ເຊລຊີ ຫວນກັບມາສົນໃຈ ໂຣນັລໂດ, ຫລັງໄດ້ຜູ້ຈັດການໃຫມ່

ຄຣິສຕຽນໂນ ໂຣນັລໂດ ກອງໜ້າຂອງ ແມນເຊສເຕີ ຢູໄນເຕັດ ຍັງບໍ່ຫມົດຫວັງທີ່ຈະໄດ້ຍ້າຍອອກຈາກ ໂອນ ແທຣບຟອດ ກ່ອນຫມົດສັນຍາ ເມື່ອສື່ສະເປນລາຍງານວ່າ ເຊລຊີ ພ້ອມຫວນກັບໄປຄວ້າ ດາວຍິງທີມຊາດໂປຣຕຸເກສ ໃນໄລຍະເປີດຕະ ຫລາດເດືອນມັງກອນ ໂດຍ ແກຣມ ພອດເຕີ ຜູ້ຈັດການທີມຄົນໃຫມ່ພ້ອມເຮັດຕາມຄວາມຕ້ອງການຂອງ ທັອດ ໂບລີ ເຈົ້າຂອງທີມຊາວສະຫະລັດ ຢ່າງເຕັມທີ່.

ໂຣນັລໂດ ຕົກເປັນຂ່າວຢ່າງຫລາຍ ຫວັງຍ້າຍອອກຈາກທີມ ແມນຢູ ເມື່ອລະດູການຜ່ານມາເພື່ອລົງຫລິ້ນບານເຕະ ຢູຟາ ແຊ໊ມປຽນລີກ ແຕ່ສຸດທ້າຍແລ້ວລາວຈຳຕ້ອງຫລິ້ນໃນຖິ່ນລະຄອນແຫ່ງຄວາມຝັນຕໍ່ໄປ, ຜ່ານມາ ເອຣິກ ເທນ ຮາກ ຜູ້ຈັດການທີມຊາວເນເທີແລນຢືນຢັນວ່າບໍ່ຄິດຂາຍຖິ້ມ ຂະນະທີ່ຫລາຍສະໂມສອນທີ່ຖືກລືກັບດາວຍິງ 37 ປີຕ່າງກໍ ອອກມາປະຕິເສດວ່າບໍ່ມີຄວາມຄິດເຊັນສັນຍາກັບ ໂຣນັລໂດ ເຊັ່ນ ບາເຢິນ ມິວນິກ, ນາໂປລີ ແລະອື່ນໆ.

ສ່ວນ ເຊລຊີ  ເສດຖີ ພຣີເມຍລີກ ເປັນອີກທີມທີ່ຖືກເຊື່ອມໂຍງກັບ ໂຣນັລໂດ ແຕ່ບໍ່ໄດ້ເຊັນສັນຍາກັບລາວເຊ່ັນດຽວກັນ ເນື່ອງຈາກ ໂທມັສ ທູເຄິລ ຜູ້ຈັດການທີມຄົນກ່ອນບໍ່ເຫັນດີນຳກັບເຈົ້າຂອງທີມ ແລະ ເລືອກ ດຶງ ປີແອ ເອເມຣິກ ໂອບາເມຢອງ ມາຈາກ ບາເຊໂລນາ ແທນ, ກ່ອນທີ່ລາວຈະຖືກເຈົ້າຂອງສະໂມສອນປົດຕຳແໜ໋ງແບບຟ້າຜ່າ ຫລັງພາທີມເສຍໃນເກມ ແຊ໊ມປຽນລີກ ຮອບແບ່ງກຸ່ມນັດທຳອິດ ໂດຍມີ ພັອດເຕີ ຍ້າຍຈາກ ໄບຣຕັນ ມາເປັນຜູ້ຈັດການທີມຄົນໃຫມ່ຂອງສັງວຽນ ສະແຕມຟອດ ບຣິດ.

ດ້ວຍຄວາມມັກໃນຕົວ ໂຣນັລໂດ ຂອງ ໂບລີ ຫລ້າສຸດ ເມື່ອ 10 ກັນຍາຜ່ານມາ ເຊລຊີ ຈະກັບໄປສົນໃຈ ໂຣນັລໂດ ອີກເທື່ອຫນຶ່ງ ໃນໄລຍະປີໃຫມ່ ແລະ ຫມັ້ນໃຈວ່າຈະໄດ້ລາວມາຮ່ວມທີມ ເນື່ອງຈາກ ພອດເຕີ ຮັບປາກວ່າຈະບໍ່ຂັດຂວາງການຊື້ຄັ້ງນີ້ຄືກັບ ທູເຄິລ ຢ່າງແນ່ນອນ.