ຄວາມເປັນເອກະລາດທາງດ້ານເສດຖະກິດຕ້ອງບົນພື້ນຖານຄວາມເປັນເຈົ້າຕົນເອງຮອບດ້ານ

ບົດທິດກໍ່າ

ຄວາມເປັນເອກະລາດທາງດ້ານເສດຖະກິດມັນກໍບໍ່ໝາຍເຖິງຂຶ້ນກັບເສດຖະກິດຂອງປະເທດອື່ນຢ່າງຮ້ອຍເປີເຊັນ ຫລື ມີແຕ່ການນຳເຂົ້າ, ແຕ່ມັນໝາຍເຖິງເສດຖະກິດຂອງປະເທດເຂັ້ມແຂງໝັ້ນຄົງ ຕ້ອງບົນພື້ນຖານການຜະລິດຢ່າງສົມດູນກັບການບໍລິໂພກ. ໃນນີ້ການສົ່ງອອກຕ້ອງຫລາຍກວ່າການນຳເຂົ້າ, ການເກັບພາສີອາກອນລາຍໄດ້ຕ່າງໆຕ້ອງໄດ້ຕາມຄາດໝາຍ ຫລື ລື່ນຄາດໝາຍກ້າວໄປເຖິງການຄຸ້ມຄອງບໍລິຫານ, ການບໍລິຫານ-ຈັດການ ຕ້ອງດຳເນີນໄປຕາມລະບຽບກົດໝາຍຢ່າງເຂັ້ມງວດ. ທັງໝົດທີ່ກ່າວມານີ້ແມ່ນພື້ນຖານການຜະລິດຄົງທີ່ຍືນຍົງໝັ້ນຄົງ.

ຈາກປັດໄຈຕ່າງໆ ແລະ ສະພາບຕົວຈິງທີ່ກ່າວມານີ້ ນັບແຕ່ສະຖາປະນາ ສປປ ລາວ ເປັນຕົ້ນມາໄດ້ 47 ປີ ພວກເຮົາກໍສາມາດມີພື້ນຖານເສດຖະກິດທີ່ດີ ແລະ ຂະຫຍາຍຕົວມາເປັນລຳດັບ ເຊິ່ງໃນບົດນີ້ຈະຂໍເວົ້າແຕ່ການຜະລິດສິນຄ້າເພື່ອບໍລິໂພກພາຍໃນ ແລະ ການສົ່ງອອກ. ການຜະລິດສິນຄ້າລາຍໃຫຍ່ເພື່ອສົ່ງອອກສຳລັບ ສປປ ລາວ ແມ່ນກະແສໄຟຟ້າ. ປັດຈຸບັນ ລາວເຮົາມີເຂື່ອນໄຟຟ້າພະລັງນ້ຳຜະລິດກະແສໄຟຟ້າເພື່ອສົ່ງອອກຂາຍໃຫ້ປະເທດອ້ອມຂ້າງ ແລະ ບັນດາປະເທດອາຊຽນເກືອບ 100 ແຫ່ງ ແລະ ພວມຢູ່ໃນໄລຍະກໍ່ສ້າງຫລາຍແຫ່ງ ມີທັງພະລັງນ້ຳ, ພະລັງລົມ ແລະ ພະລັງແສງອາທິດ. ໃນໄລຍະປັດຈຸບັນ ເຖິງວ່າເຂື່ອນໄຟຟ້າຍັງເປັນການລົງທຶນຂອງຕ່າງປະເທດ ແຕ່ອະນາຄົດຈະເປັນຂອງລາວຈະເຂົ້າບໍລິຫານເອງ.

ສ່ວນພາກກະສິກຳປູກຝັງລ້ຽງສັດທີ່ສາມາດສົ່ງອອກແລ້ວໃນຫລາຍໆປີຜ່ານມາກໍມີກາເຟ, ມັນຕົ້ນ, ກ້ວຍ, ງົວ, ເຂົ້າ, ສາລີ, ຖົ່ວດິນ ແລະ ອື່ນໆຈຳນວນໜຶ່ງ. ໃນຈຳນວນສິນຄ້າເຫລົ່ານີ້ ເຖິງວ່າບໍ່ທັນຜະລິດໄດ້ຫລາຍ ແຕ່ກໍຈະເປັນການປູເສັ້ນທາງໃນການສົ່ງອອກຂອງລາວໃນອະນາຄົດ. ສຳລັບພາກອຸດສາຫະກຳ ມາຮອດປັດຈຸບັນ ລາວສາມາດຜະລິດສິນຄ້າສົ່ງອອກໄປແກ່ແຮ່ເຫລັກ, ແຮ່ຄຳ, ເງິນ, ເກີບ ແລະ ເສື້ອຜ້າຈຳນວນບໍ່ໜ້ອຍ.

ສ່ວນໃນຂົງເຂດອຸດສາຫະກຳຂະໜາດນ້ອຍ ແລະ ຂະໜາດກາງກໍເຫັນວ່າເລີ່ມຜະລິດສິນຄ້າຫລາຍຢ່າງອອກມາຮັບໃຊ້ສັງຄົມພາຍໃນ ບໍ່ວ່າເຄື່ອງອຸປະໂພກ-ບໍລິໂພກ ທັງເຄື່ອງໃຊ້ໃນຄົວເຮືອນ ເປັນຕົ້ນສະບູຝຸ່ນ, ປາແດກ, ແປ້ງນົວ, ເກືອ ແລະ ຜະລິດຕະພັນອື່ນໆອີກຫລາຍຢ່າງ.

ຢ່າງໃດກໍດີ, ໃນອະນາຄົດເຮົາເຊື່ອໝັ້ນວ່າ ສປປ ລາວ ຈະສາມາດຜະລິດສິນຄ້າທີ່ຫລາກຫລາຍມາຮັບໃຊ້ສັງຄົມລາວ ແລະ ເປັນການສົ່ງອອກໄປຍັງຕ່າງປະເທດໃຫ້ຫລາຍຂຶ້ນ ເພາະວ່າຄວາມເປັນເອກະລາດທາງເສດຖະກິດຕ້ອງບົນພື້ນຖານຄວາມເປັນເຈົ້າຕົນເອງຢ່າງຮອບດ້ານ. ກົງກັນຂ້າມ ຖ້າບໍ່ມີການແກ້ງແຍ່ງແຂ່ງຂັນກັບປະເທດອື່ນແລ້ວ ເຮົາກໍຈະຕົກຢູ່ໃນສະພາວະເງິນກີບອ່ອນຄ່າ, ນ້ຳມັນແພງ, ສິນຄ້າແພງ ເພາະຜ່ານມາເຮົາຫັນໄປຊົມໃຊ້ແຕ່ຂອງໝູ່ເປັນສ່ວນຫລາຍ ສຸດທ້າຍມາປະເທດຊາດກໍຕົກຢູ່ໃນຊາຕາກຳອັນລຳບາກ ຍ້ອນຂາດຄວາມເປັນເຈົ້ານັ້ນເອງ.