ເພື່ອແຕ່ລະຄົນ”; ໝາຍຄວາມວ່າ ຂໍ້ແຂ່ງຂັນຮັກຊາດ ແລະ ພັດທະນາ ແມ່ນຂະບວນການຍູ້ໜູນໃຫ້ແກ່ການຄຸ້ມຄອງສັງຄົມ ຂອງລະບອບປະຊາທິປະໄຕປະຊາຊົນເຮົາ, ມັນແມ່ນການສົມທົບຢ່າງກົມກຽວ ແລະ ກໍ່ໃຫ້ເກີດສາຍພົວພັນອັນສະໜິດແໜ້ນ ລະຫວ່າງຜົນປະໂຫຍດຂອງສັງຄົມ, ຜົນປະໂຫຍດລວມໝູ່ ແລະ ຜົນປະໂຫຍດຂອງສ່ວນບຸກຄົນ, ເຮັດໃຫ້ຜົນປະໂຫຍດເຫຼົ່ານັ້ນ ກາຍເປັນກໍາລັງແຮງ ທີ່ຊຸກດັນໃຫ້ແກ່ການ “ແຂ່ງຂັນ” ການແຂ່ງຂັນແມ່ນການແຂ່ງຂັນ ເພື່ອການພັດທະນາເສດຖະກິດ-ສັງຄົມ ຢູ່ປະເທດເຮົາ ໃຫ້ສືບຕໍ່ຂະຫຍາຍຕົວຢ່າງບໍ່ຢຸດຢັ້ງ.

ໃນໂອກາດອັນມີຄວາມໝາຍສໍາຄັນນີ້, ທ່ານປະທານປະເທດ ກໍໄດ້ຝາກບາງຄຳເຫັນ ຕໍ່ບັນດາທ່ານ ແລະ ປະຊາຊົນລາວໃນທົ່ວປະເທດ ກໍຄື 6 ບັນຫາສຳຄັນທີ່ຢາກເນັ້ນໜັກ ຄືດັ່ງນີ້:

1. ຂໍໃຫ້ສືບຕໍ່ ປຸກລະດົມທົ່ວປວງຊົນລາວບັນດາເຜົ່າ, ຊັ້ນຄົນຕ່າງໆໃນທົ່ວປະເທດ ພ້ອມກັນຕັ້ງໜ້າເຂົ້າຮ່ວມໃນຂະບວນການແຂ່ງຂັນ «ຮັກຊາດ ແລະ ພັດທະນາ» ຕາມຄາດໝາຍ ໃຫ້ໄວ, ໃຫ້ດີ, ໃຫ້ຫຼາຍ ແລະ ໃຫ້ຖືກຕ້ອງຕາມກົດໝາຍ. ການແຂ່ງຂັນສ້າງຂະບວນການຕ້ອງດໍາເນີນໄປຢ່າງເປັນປົກກະຕິ-ຕໍ່ເນື່ອງ ແລະ ຫຼາຍຮູບ, ຫຼາຍແບບ, ຫຼາຍລະດັບ; ຕ້ອງຜັນຂະຫຍາຍໃຫ້ເຂົ້າສູ່ລວງເລິກກວ່າເກົ່າ ເປັນຕົ້ນ ສ້າງໃຫ້ມີຜະລິດຕະພັນໃໝ່ເກີດຂຶ້ນ, ເສີມຂະຫຍາຍຫົວຄິດປະດິດສ້າງ, ການປະດິດຄິດແຕ່ງໃໝ່ ແລະ ນຳໃຊ້ນະວັດຕະກໍາໃໝ່ ເຂົ້າສູ່ການຜະລິດໃຫ້ຫຼາຍ.

