ໂຫດກະໂດດຍິງ! ເປັບ ກວາດີໂອລາ ຊື່ນຊົມ ຮາແລນ ທີ່ຍິງປະຕູໄຊໃຫ້ ແມນ ຊິຕີ້ ບຽດຊະນະ ດັອດມຸນ 2 – 1 ໃນເກມແຊ້ມປຽນລີກເມື່ອຄືນທີ່ຜ່ານມາ

ເປັບ ກວາດິໂອລາ ຜູ້ຈັດການທີມຂອງ ແມນເຊັສເຕີ ຊິຕີ້ ຊົມເຊີຍ ເອີລິງ ບຣູດ ຮາແລນ ກອງໜ້າຕົວເກັ່ງຂອງທີມ ທີ່ຍິງປະຕູໄຊດ້ວຍການກະໂດດຍິງ, ຢຽດຕີນໄປປ່ຽນທາງບານເຂົ້າປະຕູໃນນາທີ 84 ຂອງເກມຊ່ວຍໃຫ້ “ເຮືອໃບສີຟ້າ” ເປີດບ້ານເອົາຊະນະ “ເສືອເຫລືອງ” ໂບຣຸສເຊຍ ດັອດມຸນ  2-1 ໃນຮອບແບ່ງກຸ່ມ ຢູຟາ ແຊ້ມປຽນລີກ ກຸ່ມ G ເມື່ອຄືນວັນພຸດທີ່ຜ່ານມາ. ໂດຍກ່າວວ່າການຍິງລູກນີ້ເຮັດໃຫ້ເຂົານືກເຖິງລູກຍິງມະຫັດສະຈັນຂອງ “ນັກເຕະເທວະດາ” ໂຢຮັນ ຄຣັຟ ເຄີຍເຮັດໄດ້ໃນສະໄໝການຫລິ້ນກັບ ບາເຊໂລນາ.

ນາຍໃຫຍ່ເຮືອໃບສີຟ້າ ກ່າວວ່າ “ບາງຄົນທີ່ຮູ້ຈັກຂ້ອຍຈະຮູ້ວ່າ ໂຢຮັນ ຄຣັຟ ເປັນຄົນທີ່ມີອິດທິພົນຕໍ່ຂ້ອຍຫລາຍ, ທັງສ່ວນຕົວ ແລະ ບຸກຄົນ,” ເປັນຄົນໃຫ້ຄວາມຮູ້ ເປັນຜູ້ຈັດການທີມ, ຄູສອນ, ແລະ ເປັນທຸກສິ່ງທຸກຢ່າງ. ລາວເຄີຍໄດ້ຍິງປະຕູທີ່ມະຫັດສະຈັນຢູ່ທີ່ ແຄັມນູ ກັບພົບ ແອດເລຕິໂກ ມາດຣິດ (ລະດູການ 1973-74) ແລະ ມັນຄືກັນກັບປະຕູຂອງ ເອີລິງ ຮາແລນ ໃນເກມນີ້. ເມື່ອເຂົາຍິງລູກນັ້ນ, ຂ້ອຍຄິດເຖິງປະຕູຂອງ ໂຢຮັນ ຄຣັຟ ທັນທີ. ແລະ ພວກເຮົາຍັງຕ້ອງຊົມເຊີຍ ເຈົ່າ ຄັນເຊໂລ່ ທີ່ເປີດບານໄດ້ຢ່າງຍອດຢ້ຽມ.”