ອາເມລິກາຢຸດອອກວີຊາຊົ່ວຄາວ ໃຫ້ພົນລະເມືອງຣັດເຊຍ
ລັດຖະບານອາເມລິກາຢຸດການອອກວີຊາປະເພດຊົ່ວຄາວໃຫ້ພົນລະເມືອງຣັດເຊຍເປັນເວລາ 1 ອາທິດ ໂດຍຈະກັບມາໃຫ້ບໍລິການອີກໃນວັນທີ 31 ສິງຫາ, ແຕ່ຕ້ອງຍື່ນຄຳຮ້ອງຢູ່ສະຖານເອກອັກຄະລັດຖະທູດໃນນະຄອນຫລວງມົດສະກູເທົ່ານັ້ນ.
ສຳນັກຂ່າວຕ່າງປະເທດລາຍງານຈາກນະຄອນຫລວງມົດສະກູ ປະເທດຣັດເຊຍ ໃນວັນທີ 21 ສິງຫາວ່າ: ສະຖານເອກອັກຄະລັດຖະທູດອາເມລິກາປະຈຳນະຄອນຫລວງມົດສະກູອອກຖະແຫລງການວ່າ: ຈະເລີ່ມຫລຸດລະດັບການອອກວີຊາຊົ່ວຄາວ (Non-Immigrant Visa) ໃຫ້ແກ່ພົນລະເມືອງຣັດເຊຍ ນັບແຕ່ວັນທີ 21 ສິງຫາ ກ່ອນຢຸດທົ່ວປະເທດໃນວັນທີ 23 ສິງຫາ ແລະ ຈະກັບມາໃຫ້ບໍລິການອີກໃນວັນທີ 31 ສິງຫານີ້ເປັນຕົ້ນໄປ, ແຕ່ຈຳກັດສະເພາະສະຖານເອກອັກຄະລັດຖະທູດປະຈຳນະຄອນຫລວງມົດສະກູເທົ່ານັ້ນ. ໝາຍຄວາມວ່າປະຊາຊົນໃນນະຄອນເຊນປີເຕີສະເບິກ, ເມືອງເຍຄາເທຣິນເບິກ ແລະ ເມືອງວະລາດິວອສຕອກ ຕ້ອງເດີນທາງເຂົ້າມານະຄອນຫລວງມົດສະກູ ເພື່ອຍື່ນຄຳຮ້ອງຂໍວີຊາ ຈາກທີ່ເຄີຍໃຊ້ບໍລິການໄດ້ຢູ່ສະຖານກົງສຸນອາເມລິກາປະຈຳທັງສາມເມືອງ.
+ ທ່ານ ປູຕິນ ສັ່ງຫລຸດຈຳນວນ ນັກການທູດອາເມລິກາຢູ່ຣັດເຊຍຄັ້ງໃຫຍ່
+ ຣັດເຊຍເບິ່ງວ່າການຂວ້ຳບາດ ຈາກອາເມລິກາເປັນສົງຄາມ ການຄ້າເຕັມຮູບແບບ
ທັງນີ້, ຖະແຫລງການລະບຸເຫດຜົນຂອງມາດຕະການດັ່ງກ່າວວ່າ: ເປັນຜົນມາຈາກການທີ່ລັດຖະບານມົດສະກູມີຄຳສັ່ງໃນຕົ້ນເດືອນນີ້ ຫລຸດຈຳນວນເຈົ້າໜ້າທີ່ການທູດອາເມລິກາເຖິງ 755 ຄົນ ຫລື 2 ໃນ 3 ຂອງຈຳນວນທີ່ມີຢູ່ໃນປັດຈຸບັນ ພາຍໃນວັນທີ 1 ກັນຍານີ້ ເພື່ອໃຫ້ເຫລືອຈຳນວນເທົ່າກັບເຈົ້າໜ້າທີ່ການທູດຂອງຣັດເຊຍໃນອາເມລິກາຄື 455 ຄົນ ເພື່ອຕອບໂຕ້ທີ່ສະພາຄອງເກຣດໃນນະຄອນຫລວງວໍຊິງຕັນອອກກົດໝາຍຂວ້ຳບາດຣັດເຊຍສະບັບໃໝ່.
