ກອງປະຊຸມລັດຖະມົນຕີເສດຖະກິດອາຊຽນ ຄັ້ງທີ 54 ແລະ ກອງປະຊຸມທີ່ກ່ຽວຂ້ອງ

ກອງປະຊຸມຄັ້ງນີ້ ບັນດາລັດຖະມົນຕີເສດຖະກິດອາຊຽນ ໄດ້ພົບປະ ແລະ ແລກປ່ຽນທັດສະນະຮ່ວມກັນ ກ່ຽວກັບສະພາບເສດຖະກິດພາຍໃນອາຊຽນ ກໍຄືການຟື້ນຟູເສດຖະກິດພາຍຫຼັງທີ່ໄດ້ຮັບຜົນກະທົບຈາກການແຜ່ລະບາດຂອງພະຍາດໂຄວິດ-19, ການພັດທະນາການຄ້າໃນພາກພື້ນ ແລະ ສາກົນ, ການຈັດຕັ້ງປະຕິບັດແຜນແມ່ບົດປະຊາຄົມເສດຖະກິດອາຊຽນ 2025, ແຜນວຽກບຸລິມະສິດພາຍໃຕ້ເສົາຄໍ້າເສດຖະກິດອາຊຽນ ທີ່ສະເໜີໂດຍກໍາປູເຈຍ ໃນນາມເປັນປະທານອາຊຽນປີ 2022, ການສົ່ງເສີມການພົວພັນເສດຖະກິດລະຫວ່າງອາຊຽນກັບພາຍນອກ, ການຄ້າດ້ານເອເລັກໂຕຣນິກ ແລະ ເສດຖະກິດດີຈີຕອນ, ຈຸນລະວິສາຫະກິດ, ວິສາຫະກິດຂະໜາດນ້ອຍ ແລະ ກາງ ແລະ ການຫຼຸດຜ່ອນຄວາມແຕກໂຕນດ້ານການພັດທະນາ ຊຶ່ງລວມມີກອງປະຊຸມທັງໝົດ 21 ກອງປະຊຸມ ເຊັ່ນ: ກອງປະຊຸມສະພາເຂດການຄ້າເສລີອາຊຽນ ຄັ້ງທີ 36, ກອງປະຊຸມສະພາເຂດການລົງທຶນອາຊຽນ ຄັ້ງທີ 25, ກອງປະຊຸມລັດຖະມົນຕີເສດຖະກິດອາຊຽນຄັ້ງທີ 54, ກອງປະຊຸມປຶກສາຫາລືລະຫວ່າງລັດຖະມົນຕີເສດຖະກິດອາຊຽນ ແລະ ຄູ່ຮ່ວມເຈລະຈາ ເຊັ່ນ: ສປ ຈີນ, ສ ເກົາຫຼີ, ຍີ່ປຸ່ນ, ອາຊຽນບວກສາມ, ຮົງກົງ, ອິນເດຍ, ອົສຕຣາລີ-ນິວຊີແລນ, ອີຢູ, ຣັດເຊຍ, ອາເມຣິກາ, ອັງກິດ, ການາດາ ແລະ ກອງປະຊຸມລັດຖະມົນຕີເສດຖະກິດອາຊີຕາເວັນອອກ. ນອກນັ້ນ, ຍັງມີກອງປະຊຸມລະຫວ່າງລັດຖະມົນຕີເສດຖະກິດອາຊຽນ ກັບສະພາທີ່ປຶກສາທຸລະກິດອາຊຽນ, ກອງປະຊຸມລັດຖະມົນຕີເສດຖະກິດກໍາປູເຈຍ-ລາວ-ມຽນມາ-ຫວຽດນາມ ຄັ້ງທີ 14, ກອງປະຊຸມລັດຖະມົນຕີສັນຍາຮ່ວມມືເສດຖະກິດແບບຮອບດ້ານລະດັບພາກພື້ນ (RCEP) ຄັ້ງປະຖົມມະລືກ; ພ້ອມທັງການພົບປະແບບສອງຝ່າຍລະຫວ່າງ ທ່ານ ມະໄລທອງ ກົມມະສິດ ຮ່ວມກັບ ບັນດາລັດຖະມົນຕີ ຈາກປະເທດສະມາຊິກອາຊຽນ ແລະ ບັນດາຄູ່ຮ່ວມຕ່າງໆ ລວມທັງທ່ານເລຂາທິການໃຫຍ່ຂາອາຊຽນ.

ໂອກາດເຂົ້າຮ່ວມກອງປະຊຸມຄັ້ງນີ້, ບັນດາລັດຖະມົນຕີເສດຖະກິດອາຊຽນ ຍັງໄດ້ປຶກສາຫາລື ແລະ ໃຫ້ຄວາມສຳຄັນ ກ່ຽວກັບການສືບຕໍ່ຮັກສາລະດັບການເປີດຕະຫຼາດການຄ້າ ແລະ ການລົງທຶນໃນພາກພື້ນ ເພື່ອຮັບປະກັບຄວາມຕໍ່ເນື່ອງຂອງກົນໄກຕ່ອງໂສ້ການສະໜອງໃຫ້ສາມາດດໍາເນີນຢ່າງເປັນປົກກະຕິ ໂດຍໄດ້ເພີ່ມຂອບເຂດ ແລະ ຈໍານວນຂອງບັນຊີລາຍການສິນຄ້າທີ່ເຫັນວ່າຈໍາເປັນ ສໍາລັບການຮ່ວມມືໃນໄລຍະການຟື້ນຟູເສດຖະກິດພາຍຫຼັງການແຜ່ລະບາດຂອງເຊື້ອພະຍາດໂຄວິດ – 19 ໂດຍບໍ່ສ້າງມາດຕະການທີ່ເປັນອຸປະສັກຕໍ່ການຄ້າ-ການລົງທຶນ ຮັບປະກັນໃຫ້ມີການໝູນວຽນຂອງສິນຄ້າເຫຼົ່ານີ້ ພາຍໃນພາກພື້ນອາຊຽນໃຫ້ມີຄວາມສະດວກ ທັງນີ້ກໍເພື່ອເປັນການສ້າງຄວາມເຂັ້ມແຂງໃຫ້ແກ່ການຮ່ວມມືເສດຖະກິດອາຊຽນ, ຊຸກຍູ້ໃຫ້ມີການຜະລິດໃນອາຊຽນ, ແລະ ສົ່ງເສີມການຄ້າ-ການລົງທຶນໃນອາຊຽນໃຫ້ນັບມື້ນັບຫຼາຍຂຶ້ນເທື່ອລະກ້າວ.

ກອງປະຊຸມຄັ້ງນີ້, ບັນດາລັດຖະມົນຕີເສດຖະກິດອາຊຽນ ໄດ້ຮັບຮອງເອົາເອກະສານ ສໍາຄັນຄື: (1) ເອກະສານຄູ່ຮ່ວມມືດ້ານນະໂຍບາຍ ກ່ຽວກັບການສ້າງຄວາມເຂັ້ມແຂງໃຫ້ທຸລະກິດຍິງ ຢູ່ໃນນະໂຍບາຍແຫ່ງຊາດ ແລະ ແຜນດໍາເນີນງານ ວ່າດ້ວຍຈຸນລະວິສາຫະກິດ ແລະ ວິສາຫະກິດຂະ ໜາດນ້ອຍ ແລະ ກາງ, ແລະ (2)​ ເອກະສານຫຼັກການພື້ນຖານ ສໍາລັບການເຈລະຈາສັນຍາຂອບວຽກວ່າດ້ວຍການແຂ່ງຂັນ.