2. ຄະນະພັກ, ອົງການປົກຄອງແຕ່ລະຂັ້ນ ຕ້ອງສືບຕໍ່ປ່ຽນແປງຕົນເອງຢ່າງບໍ່ຢຸດຢັ້ງ ຕາມຈິດໃຈ ສ້າງການຫັນປ່ຽນທີ່ແຂງແຮງ, ເລິກເຊິ່ງ ແລະ ຮອບດ້ານ ຕອບສະໜອງຄວາມຮຽກຮ້ອງຕ້ອງການ ໃນການຍົກສູງຄວາມສາມາດ ແລະ ຄຸນະພາບ ໃນການນໍາພາຂອງພັກ ໃນໄລຍະໃໝ່; ການແຂ່ງຂັນຮັກຊາດ ແລະ ພັດທະນາ ຂໍໃຫ້ເປັນການທົດສອບຄວາມສາມາດໃນການນໍາພາ ຂອງຄະນະພັກ ແລະ ອົງການປົກຄອງແຕ່ລະຂັ້ນ ໃນໄລຍະໃໝ່.

3. ການແຂ່ງຂັນ ຮັກຊາດ ແລະ ພັດທະນາ ຕ້ອງເຮັດໃຫ້ແຕ່ລະຄົນ, ແຕ່ລະຄອບຄົວ ແລະ ສັງຄົມ ມີຄວາມພາກພູມໃຈໃນຄວາມເປັນລາວ-ເປັນຄົນລາວ, ມີສະຕິຊາດ ເອກະພາບ, ເອກະລາດ, ເປັນເຈົ້າຕົນເອງ ໃຫ້ໄດ້ຮັບການເຊີດຊູ ຂຶ້ນສູ່ລະດັບສູງ, ຜະລິດ ແລະ ຊົມໃຊ້ ຜະລິດຕະພັນພາຍໃນຂອງພວກເຮົາໃຫ້ຫຼາຍ, ແກ້ໄຂຄວາມຫຍໍ້ທໍ້ດ້ານເສດຖະກິດ, ຕີຖອຍ ແລະ ກໍາຈັດປັດເປົ່າສິ່ງຫຍໍ້ທໍ້ຕ່າງໆ, ສ້າງສັງຄົມໃຫ້ເປັນສັງຄົມທີ່ເພີ່ງຕົວເອງ, ກຸ້ມຕົວເອງ, ສ້າງຄວາມເຂັ້ມແຂງດ້ວຍຕົວເອງ ແລະ ມີຄວາມເອກອ້າງ ເຖິງຄົນລາວ ແລະ ສັງຄົມລາວ ທີ່ໂອບເອື້ອອາລີ, ເອື້ອເຟື້ອເພື່ອແຜ່…

4. ຕ້ອງສ້າງຕົວແບບດີເດັ່ນ, ນໍາໜ້າ ຈາກນ້ອຍຫາໃຫຍ່, ຈາກແຕ່ລະດ້ານດຽວກ້າວສູ່ຫຼາຍດ້ານ ແລະ ຂະຫຍາຍອອກໃຫ້ກວ້າງຂວາງ, ມີຄຸນນະພາບ, ຍືນຍົງ ແລະ ຂະຫຍາຍຕົວ; ຕ້ອງໄດ້ຍົກລະດັບຂຶ້ນ ໃນແຕ່ລະໄລຍະ ເພື່ອສ້າງຕົວແບບການພັດທະນານັ້ນ; ບໍ່ມີອັນໃດທີ່ເກີດຂຶ້ນແລ້ວສົມບູນແບບ ແຕ່ຖ້າເກີດມີໜໍ່ແໜ່ງ ຕ້ອງຈັບເອົາໜໍ່ແໜງນັ້ນພັດທະນາໄປເພື່ອຄວາມສົມບູນແບບ ຈຶ່ງຖືວ່າໄດ້ຜົນ. ດັ່ງນັ້ນ, ທຸກອັນຕ້ອງຜ່ານການທົດລອງ, ທົດສອບ ແລະ ສະຫຼຸບ ຖອດຖອນບົດຮຽນ, ນຳໃຊ້ຕໍ່ຍອດ ເພື່ອຂະຫຍາຍອອກໄປໄດ້ກວ້າງຂວາງ ແລະ ກາຍເປັນຂະບວນການໄດ້.
ບົນພື້ນຖານນັ້ນ ພວກເຮົາ, ຕ້ອງຕັ້ງໜ້າເປັນເຈົ້າການ ແລະ ມີຄວາມຮັບຜິດຊອບສ້າງບັນດາຕົວແບບດີເດັ່ນດ້ານຕ່າງໆ ຢູ່ແຕ່ລະຂະແໜງການ, ແຕ່ລະທ້ອງຖິ່ນ-ຮາກຖານ, ທັງຕ້ອງຮູ້ສະຫຼຸບສັງລວມບົດຮຽນ ຈາກຕົວແບບນັ້ນ ໃຫ້ທັນການ, ກວ້າງຂວາງ, ຖ້າມີຕົວແບບທີ່ດີ ແມ່ນຢາກໃຫ້ພະຫະນະ ຂອງສື່ມວນຊົນເຜີຍແຜ່ ຫຼື ລວມທັງເອົາເຂົ້າເປັນຫຼັກຕຳລາການຮຽນການສອນ ເພື່ອຜັນຂະຫຍາຍອອກ, ເຮັດໃຫ້ “ຕົວແບບ” ເຫຼົ່ານັ້ນ ນັບມື້ນັບແຜ່ຂະຫຍາຍສູ່ທຸກຂະແໜງການ, ບໍລິເວນ ແລະ ທົ່ວປະເທດ; ອັນນັ້ນ ກໍເປັນບົດຮຽນໃຫ້ພວກເຮົາ ສ້າງຂະບວນການແຂ່ງຂັນຮັກຊາດ ແລະ ພັດທະນາ ໃຫ້ເຂົ້າສູ່ລວງເລິກແທ້.

