ມຽນມາເຂັ້ມງວດມາດຕະການສະກັດໂຄວິດ ຫລັງຈຳນວນຜູ້ຕິດເຊື້ອເພີ່ມຂຶ້ນ

ມຽນມາກຳລັງດຳເນີນການເຂັ້ມງວດມາດຕະການຄວບຄຸມ ແລະ ປ້ອງກັນພະຍາດໂຄວິດ-19 ທ່າມກາງຈຳນວນຜູ້ຕິດເຊື້ອເພີ່ມຂຶ້ນໃນໄລຍະຜ່ານມາ.

ສຳນັກຂ່າວຊິນຮົວລາຍງານວ່າ: ມາດຕະການດັ່ງກ່າວຄວບຄຸມການສົ່ງເສີມການສັກວັກຊີນ, ການແບ່ງປັນຄວາມຮູ້ກ່ຽວກັບການໃສ່ຜ້າປິດປາກ, ການຈັດຫາອ່າງລ້າງມືໃນຕະຫລາດ, ການສີດພົ່ນຢາຂ້າເຊື້ອ ລວມທັງການເຜີຍແຜ່ຂໍ້ມູນ, ຄຳປະກາດ, ຄຳແນະນຳສຳລັບການປ້ອງກັນຜ່ານສື່ຢ່າງຕໍ່ເນື່ອງ.

ນອກຈາກນີ້, ທາງການຈະຍັງຈັດໃຫ້ມີການຈັດເກັບວັກຊີນປ້ອງກັນໂຄວິດ-19 ໄວ້ໃນອຸນຫະພູມຕູ້ເຢັນມາດຕະຖານ ແລະ ດຳເນີນການກວດຫາເຊື້ອຜູ້ທີ່ເດີນທາງກັບຈາກຕ່າງປະເທດ ແລະ ນັກທ່ອງທ່ຽວຕ່າງປະເທດຢູ່ສະໜາມບິນນຳອີກ.

ໃນໄລຍະຜ່ານມາ, ມຽນມາຕ້ອງຜະເຊີນຈຳນວນຜູ້ຕິດເຊື້ອປະຈຳວັນເພີ່ມຂຶ້ນ ໂດຍສ່ວນຫລາຍເປັນຜູ້ຕິດເຊື້ອພາຍໃນປະເທດ ອັດຕາຜົນການກວດຫາເຊື້ອເປັນບວກປະຈຳວັນເພີ່ມຂຶ້ນມາຢູ່ 2,43%.

ທັງນີ້, ໃນວັນທີ 10 ສິງຫາຜ່ານມາ ມຽນມາລາຍງານພົບຜູ້ຕິດເຊື້ອໃໝ່ 262 ຄົນ ແຕ່ບໍ່ມີລາຍງານຜູ້ເສຍຊີວິດ.