ເມື່ອກ່ອນທ້າຍຝົນຕົ້ນໜາວຍາມເຂົ້າໃໝ່ປາມັນ ແຕ່ຍຸກນີ້ເຂົ້າຍາກໝາກແພງ ຄ່າແຮງຕໍ່າ
ໂດຍ: ທິດກໍ່າ
ອີກບໍ່ດົນກໍຈະຮອດບຸນອອກພັນສາປະວໍລະນາຂຶ້ນ 15 ຄໍ່າ ຫລື ເອີ້ນຢ່າງໜຶ່ງວ່າ ເດືອນ 11 ເພັງ ພສ 2565 ຕາມປະຕິທິນລາວ ເຊິ່ງກົງກັບວັນທີ 10 ຕຸລາ 2022. ສ່ວນວັນທີ 11 ເປັນບຸນຊ່ວງເຮືອທ່າວັດຈັນ ນະຄອນຫລວງວຽງຈັນ.
ຕາມປະເພນີຮີດຄອງຂອງລາວເຮົາເຄີຍເອີ້ນກັນວ່າ ຊ່ວງນີ້ເປັນຊ່ວງທ້າຍຝົນຕົ້ນໜາວ ແມ່ນຍາມເຂົ້າໃໝ່ປາມັນ, ເຂົ້າສຸກເຫລືອງເຕັມນາ ປາເຕັມຕ້ອນ ມ້ອນເຕັມດົ້ງ. ໝາຍເຖິງຍາມເຂົ້າປາອາຫານອຸດົມສົມບູນບໍ່ອຶດບໍ່ຢາກ, ເປັນຊ່ວງເກັບກູ້ການຜະລິດເຊັ່ນ: ເກັບກູ້ເຂົ້ານາທີ່ສຸກເຫລືອງເຕັມທົ່ງ, ເກັບກູ້ເຜືອກມັນ ແລະ ກິນປາລົງຕ້ອນລົງຫລີ່ ເພາະປະເທດເຮົາມີທຳມະຊາດອັນສວຍສົດງົດງາມ, ມີຫ້ວຍຮ່ອງຄອງບຶງ ແລະ ແມ່ນ້ຳລຳເຊຫລາກຫລາຍ, ປະຊາຊົນສ່ວນໃຫຍ່ອາໄສຫາຢູ່ຫາກິນຕາມທຳມະຊາດເກັບຜັກຫັກໜໍ່, ຫາປູຫາປາ. ນີ້ຄືຊີວິດຈິງທີ່ຕິດພັນກັບທຳມະຊາດຢ່າງມີຄວາມສຸກ.
ສ່ວນທາງດ້ານຮີດຄອງປະເພນີ ແລະ ວັດທະນະທຳນັ້ນກໍຍິ່ງມີຄວາມໝາຍເລິກເຊິ່ງ ເພາະເຖິງຍາມອອກພັນສາໄປແລ້ວກໍຈະມີງານບຸນຕ່າງໆເຊັ່ນ: ບຸນກະຖິນ, ບຸນກອງຜ້າປ່າສາມັກຄີ, ຕິດຕໍ່ໆກັນຈົນຮອດບຸນນະມັດສະການພະທາດຫລວງ ແລະ ບຸນອື່ນໆໃນແຕ່ລະເດືອນ. ສ່ວນທາງດ້ານສັງຄົມກໍມີງານສູ່ຂວັນແຕ່ງດອງລະຫວ່າງຄູ່ບ່າວສາວທີ່ມັກຮັກ ແລະ ຜູກພັນກັນມາຕາມເວລາອັນສົມຄວນ.
