ເອຟເວີຕັນ ຄວ້າຜູ້ຮັກສາປະຕູປະສົບການຫລາຍເສີມທີມສຸກເສີນ

ເອຟເວີຕັນ ສະໂມສອນໃນການແຂ່ງຂັນ ພຣີເມຍລີກ ອັງກິດ ປະກາດຢືນຢັນຄວ້າ ເອລດິນ ຢາຄູໂປວິດ ຜູ້ຮັກສາປະຕູປະສົບການ ຫລາຍມາຮ່ວມທີມດ້ວຍສັນຍາໄລຍະສັ້ນແບບບໍ່ມີຄ່າຕົວຢ່າງເປັນທາງການແລ້ວເມື່ອວັນອັງຄານ ທີ 13 ກັນຍາ.

ຢາຄູໂປວິດ ອາຍຸ 37 ປີ ເຊິ່ງເກີດທີ່ປະເທດ ບອສເນຍ ກ່ອນມາຫລິ້ນໃຫ້ທີມຊາດສະວິດເຊີແລນ ກາຍເປັນນັກເຕະໄຮ້ສັງກັດ ຫລັງຫາກໍຫມົດສັນຍາກັບ ເລສເຕີ ຊິຕີ ໃນໄລຍະລະດູການຜ່ານມາ ເຮັດໃຫ້ສາມາດເຊັນທີມໃດກໍໄດ້ແບບບໍ່ມີຄ່າຕົວຫລັງປິດ ຕະຫລາດໄປແລ້ວ.

ນອກຈາກເຄີຍຢູ່ກັບ ເລສເຕີ ລະຫວ່າງປີ 2017-2022 ແລ້ວນັ້ນ ຢາຄູໂປວິດ ຍັງມີປະສົບການຫລາຍກັບອີກຫລາຍສະໂມສອນ ເຊັນ : ຮັລ ຊິຕີ, ເລຕັນ ໂອລຽນ, ໂອລິມເປຍກອສ, ໂລໂຄໂມທິບ ມອສໂກ ແລະ ກຣາສຮ໊ອບເປີ ຊູຣິກ ເປັນຕົ້ນ.

ສາເຫດທີ່ ເອຟເວີຕັນ ຕ້ອງໄປດຶງ ຢາຄູໂປວິດ ມາຮ່ວມເປັນເພາະ ຈໍແດນ ພິກຟອດ ໄດ້ຮັບບາດເຈັບຕ້ອງພັກຍາວ 1 ເດືອນ ຂະນະທີ່ ແອນດີ ໂລເນີແກນ ມື 3 ຢູ່ໃນໄລຍະພັກຟື້ນຈາກການບາດເຈັບເຂົ່າຫມົດສິນຫລິ້ນ 2-3 ອາທິດ.

ຈາກການບາດເຈັບຂອງ ພິກຟອດ ແລະ ໂລເນີແກນ ເຮັດໃຫ້ ເອຟເວີຕັນ ເຫລືອຜູ້ຮັກສາປະຕູພຽງ ອັສເມຍ ເບໂກວິດ ໃຫ້ໃຊ້ງານ ຈົນຕ້ອງເອົາ ບິລລີ ເຄຣມລິນ ຜູ້ຮັກສາປະຕູຈາກສະໂມສອນເຍົາວະຊົນຂຶ້ນມາ ກ່ອນທີ່ຈະຕັດສິນໃຈໄປຄວ້າ ຢາຄູໂປວິດ ມາຮ່ວມທີມແບບບໍ່ມີຄ່າຕົວໃນທີ່ສຸດ.