ການ​ປູກ-ການ​ລ້ຽງ​ໃຫ້​ກາຍ​ເປັນ​ສິນ​ຄ້າ ເພື່ອ​ແກ້​ໄຂ​ຄວາມ​ທຸກ​ຍາກ​ເທື່ອ​ລະ​ກ້າວ ເຮັດ​ໃຫ້ 53 ເມືອງ, ຈຳ​ນວນ 4.792 ບ້ານ ແລະ 964.149 ຄອບຄົວ ພົ້ນ​ທຸກ

ທ່ານ ເພັດ ພົມ​ພິ​ພັກ ລັດ​ຖະ​ມົນ​ຕີ​ກະ​ຊວງ​ກະ​ສິ​ກຳ ແລະ ປ່າ​ໄມ້ ໄດ້​ລາຍ​ງານ​ຕໍ່​ກອງ​ປະ​ຊຸມ​ສະຫຼຸບ​ຕີ​ລາ​ຄາ​ການຈັດຕັ້ງປະຕິບັດວຽກງານກໍ່ສ້າງຮາກຖານການເມືອງ, ພັດທະນາຊົນນະບົດຮອບດ້ານ ແລະ ວຽກງານ 3 ສ້າງ ທົ່ວ​ປະ​ເທດ (ໄລຍະ 2016-2020) ແລະ ທິດທາງ ຮອດປິ 2025 ໃຫ້​ຮູ້​ວ່າ: ກະຊວງກະສິກໍາ ແລະ ປ່າໄມ້ ໄດ້ສຸມໃສ່ຈັດຕັ້ງປະຕິບັດ ຕາມທິດ 3 ເສົາຄໍ້າ, 4 ແຜນງານບຸລິມະສິດ, 10 ແຜນດໍາເນີນງານ ຂອງຂະແໜງກະສິກໍາ ແລະ ປ່າໄມ້. ພ້ອມທັງສຸມທຶນຮອນ, ພະນັກງານ ແລະ ປຸກລະດົມກໍາລັງແຮງສັງລວມ ຂອງສັງຄົມເຂົ້າໃສ່ການຈັດຕັ້ງປະຕິບັດດ້ວຍຄວາມພະຍາຍາມ ແລະ ໄດ້ຮັບຜົນໃນຫຼາຍດ້ານ, ສະແດງອອກໂຄງລ່າງພື້ນຖານຮັບໃຊ້ການຜະລິດ ແລະ ການດໍາລົງຊີວິດ ຂອງປະຊາຊົນໄດ້ຮັບການປັບປຸງ ແລະ ກໍ່ສ້າງໃໝ່ ຂະຫຍາຍລົງສູ່ເຂດຊົນນະບົດ, ເຂດຫ່າງໄກສອກຫຼີກຫຼາຍກວ່າເກົ່າ ຊຶ່ງສາມາດສະໜອງນໍ້າໃຫ້​ແກ່​ການ​ຜະ​ລິດກະສິກໍາ ໄດ້ເຖິງ 435.000 ເຮັກ​ຕາ; ສູນ-ສະຖານີບໍລິການເຕັກນິກກະສິກຳ ແລະ ປ່າໄມ້ ມີເຖິງ 205 ແຫ່ງ; ເກືອບ 85% ຂອງຄົວເຮືອນຢູ່ຊົນນະບົດ ໄດ້ເຂົ້າເຖິງເສັ້ນທາງຄົມມະນາຄົມ; ມີສັນຍານໂທລະສັບ ກວມເຖິງ 92,74% ຂອງຈໍານວນບ້ານທັງໝົດໃນທົ່ວປະເທດ; ມີ 93,5% ຂອງຈໍານວນຄອບຄົວທັງໝົດໃນທົ່ວປະເທດ ໄດ້ນໍາໃຊ້ໄຟຟ້າໃນລະບົບຕາຂ່າຍ; ຫຼາຍເມືອງ ແລະ ບ້ານ ຢູ່ຊົນນະບົດໄດ້ມີຕະຫຼາດ ຫຼື ບ່ອນຊື້-ຂາຍສິນຄ້າ ແລະ ​ເຊື່ອມ​ເຂົ້າ​ຕະຫຼາດຕົວເມືອງໃຫຍ່ໄດ້ຢ່າງສະດວກ.