ສະນັ້ນ, ຖືໄດ້ວ່ານັບແຕ່ບຸນຫໍ່ເຂົ້າສະຫລາກໄປຮອດມື້ອອກພັນສາ ແລະ ຕໍ່ໆໄປຮອດພະຈິກ, ທັນວາແມ່ນຊ່ວງທີ່ມີຄວາມໝາຍຍິ່ງ, ເປັນເວລານາທີທອງໃນການຊອກຢູ່ຫາກິນ ປະຊາຊົນເຮົາກໍຄືການທຳທຸລະກິດການງານຕ່າງໆໃນທຸກໆສາຂາອາຊີບດັ່ງປະໂຫຍກຄຳເວົ້າທີ່ມີມາແຕ່ບູຮານນະການວ່າ: ອອກພັນສາລາພະເຈົ້າຊິຫັນເຂົ້າສູ່ງານ.
ຢ່າງໃດກໍດີ, ໜຶ່ງໃນພາລະກິດທີ່ພວກເຮົາຕ້ອງເອົາໃຈໃສ່ເພື່ອເລັ່ງລັດປະຕິບັດໃຫ້ໄດ້ຕາມຄວາມຫວັງ ແລະ ເປົ້າໝາຍນັ້ນຄື: 2 ວາລະແຫ່ງຊາດໃຫ້ສຳເລັດຢ່າງເປັນຮູບປະທຳ ເປັນຕົ້ນວາລະແຫ່ງຊາດວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະກິດການເງິນ, ວາລະແຫ່ງຊາດວ່າດ້ວຍການແກ້ໄຂບັນຫາຢາເສບຕິດ ເພາະສອງວາລະນີ້ເປັນໄລຍະທີ່ສຳຄັນເພື່ອກອບກູ້ບັ້ນວິກິດຕ່າງໆໃຫ້ຫວນກັບມາມີຄວາມສະຫງົບອຸ່ນອ່ຽນ. ອັນສຳຄັນທີ່ສຸດເງິນກີບໃຫ້ມີຄຸນຄ່າໝັ້ນຄົງ, ສິນຄ້າໃນທ້ອງຕະຫລາດກໍໃຫ້ນັບມື້ຖືກລົງ, ຢາເສບຕິດກໍຂໍໃຫ້ໝົດໄປຈາກສັງຄົມລາວ, ລາຄານ້ຳມັນກໍຂໍໃຫ້ຖືກລົງ ເພາະທຸກຢ່າງນ້ຳມັນກາຍເປັນຕົ້ນເຫດໜຶ່ງທີ່ເຮັດໃຫ້ທຸກຢ່າງຂຶ້ນແລ້ວບໍ່ຍອມລົງ.
ອີກໜຶ່ງບັນຫາໃຫຍ່ທີ່ຊາວນະຄອນຫລວງ ແລະ ແຂວງອື່ນໆເກືອບທົ່ວປະເທດພວມປະເຊີນຢູ່ກໍຄືບັນຫາຂີ້ລັກງັດແງະ, ປຸ້ນຈີ້ຊີງຊັບ ທີ່ເປັນຜົນພວງມາຈາກ ເຂົ້າຍາກໝາກແພງ ຄ່າແຮງຕໍ່າ, ການຕິດການພະນັນ ແລະ ຕິດຢາເສບຕິດ ເຊິ່ງຕ້ອງເອົາໃຈໃສ່ແກ້ໄຂຂັ້ນເດັດຂາດ ເພາະທຸກມື້ນີ້ປະຊາຊົນຫວາດກົວກັນໃຫຍ່ ຍ້ອນມີໂຈນອອກລ່າຍາມກາງຄໍ່າກາງຄືນ, ຂາດຄວາມປອດໄພທາງດ້ານຊັບສິນ ແລະ ຊີວິດ ປະຊາຊົນຄາດຫວັງກັບເຈົ້າໜ້າທີ່ ແລະ ເຊື່ອໝັ້ນຕໍ່ການນຳພາຢ່າງລົ້ນເຫລືອ ວ່າຈະສາມາດກຳຈັດປັດເປົ່າບັນຫານີ້ໃຫ້ໄດ້ໂດຍໄວ.