5. ໃຫ້ຖືເອົາການຕິດຕາມ, ຊຸກຍູ້, ກວດກາ ແລະ ຕີລາຄາວຽກດີ, ຄົນເດັ່ນ ທັງຈັດຕັ້ງຍ້ອງຍໍ ໃຫ້ຖືກຄົນ, ຖືກວຽກ ແລະ ທັນການ ເປັນໜຶ່ງໃນບັນດາມາດຕະການກະຕຸ້ນ ເພື່ອສົ່ງເສີມຂະບວນການ ໃຫ້ຂະຫຍາຍຕົວ ນັບມື້ກວ້າງ ຂວາງ ແລະ ແຂງແຮງ ເຮັດໃຫ້ກາຍເປັນການປຸກລະດົມຄວາມຟົດຟື້ນ, ຫ້າວຫັນແທ້, ຜູ້ທີ່ມີຫົວຄິດປະດິດສ້າງຢ່າງແຂງແຮງເຜີຍແຜ່ໃຫ້ປະຊາຊົນໄດ້ກວ້າງຂວາງ ແລະ ຮຽນຮູ້ໃນທົ່ວສັງຄົມ ກໍ່ໃຫ້ເປັນຕົວເດັ່ນ ແລະ ຍ້ອງຍໍທັນທີໂລດ.

6.ບັນດາອົງການຈັດຕັ້ງໃນທົ່ວລະບົບການເມືອງ ຕ້ອງໄດ້ສືບຕໍ່ເພີ່ມທະວີ ການນໍາພາຊີ້ນໍາ, ບັນຊາ ແລະ ຕິດຕາມ, ກວດກາ ການຜັນຂະຫຍາຍຂໍ້ແຂ່ງຂັນ ຮັກຊາດ ແລະ ພັດທະນາ ເປັນທັງທິດທາງລວມ ແລະ ທັງເປັນເນື້ອໃນວຽກງານ ຂອງຂົງເຂດ ຫຼື ຂະແໜງການຕົນ ຢ່າງຈະແຈ້ງ, ຖືເປັນຫຼັກການ-ຄວາມຮັບຜິດຊອບ ຊີ້ນຳ-ນຳພາ ໃນການເຄື່ອນໄຫວ ແລະ ປຸກລະດົມຂະບວນການ, ຖືເປັນຄວາມຮັບຜິດຊອບການເມືອງຂອງຕົນ.