ໄດ້ຍົກຍ້າຍຈັດສັນບ່ອນຢູ່ອາໄສໃຫ້ປະຊາຊົນ ຢູ່ຈຸດສຸມຂອງລັດຖະບານ ແລະ ຂອງທ້ອງຖິ່ນ ທັງໝົດ 70 ຈຸດສຸມ, ນອນໃນ 13 ແຂວງ, 36 ເມືອງ, 265 ບ້ານ, ມີ 13.059 ຄອບຄົວ. ສໍາລັບຢູ່ 4 ຈຸດສຸມ ຂອງສູນກາງ ໄດ້ຈັດສັນເນື້ອທີ່ທໍາການຜະລິດ 963 ເຮັກຕາ, ມີ 440 ຄອບຄົວ; ຈັດສັນອາຊີບການປູກ-ການລ້ຽງໃຫ້ປະຊາຊົນ 118 ຄອບຄົວ. ພ້ອມນັ້ນ ຢູ່ແຕ່ລະທ້ອງຖິ່ນກໍໄດ້ຈັດສັນເຂດການຜະລິດ ແລະ ອາຊີບໃຫ້ປະຊາຊົນຕາມເງື່ອນໄຂ ແລະ ທ່າແຮງ ຂອງແຕ່ລະບ່ອນ ເປັນຕົ້ນການຈັດສັນບ່ອນຢູ່ອາໄສ, ບ່ອນທໍາການຜະລິດ, ອາຊີບໃຫ້ປະຊາຊົນຢູ່ບ້ານຄຳປ່າແໜ ແລະ ບ້ານປ່າກ້ວຍ ເມືອງຊົນນະບູລີແຂວງສະຫວັນນະເຂດ; ການປູກຢາງພາລາ, ການລ້ຽງສັດ ຂອງປະຊາຊົນຢູ່ແຂວງພາກກາງ ແລະ ພາກເໜືອ; ການຈັດສັນອາຊີບປູກກາເຟ ເປັນສິນຄ້າ ຢູ່ເມືອງປາກຊ່ອງ ແຂວງຈໍາປາສັກ ແລະ ບັນດາແຂວງພາກເໜືອ. ໄດ້ຍົກຍ້າຍຈັດສັນປະຊາຊົນຜູ້ທີ່ໄດ້ຮັບຜົນກະທົບຈາກໂຄງການພັດທະນາ ຈໍານວນ 21 ໂຄງການ, ໃນ 10 ແຂວງ, 21 ເມືອງ, ມີ 157 ບ້ານ, 8.464 ຄອບຄົວ; ໄດ້ປຸກສ້າງເຮືອນໃຫ້ປະຊາຊົນໄດ້ 802 ຄອບຄົວ, ບຸກເບີກ ແລະ ຈັດສັນເນື້ອທີ່ທໍາການຜະລິດໄດ້ 1.995 ເຮັກຕາ ໃຫ້ປະຊາຊົນທີ່ໄດ້ຮັບຜົນກະທົບຈາກໄພພິບັດ ຢູ່ເມືອງສະໜາມໄຊ ແຂວງອັດຕະປື.

ການຍົກລະດັບຊີວິດການເປັນຢູ່ ແລະ ການແກ້ໄຂຄວາມທຸກຍາກ ຂອງປະຊາຊົນ ໄດ້ຮັບການຊຸກຍູ້ສົ່ງເສີມດ້ວຍຫຼາຍຮູບແບບ, ຫຼາຍລະດັບ ໂດຍເລີ່ມແຕ່ລະດັບຄອບຄົວກ້າວໄປເຖິງການສ້າງຕັ້ງເປັນກຸ່ມ ຫຼື ສະຫະກອນ ຫຼື ເປັນຟາມ. ປັດຈຸບັນ ມີກຸ່ມການຜະລິດກະສິກໍາ 4.023 ກຸ່ມ ແລະ 64 ສະຫະກອນ. ອັນພົ້ນເດັ່ນແມ່ນສະຫະກອນກາເຟພູພຽງບໍລະເວນ ແຂວງຈໍາປາສັກ; ສະຫະກອນສົ່ງເສີມກະສິກໍາເມືອງຫົງສາ ແຂວງໄຊຍະບູລີ; ສະຫະກອນກະສິກໍາອິນຊີທົ່ງມັ່ງ ນະຄອນຫຼວງວຽງຈັນ; ສະຫະກອນກາເຟວັນໃໝ່ ແຂວງຫົວພັນ; ມີ 1 ສະມາຄົມ (ສະມາຄົມພັດທະນາກະສິກໍາ ແລະ ສິ່ງແວດລ້ອມແບບຍືນຍົງ) ແລະ 1 ຜູ້ປະກອບການ (ບໍລິສັດເມືອງລາວຟູດ) ໄດ້ຮັບລາງວັນຜົນງານດີເດັ່ນໃນການປະກອບສ່ວນວຽກງານພັດທະນາຊົນນະບົດ ແລະ ລຶບລ້າງຄວາມທຸກຍາກອາຊຽນ;

