ສານປະເທດໄທ ສັ່ງປະຫານຊີວິດ ແມ່ລ້ຽງໃຈໂຫດ ວາງຢາຂ້າລູກ ຫວັງເອົາເງິນບໍລິຈາກ

ອີງຕາມສຳນັກຂ່າວ thairath ໃຫ້ຮູ້ວ່າ: ໃນວັນທີ 15 ກັນຍາ 2022 ນີ້ ສານອາຍາປະເທດໄທມີຄຳພິິພາກສາຄະດີໝາຍເລກດຳ ທີ່ພະນັກງານໄອຍາການສຳນັກງານຄະດີຄ້າມະນຸດ 3 ໂຈດ ຍື່ນຟ້ອງ ນາງ ນັດຕິວັນ ພັດທານິດ ຫລື ປຸກ ຈິດລຳລຶກ ຂໍ້ຫາຄ້າມະນຸດ ເພື່ອສະແຫວງຫາຜົນປະໂຫຍດຈາກການນຳຄົນມາຂໍທານ ເປັນເຫດໃຫ້ຜູ້ຖືກກະທຳໄດ້ຮັບອັນຕະລາຍ ແລະ ເຖິງແກ່ຊີວິດ, ພະຍາຍາມຂ້າຜູ້ອື່ນ, ທຳຮ້າຍຮ່າງກາຍຜູ້ອື່ນ, ໃຊ້ເດັກນ້ອຍເປັນເຄື່ອງມືໃນການຂໍທານ, ສໍ້ໂກງໂດຍການສະແດງເປັນຄົນອື່ນ.

ເຈົ້າໜ້າທີ່ໃຫ້ຮູ້ວ່າ: ລະຫວ່າງວັນທີ 22 ເມສາ 2015-12 ສິງຫາ 2019 ນາງໄດ້ຮັບເດັກຍິງອາຍຸ 4 ປີ ມາເປັນລູກລ້ຽງ ໃນເວລາທີ່ຮັບມາຢູ່ນຳນັ້ນໄດ້ໃຫ້ເດັກນ້ອຍກິນອາຫານທີ່ມີສານປົນເປື້ອນ ຕໍ່ເນື່ອງກັນຫລາຍຄັ້ງຈົນເຮັດໃຫ້ເດັກນ້ອຍມີອາການບາດເຈັບທາງລະບົບທາງເດີນອາຫານ, ມີຄວາມດັນເລືອດສູງ, ຮາກເປັນເລືອດ ຈົນຕ້ອງໄດ້ເຂົ້າໂຮງໝໍ ຈາກນັ້ນ ນາງກໍໄດ້ຖ່າຍຮູບເອົາເດັກນ້ອຍຄົນດັ່ງກ່າວໂພສລົງ ເຟສບຸກສ່ວນຕົວ ເຊີນຊວນປະຊາຊົນໃຫ້ມາຊ່ວຍເຫລືອ ແລະ ຂໍຮັບບໍລິຈາກຄ່າເຂົ້າໂຮງໝໍ ນອກຈາກນີ້ ນາງກໍໄດ້ລົງມືກະທຳແບບເກົ່າດັ່ງທີ່ເຄີຍເຮັດມາ ເຊິ່ງເປັນລູກຊາຍແທ້ໆ ອາຍຸ 2 ປີ. ໂດຍສານພິຈາລະນາວ່າການກະທຳດັ່ງກ່າວເປັນຄວາມຜິດຫລາຍປະການຕ່າງກັນ ສານຈຶ່ງສັ່ງປະຫານຊີວິດ.