ການສ້າງບ້ານພັດທະນາ, ສ້າງບ້ານໃຫຍ່ໃຫ້ເປັນຕົວເມືອງໃນຊົນນະບົດ ໄດ້ຮັບການເອົາໃຈໃສ່ຈາກຄະນະພັກ, ອົງການປົກຄອງທຸກຂັ້ນ ຊຶ່ງໃນ 5 ປີຜ່ານມາ ສາມາດສ້າງ​ບ້ານພັດທະນາໄດ້ 420 ບ້ານ, ສ້າງບ້ານໃຫຍ່ເປັນຕົວເມືອງໃນຊົນນະບົດໄດ້ 38 ບ້ານ ເຊັ່ນ: ບ້ານໂພນສະອາດ ເມືອງພຽງ ແຂວງໄຊຍະບູລີ; ບ້ານຄໍາແກ້ວ ເມືອງຫີນບູນ ແຂວງຄໍາມ່ວນ.

ນອກຈາກນັ້ນ, ຍັງມີກອງທຶນ ທລຍ; ກອງທຶນພັດທະນາບ້ານ (ກອງທຶນ 500 ລ້ານ​ກີບຕໍ່ເມືອງ​ທຸກ​ຍາກ); ທຶນຮ່ວມມືຊາຍແດນ ລາວ-ຫວຽດນາມ; ທຶນຮ່ວມມືທົດລອງແກ້ໄຂຄວາມທຸກຍາກ ລາວ-ຈີນ; ກອງທຶນພິເສດແມ່ນໍ້າຂອງ-ແມ່ນໍ້າລ້ານຊ້າງ; ທຶນກູ້ຢືມຈາກທະນາຄານໂລກ; ທຶນຊ່ວຍເຫຼືອຈາກອົງການ ແລະ ສະຖາບັນການເງິນສາກົນຕ່າງໆ; ການປ່ອຍສິນເຊື່ອ ຂອງທະນາຄານ ແລະ ອື່ນໆ ກໍລ້ວນແຕ່ສຸມໃສ່ພັດທະນາໂຄງລ່າງພື້ນຖານ ແລະ ການປັບປຸງຊີວິດການເປັນຢູ່ຂອງປະຊາຊົນ ຕາມເປົ້າໝາຍໂຄງການ.

ສັງລວມແລ້ວ, ຢູ່ເຂດຊົນນະບົດ, ເຂດຫ່າງໄກສອກຫຼີກ, ເຂດພື້ນຖານການປະຕິວັດເກົ່າ ລ້ວນແຕ່ໄດ້ຮັບການພັດທະນາດີຂຶ້ນ, ລະດັບຊີວິດການເປັນຢູ່ຂອງປະຊາຊົນ ໄດ້ຮັບການປັບປຸງຍົກລະດັບຂຶ້ນເທື່ອລະກ້າວ ຊຶ່ງຜ່ານການເກັບກໍາຂໍ້ມູນຕາມ ດໍາລັດ 348/ລບ ວ່າດ້ວຍ ມາດຕະຖານພົ້ນທຸກ ແລະ ພັດທະນາ, ທົ່ວປະເທດມີ 145 ເມືອງ ແລະ 3 ນະຄອນ, ມີ 8.426 ບ້ານ, 1.239.702 ຄອບຄົວ, ມີເມືອງພົ້ນທຸກ 53 ເມືອງ, ບ້ານພົ້ນທຸກ 4.792 ບ້ານ, ຄອບຄົວພົ້ນທຸກ 964.149 ຄອບຄົວ, ຄອບຄົວພັດທະນາ 736.996 ຄອບຄົວ, ບ້ານພັດທະນາ 747 ບ້ານ, ບ້ານໃຫຍ່ກາຍເປັນຕົວເມືອງໃນຊົນນະບົດ 14 ບ້ານ ແລະ ເມືອງເຂັ້ມແຂງຮອບດ້ານ 5 ເມືອງ (ນະຄອນຫຼວງວຽງຈັນ 4 ເມືອງ ແລະ ຈໍາປາສັກ 1 ເມືອງ).